Imilimo ya batumwa 2 - Chipangano Chabwangu

Ukwisa kwa Mupashi Wabuta

¹ Ulo akasuba ka Pentekosite kafikile, abachetekela bonse balongene muchifulo chimo.

² Bwangu-bwangu kwaumfwikile ichiunda ichikulu ukufuma kumulu ichali ukubati chipupu nokwiula inanda yonse umo bayikele.

³ Penkapo babwene ukubati nindimi shamulilo shayikele pali umo-umo waku bo.

⁴ Elo bonse bayiwile no Mupashi Wabuta. Batatikile nokusosa mundimi ishapusana-pusana kubati ifyo Mupashi afwayile ukuti balokusoselamo.

⁵ Nomba mu Yelusalemu mwalipo Abayuda abalikuchinshika Lesa abafumine mufyalo fyonse ifyapusana-pusana.

⁶ Ulo baumfwile nchi chiunda, abantu abenji balongene pamo. Bonse balishimbilwe pakuti umo-umo waku bo alyumfwile ifyo abatumwa balikusosa mundimi shabo.

⁷ Mba bantu balishimbilwe ukwinekantu. Elo basosele ati, “Ala! Napo mba bonse abakososa mfi tebena Galilipo?

⁸ Nga kanshi chaba shani fwebo umo-umo tukobomfwila mundimi isho twafyalilwamo?

⁹ Fwe bafuma kuchalo cha Palitiya, Mediya naku Elamu. Fwe baku Mesopotamiya, Pontusi naku Asiya.

¹⁰ Bambi bafuma ku Fulusiya na Pamfiliya, Ijipiti namumipoka yachalo cha Libiya mupepi na Sayilini. Elo fwebo bambi tuli beni bafuma ku Loma.

¹¹ Kwalipo Abayuda nabenafyalo abaalukile nokukonka ifya Chiyuda. Fwebo bambi tufuma ku Kileti naku Alabiya. Nangu chibe mfi, bonse tukobomfwa bakososa mundimi shesu. Bakososa ifintu ifikulu ifyo Lesa achitile!”

¹² Nomba bonse balishimbilwe nokupelwa amano. Elo balikubushanya bati, “Ngechi chintu chikoyalule ndo?”

¹³ Nomba bambi batatikile ukubakweluluka abatumwa bati, “Hehe! Mba bantu bakolelwe bwaka ubwalwa.”

Petulo asambisha abantu

¹⁴ Elo Petulo ayimakene pamo nabatumwa banakwe ikumi naumo, ayimisha neshiwi nokusosa ati, “Mwebo mwe Bayuda bananji, namwebo bonse abekala mu Yelusalemu, umfwikisheni ngu mulandu.

¹⁵ Mba bantu tabakolelwepo ubwalwa iyowo, ukubati ifyo mukolanguluka, nakambi ino ninshita ya 9 koloko waluchelo bwaka.

¹⁶ Nomba nchi ichibonekele nincho ichaebelwe nomusoseshi Yoele ati,

¹⁷ ‘Lesa asosele ati, munshiku shakulekelesha, nakubapela Mupashi wanji. Elo abana benu abalalume nabanakashi bakubilisha amashiwi anji. Abalumbwana bali kubona ifibonwa, nabakote benu balikulota ifyoshi.

¹⁸ Ina, nakwitulwila Umupashi wanji pabapyungi banji, abalalume nabanakashi munshiku isho. Elo bakubilisha amashiwi anji.

¹⁹ Nakuchita ifyakushimbwisha mumulu nefipapwisho pano chalo. Kwakuba umulopa, umulilo nokufutuma kwachushi.

²⁰ Akasuba kakufita fititi, umweshi wakusweta chee kubati mulopa ulo butalafika ubushiku ubwachinshikwa Bashikulu,

²¹ Nomba abantu bonse abalikwita peshina lyaku Bashikulu, ebakwisa kupuluka.’

²² “Mwe bena Isilaeli bananji, umfweni amashiwi anji. Yesu waku Nasaleti ali muntu uwo Lesa abweneshe ukuti eye asala. Nchi achibweneshe ukupitila mufiso ifikulu ifyakushimbwisha nefishibilo ifyo Lesa achitile muli Ye. Nokwishiba mwebene mwalishiba pantu fyalikuchitika pali mwebo.

²³ Elo Lesa, mumapange akwe aapingwile kale ukuti Yesu akuposwa muminwe yenu. Nachine mwalimwipeye pakusuminisha abantu ababi ukuti bamusamike pamutashi.

²⁴ Nomba Lesa alimubusha nokumupulusha kubukali bwamfwa pantu chalikangile ukuti imfwa imuchimfye.

²⁵ Pakuba eye Davide asoselepo ati, ‘Nabwene Bashikulu bali pamenso anji, lonse bali mupepi nandibo ukuti nikachula.

²⁶ Emulandu wine umutima wanji ukosekelela, namashiwi anji aakwanga. Ina, nangu naba mwina-kufwa, nakutusha nokulindila muchichetekelo.

²⁷ Pantu mwebo tamwakanshepo kumanda, nachine tamwakaleke Uwabuta wenu ukubola.

²⁸ Mwanangilile inshila ishitwala kubumi, elo mulanenga ukusangalala pakuti muli mupepi nane.’

²⁹ “Mwe bawesu, nkofwaya ukumweba bwino-bwino pamulandu wachikolwe chesu imfumu Davide. Ena alifwa nokushikwa, nemanda yakwe tuli nayo nalelo.

³⁰ Davide ali musoseshi. Elo alishibile ukuti Lesa alimulayile pakulapa ukwebatipabana bakwe akutekapo umo pabufumu kubati nimfilya Davide aali.

³¹ Ulo Davide abwene ifyo Lesa akwisa kuchita kuntanshi, asosele ifyakubuka kwakubafwa kwaku Wasubwa waku Lesa ati, ‘Lesa tamulekeleshe munanda, nomubili wakwe tawabolelepo iyowo!’

³² Lesa abushishe Yesu ngu kubafwa, nafwebo bonse tuli bakamboni pali nchi.

³³ Elo Yesu alisumbwilwe nokwikala kukulyo ukwaku Lesa Wishi. Apokelele kuli Ye Umupashi Wabuta kubati nimfilya amulayile. Kanshi mfi mukobona nokumfwa bupe ubo Yesu apungwila pali fwe.

³⁴ Nomba Pantu Davide umwine takwelelepo kumulu iyowo, kuntu alisosele ati, ‘Bashikulu Lesa basosele kuli Bashikulu banji, Ikala kumulyo kwanji,

³⁵ mbale mpilibule tupondo tobe, tube ichakunyantapo amakasa obe.’

³⁶ “Kanshi mwe bena Isilaeli bonse mwishibe nchi ichakuti ngu Yesu uwo mwebo mwasamikile pamutashi, eye Lesa achita Imfumu no Wasubwa!”

³⁷ Pakumfwa mfi, abantu chabekete kumitima. Bafumbile Petulo nabatumwa banakwe ati, “Mwe bawesu, kanshi kuti twachita shani fwebo?”

³⁸ Elo Petulo abebele ati, “Lapileni nokubatishiwa bonse mwishina lyaku Yesu Klistu ukuti munakililwe kumabifyo enu. Elo mwakupokelela Umupashi Wabuta, ubupe bwaku Lesa.”

³⁹ Pakuba nimwe Lesa alayile pamo nabana benu, nabantu bonse ababa ukutali naabo Lesa akwita.

⁴⁰ Petulo asosele amashiwi ayenji nokubachenjesha ati, “Ipulusheni kukukandwa ukukoyishila nji nkulo.”

⁴¹ Echo abenji balyumfwile nokuchetekela amashiwi akwa Petulo, elo balibatishiwe penka pakasuba nkalya. Kubati amakana atatu ebalundilweko kubantu abachetekela.

⁴² Abachetekela mba balikukumana inshita shonse ukuti bomfwe ifyo abatumwa balikusambisha. Balikwikala mubwana-nkashi, balikulya nokulombela pamo.

Ukwikala kwabena Klistu

⁴³ Abatumwa balikuchita ifyafiso ifikulu nefyakushimbwisha ifinji ifyalikupapusha abantu bonse.

⁴⁴ Bonse abachetekela balikwikala pamo mubwana-nkashi nokwakana ububoni bakwete pakati kabo.

⁴⁵ Balikushitisha ububoni bwabo nafyonse ifyo bakwete, elo indalama isho balikusangamo balikwakanya kuli bonse ukulingana nefyo chila muntu alikukabila.

⁴⁶ Chila kasuba balikukumana pamo munanda yaku Lesa nomutima umo. Elo balikupokelela umulalilo mumananda yabo nokulya ifyakulya nemitima yansansa nokuyichefya.

⁴⁷ Balikutotela Lesa nokusangulusha abantu bonse. Elo inshiku shonse Bashikulu balikubalundilako nabambi abakupuluka.