Imilimo ya batumwa 5 - Chipangano Chabwangu

Ananiyasi na Safila

¹ Kwalipo umuntu umo uwalikwitwa Ananiyasi nomukashi wakwe ali ni Safila. Nabo bashitishe ibala lyabo.

² Panuma yakumfwana nomukashi wakwe, Ananiyasi ashilepo indalama shimbi. Apintile shimbi nokutwala kubatumwa.

³ Elo Petulo alimufumbile ati, “Webo Ananiyasi, chindo icho Satana akutunkile mumutima obe ukubepa Umupashi Wabuta pakufisapo indalama shimbi isho wasangile mwibala lyobe?

⁴ Ulo taulashitisha ibala ndi lyali lyobe nendalama wasangilemo shali shobe. Mba chindo wali kulanguluka mumutima obe pakuchita nchi? Ukuba tebantupo ubepele iyowo, kuntu Lesa.”

⁵ Ananiyasi pakumfwa nga mashiwi, awile panshi nokufwa kafwa. Nabantu bonse abaumfwileko bayiketwe nomwenso uukulu.

⁶ Bwangu-bwangu abalumbwana balishile, bapomba ichitumbi munsalu, elo kabaya kabamushika.

⁷ Elo tapapitile nakashita umukashi wakwe naye alishile kwinjila ukwambula ukwishiba ifichitikile.

⁸ Petulo alimufumbile ati, “Mbushako, napo nishenka nshi ndalama mwasangile mwibala mwashitishe?” Naye aasukile ati, “Ina, nishenka nshi.”

⁹ Elo Petulo asosele ati, “Nga chindo icho webo nomulume obe mwapanganine ukwesha Umupashi waku Bashikulu? Bona abantu abafuma mukushika umulume obe ali pamulyango, nawebo kumo bakokupinta!”

¹⁰ Mpenkapo Safila awile pamakasa akwa Petulo nokufwa. Ulo abalumbwana bayinjile basangile alifwile kale. Elo bamupintile nokuya kumushika apepi nomulume wakwe.

¹¹ Epo ichilonganino nabantu abaumfwileko mfi, bayiketwe nomwenso.

Ifyafiso ifikulu nefyakushimbwisha

¹² Abatumwa balikuchita ifyafiso ifikulu nefyakushimbwisha ifinji pakati kabantu. Abalikuchetekela bonse balikulongana nomutima umo mulukolo ulo balikwita ati, “Lukolo lwakwa Solomoni.”

¹³ Nomba takwalipo umuntu nangu umo uutachetekela uwayilundileko kubatumwa, nangu abantu balikubatondayisha.

¹⁴ Ibumba lyabalalume nabanakashi abali kuchetekela muli Bashikulu lyaleya lilekulilako.

¹⁵ Pakubona mfilya, abantu balikuleta abalwele abenji nokubalalika pamalili napampasa mumbali yamusebo ukuti ulo Petulo alikupita, ichinshingwa chakwe chibakumye.

¹⁶ Elo abantu abenji abamumishi yashinguluka Yelusalemu baletele abalwele babo nambalya imipashi iibi yalikuchusha. Bonse balikupola.

Bachusha abatumwa

¹⁷ Nomba chipupila mukulu nabanakwe bonse abamwibumba lya Basaduki baliwile nomufimbila.

¹⁸ Balikete abatumwa nokubaposa muchifungo chabantu bonse.

¹⁹ Nomba ubushiku bumo umungelo waku Lesa aliswileko ifibi fyachifungo. Afumishe abatumwa nokubeba ati,

²⁰ “Kamuya kunanda yaku Lesa mukashimikile abantu ifintu fyonse ifyabumi mbu ubwabwangu.”

²¹ Nabo abasambishi pakumfwa mfi, bayinjile munanda yaku Lesa kumacha batatika nokusambisha. Ulo chipupila mukulu pamo nabanakwe bafikile, balonganikile bachilolo bonse aba Bayuda kuchilye ichikulu. Ulo bakumanine, bayitile abatumwa ukuti babalete kuchilye ukufuma kuchifungo.

²² Ati bafike kuchifungo, basangile abatumwa tabamo. Elo babwelele mukufisha umulandu ngu kuchilye nokuti,

²³ “Ulo twafika kuchifungo, twasanga ifiibi filiselwe nokukomwa bwino-bwino. Bashilikali nabo bonse balikulonda bwino-bwino. Nomba ulo twayisulako ifiibi twasanga mukati tamulipo umuntu nangu umo!”

²⁴ Ulo umukulu wabashilikali bananda yaku Lesa pamo nentungulushi shabachipupila baumfwile nga mashiwi, tabayishibilepo ichachitikile kubatumwa.

²⁵ Penkapo umuntu umo afikile nokubeba ati, “Umfweni! Mbalya bantu mwabikile muchifungo bali munanda yaku Lesa bakosambisha abantu!”

²⁶ Umukulu wabashilikali epakuyako nabantu bakwe ukuleta abatumwa. Nomba tababomfeshepo ifiso pantu balikutina ukuti abantu kuti babatobaula amabwe.

²⁷ Baletele abatumwa kuchilye. Elo chipupila mukulu abafumbile ati,

²⁸ “Twalimubinda mwebo ukusambisha mwishina lyaku ngulya muntu. Nomba boneni icho muchitile! Mu Yelusalemu monse mulikubishe ukusambisha kwenu, nakambi mukofwaya ukuleta umulandu wamfwa yakwe palifwebo!”

²⁹ Elo Petulo nabatumwa bayasukile ati, “Tulingile ukunakila Lesa ukuchila muntu.

³⁰ Lesa wafikolwe fyesu abushishe Yesu kubafwa, uyo mwayipeye pakumusamika pamutashi.

³¹ Nomba Lesa alimuchinshika nokumubika kukuboko kwakwe ukwamulyo. Amuchitile ukuba Intungulushi no Mupulushi ukuti abena Isilaeli balapile nokunakililwa kumabifyo abo.

³² Fwebo tuli bakamboni baku mfi fintu pamo no Mupashi Wabuta uyo Lesa apela bonse abamunakila.”

³³ Bashichilye pakumfwa mfi, balikalipile ukwinekantu ichakuti balikufwaya nokwipaya abatumwa.

³⁴ Nomba umunabo umo Umufalisi uwitwa Gamalieli, umusambishi wa Mafunde akwa Mosesi uyo abantu bonse balikuchinshika, alimakene muchilye. Elo abebele ukuti bafumye abatumwa panse.

³⁵ Penkapo alichenjeshe abamuchilye ati, “Mwebo mwe bena Isilaeli bananji, muchenjele nefyo mukofwaya ukuchita kuli mba bantu.

³⁶ Muleyibukisha ukuti kwali umuntu uwalikwitwa Teyudasi! Ngu alikuyitutumuna ukuti muntu umukulu. Echo nabantu imyanda ine balimukonkele. Nomba balimwipeye, elo nabasambishi bakwe bonse balipalangene, nechilonganino chakwe kachipwa.

³⁷ Panuma kwayishile Yuda umwina Galili. Ngu ayishile ulo balikupenda abantu muchalo. Naye balimukonkele abantu abenji. Panuma naye balimwipeye. Elo abasambishi bakwe bonse balipalangene.

³⁸ Kanshi nebo pali ngu mulandu nkomweba ati mwichitapo nangu chimo kuli mba bantu. Balekeni bwaka balokuya. Pantu nga chakuti ngu mulimo wafumine kubantu chakubakanga.

³⁹ Nomba nga wafuma kuli Lesa umwine, chakumukanga ukubachimfya pantu mwakusanga ukuti mukolwishanya na Lesa umwine!” Elo ichilye chonse chalisuminishe amashiwi akwa Gamalieli.

⁴⁰ Elo bayitile abatumwa ukuti benjile mukati. Babapamine ifikoti nokubakonkobesha ukuti belokusambishapo mwishina lyaku Yesu. Panuma balibalekele.

⁴¹ Abatumwa bafumine muchilye nensansa ukwinekantu pantu bayumfwile ukuti Lesa alibasalile ukuchula pamulandu weshina lyaku Yesu.

⁴² Elo inshiku shonse abatumwa balikusambisha nokushimika Ubutumi Bwawama munanda yaku Lesa namumananda yabantu ukuti Yesu e Wasubwa waku Lesa.