Imilimo ya batumwa 3 - Chipangano Chabwangu

Petulo aposha ichite

¹ Akasuba kamo Petulo na Yohane bayile kunanda yaku Lesa mukulomba kwachungulo-kasuba.

² Mpalya pamulyango wananda yaku Lesa uwalikwitwa ati, “Umulyango Uuweme” payikele umwalalume uwalemana amolu ukutula kubwayiche bwakwe. Inshiku shonse balikumubika pamulyango mpalya ukuti alokupula ifintu kubantu bakoyinjila munanda yaku Lesa.

³ Ulo abwene ukuti Petulo na Yohane bakofwaya ukwinjila munanda yaku Lesa, alibalombele ichabupe.

⁴ Petulo na Yohane bamutontele amenso. Elo Petulo asosele kuli ye ati, “Tuloleshe!”

⁵ Naye alibaloleshe mumutima akoti, “Bakompelapo chimo.”

⁶ Elo Petulo amwebele ati, “Indalama nebo nshikwetepo, kuntu nkokupela icho nkwete: Mwishina lyaku Yesu Klistu waku Nasaleti nkoti ima wende!”

⁷ Penkapo Petulo amwikete kukuboko kwamulyo, nokumwimya kamwimya. Bwangu-bwangu amakasa notuboboto twakwe fyalikosele.

⁸ Elo alichilukile nokwimakana, atatikile nokwenda-enda. Panuma ayinjile nabo, ba Petulo na Yohane, munanda yaku Lesa uku akochiluka nokutondayisha Lesa.

⁹ Abantu bonse bamubwene akoyenda nokutondayisha Lesa.

¹⁰ Ulo bamwishibe ati ekapula ngulya uwalikwikala pa Mulyango Uuweme balishimbilwe ukwinekantu kuli mfilya ifyachitikile kuchite.

Amashiwi yakwa Petulo munanda yaku Lesa

¹¹ Ulo ngu muntu ayikatishe Petulo na Yohane, abantu bonse balishimbilwe ukwinekantu nokwengulukila uko bali mulukolo balikwita ati, “Lukolo lwakwa Solomoni.”

¹² Ulo Petulo abwene abantu mba, asosele kuli bo ati, “Mwe bena Isilaeli bananji, chindo icho mukoshimbwa pali nchi? Mulandu ndo mukotulolesesha mfi kubati nikufiso nangula nikukuwamya kwesu uko twatala ngu muntu ukuti alokwenda?

¹³ Mukuchita mfi Lesa waku Abulahamu, Isake na Yakobe, Lesa wafikolwe fyesu, ewachindamika umupyungi wakwe Yesu. Mwebo mwalimuposele kufipondo fyakwe. Elo mwalimukene napa menso yakwa Pilato panshita Pilato alikufwaya ukumukakula.

¹⁴ Yesu ali uwabuta nakambi uwalungama, kuntu mwebo mwalimukene. Mwalombele Pilato ukuti amukakwile ichipondo.

¹⁵ Echo mwayipeye umwine wabumi, kuntu Lesa amubushishe kubafwa. Elo fwebo tuli bakamboni pali ngu mulandu.

¹⁶ Kanshi ngu muntu mukobona nokwishiba, achetekela mwishina lyaku Yesu. Elo ishina ndi elyamuposha. Nachine chichetekelo muli Yesu ichalenga ukuti ngu muntu apole.

¹⁷ “Mwe bawesu ndishibile ukuti mwebo nentungulushi shenu pamo mwachitile mfi kuli Yesu mukuteshiba.

¹⁸ Ukuba enshila nji iyo Lesa apekenye ukufikilisha ifyo asosele ukupitila mubasoseshi bonse ukuti Klistu wakwe alinokuchula.

¹⁹ Kanshi nomba lapileni, mwalukile kuli Lesa ukuti afute amabifyo enu. Elo Lesa akumupa ifiso fyabwangu inshita nenshita.

²⁰ Elo Lesa akutuma Uwasubwa uli ni Yesu uyo asala pamulandu wenu.

²¹ Yesu ngu akwikala mumulu ukufikila ulo Lesa akupanga ifintu fyonse ukuba ifyabwangu ukubati nimulya asosele kale ukupitila mubasoseshi bakwe ababuta.

²² Echo Mosesi naye asosele ati, ‘Bashikulu, Lesa wenu, bakumutumina umo pali mwebo ukuti abe umusoseshi ukubati nine. Mukamumfwile kuli fyonse akusosa.

²³ Umuntu onse utakomfwe kufyo akusosa bakumufumya pabantu baku Lesa nokumulofya.’

²⁴ Nachine nabasoseshi bambi, ukutatika kuli Samwele nabamukonkelepo, balikushimikila ifyanduno.

²⁵ Pakuti ifilayo fyonse Lesa asosele ukupitila mubasoseshi fyakumwebo. Echo mwebo muli abachipangano nchi icho Lesa apangile nefikolwe fyenu ukubati nimfilya Lesa asosele kuli Abulahamu ati, ‘Ukupitila mumukowa obe nakushukisha abantu bonse abapanonshi.’

²⁶ Mfi nomba Lesa abushishe Umupyungi wakwe, amutumine kuli mwebo ukuti amushukishe ukupitila mukwalula onse muli mwebo ukufuma kumabifyo akwe.”