Imilimo ya batumwa 4 - Chipangano Chabwangu

Batwala Petulo na Yohane kuchilye cha Bayuda

¹ Ulo Petulo na Yohane balikusosa nabantu, kwayishile bachipupila nomukulu wabakulinda kunanda yaku Lesa na Basaduki.

² Mba bantu balikalipile pantu Petulo na Yohane balikusambisha abantu ukuti Yesu alibuka kubafwa. Ekwebati abafwa bonse bakubuka.

³ Echo balibekete nokubaposa muchifungo ukufikila uluchelo pantu chali ichungulo.

⁴ Nomba abantu abenji abaumfwile nokuchetekela amashiwi akwa Petulo na Yohane, impendwa yabalalume abachetekele yali kubati makana asano.

⁵ Muluchelo abakulu ba Bayuda, bachilolo nabasambishi ba Mafunde akwa Mosesi balongene mu Yelusalemu.

⁶ Kwalipo na Anasi chipupila mukulu, Kayafasi, Yohane na Alekisanda nabonse abamulupwa lwakwa bachipupila mukulu.

⁷ Batekele abatumwa kuntanshi yabo. Batatikile ukubafumba ati, “Kanshi mwachitile shani mfi? Nikufiso fyaku nani nangula lishina lyaku nani mwabomfweshe?”

⁸ Elo Petulo, uwayiwile no Mupashi Wabuta, abasukile ati, “Mwe ntungulushi nabafilolo,

⁹ kati tukolubulula pamulandu wamulimo uwawama uwachitwa kumuntu ngu uwali chite nefyo apolele!

¹⁰ Mwebo bonse mwishibe pamo nabena Isilaeli ukuti ngu umwalalume uwimakene mpano alipolele pamulandu wafiso fyaku Yesu Klistu uwaku Nasaleti. Enka ngulya mwasamike pamutashi, kuntu Lesa alimubushishe kubafwa.

¹¹ Ngu Yesu eye chalembelwapo ukuti, ‘Ilibwe ndilya mwe bakwimaka mwasulile, elyayishile kuba lyapachimfuntu!’

¹² Ukupuluka kusangwa muli Ye epela pantu takupo ishina limbi panonshi Lesa apela kubantu ilyo twingapulukilamo.”

¹³ Ulo abachilye babwene ukupama kwakwa Petulo na Yohane, balishimbilwe ukwinekantu. Nakambi baumfwile ukuti mba bali bantu bwaka abatasambililapo ukwinekantu. Penkapo balishibile ukuti basambishi baku Yesu.

¹⁴ Pakuba tabakwetepo amashiwi ayafitala pantu balikubona umuntu uwapolele alimakene pamo na Yohane na Petulo.

¹⁵ Elo babebele ukuti bafumine panse. Kunuma abachilye batatikile ukufumbashanya

¹⁶ ati, “Mba bantu tubachite shani? Abantu bonse muno Yelusalemu balishibile ichakushimbwisha icho bachitile. Elo nafwebo tekuti tukanepo iyowo!

¹⁷ Pakuti umulandu wilundulukilako kubantu bonse, nomba katubatinye bwaka ukwebati belokusosapo mwishina lyaku Yesu kumuntu onse.”

¹⁸ Elo babetile muchilye nokubakonkobesha ati, “Tekweshapo nakambi ukulumbula nangula ukusambisha mwishina lyaku Yesu.”

¹⁹ Nomba Petulo na Yohane baasukile abamuchilye ati, “Pinguleni mwebene ichilungeme pamenso aku Lesa, napo nimwe tuli nokumfwila, nangula ni Lesa?

²⁰ Fwebo tekuti tulekepo ukushimikila ifintu ifyo twayibwenene nokuyumfwila.”

²¹ Nomba abachilye balibweleshepo ukubatinya ukuti belokuchitapo mfi. Penkapo balibalekele, pakuba tabasangilepo umulandu uwakubapela pantu abantu bonse balikutondayisha Lesa pachakushimbwisha icho bachitile.

²² Nomuntu ngulya uwapolele munshila nji achilile napamyaka amakumi ane iyakufyalwa.

Ukulomba kwabena Klistu

²³ Ulo ichilye chabalekele, Petulo na Yohane babwelele kubanabo nokuya beba fyonse ifyo intungulushi shabachipupila nabachilolo basosele.

²⁴ Abanabo pakumfwa mfi, balombele kuli Lesa ati, “Mwe Bashikulu, mwe babumbile umulu nechalo, bemba nafyonse ifyabamo.

²⁵ Ukupitila mu Mupashi Wabuta nimwe mwasosele kuli Davide umupyungi wenu ulo asosele ati, ‘Chindo icho abenafyalo bakalipile, mulandu ndo abantu balikupekanya ifyabwaka?

²⁶ Imfumu shapano chalo shayipekanya, intungulushi shakumana pamo, bakopingila Bashikulu no Wasubwa wabo.’

²⁷ Nachine Helodi na Pontiyasi Pilato bakumene muno mwenka mumushi pamo nabenafyalo nabena Isilaeli. Balikupinga ukulwisha Yesu Umupyungi wenu Uwabuta uyo Wasubilwe.

²⁸ Bakumene ukuchita ifyo webo wapangile kale ukupitila mufiso nobufwayo bwako ukuti fichitike.

²⁹ Nomba mwe Bashikulu boneni ifyo bakotutinya! Twafwilisheniko fwe bapyungi benu ukuti tusose amashiwi enu ukwambula ukutina.

³⁰ Tambululeni ukuboko kwenu ukuti muposhe abantu nakambi mulenge ukuti ifiso fwenu ifikulu fiboneke mwishina lyaku Yesu Umupyungi wenu Uwabuta.”

³¹ Ati bapwe ukulomba, pachifulo apo balongene patatikile ukutenta. Elo bonse bayiwile no Mupashi Wabuta, batatika nokusosa amashiwi aku Lesa ukwambula ukutina.

Ifyo abena Klistu baakene ububoni bwabo

³² Ibumba lyabantu abachetekele muli Klistu lyalikuchita ifintu munshila imo nomutima umo. Tapalipo nowakweba ati, “Ububoni mbu bwanji nenka” iyowo. Nomba ifyo umuntu nomuntu akwete fyali fyabonse pamo.

³³ Abatumwa balikupela bukamboni nefiso ubwakuti Bashikulu Yesu balibukile kubafwa nakambi Lesa alikubashukisha bonse.

³⁴ Kanshi takwalipo muli bo umuntu nangu umo uwalikuchulila akantu. Bonse abakwete amabala nangula amananda balikuyashitisha, nendalama ishalikubonekamo,

³⁵ balikuleta kubatumwa. Nabo balikwakanya bonse ukulingana nokuchula kwamuntu.

³⁶ Elo kwalipo nomuntu umo uwalikwitwa Yosefe, umwina Lefi, uwafyalilwe muchalo cha Saipulasi, uwo abatumwa balikwita Banabasi, (ilikoyalula “Umuntu Uchinchisha.”)

³⁷ Ngu Banabasi alikwete ibala, alishitishe, nendalama ishabonekelemo ashiletele kubatumwa.