Imilimo ya batumwa 18 - Chipangano Chabwangu

Ifyo Paulo achitile mu Kolinto

¹ Panuma Paulo afumine ku Atene nokuya ku Kolinto.

² Nkulya ayile kusangako Muyuda umo, uwalikwitwa Akwila, uwafyalilwe mumushi wa Pontusi. Ngu muntu nomukashi wakwe Pulisila bafumine kuchalo cha Itali, pantu kateka mukulu Kilodiyasi atamfishe Abayuda bonse mumushi wa Loma. Elo Paulo alile mukubabona.

³ Alikele nokubomba nabo pantu ali uwakupikula amatenti kubati nibo.

⁴ Elo pe Sabata ne Sabata, Paulo alikushimikila Bayuda na Bagiliki munanda yakulombelamo Lesa Ubutumi Bwawama.

⁵ Ulo Sailasi na Timoti bafikile ukufuma ku Masedoniya, Paulo aposele inshita iikulu ukubilisha, ukulanga Abayuda ukuti Yesu Ewasubwa waku Lesa.

⁶ Ulo balikutalikana nokusosa ifibi pali ye, Paulo alangile ukutomfwana nabo ukupitila mukubakuntila ulukungu ukufuma kufyakufwala fyakwe nokuti, “Ala, mwayipaya mwebo mwenka! Nebo nshikwetepo umulandu iyowo. Ukutula nomba nakushimikila abenafyalo.”

⁷ Elo abashile nokuya kunanda yamwalalume umo uwalikulomba Lesa uwalikwitwa Titiyasi Yusitasi. Inanda yakwe yali apepi nenanda yakulombelamo Lesa.

⁸ Elo umwalalume uwalikwitwa Kilisipasi, umukulu wananda yakulombelamo Lesa, naye alichetekele muli Bashikulu pamo nabamunanda yakwe bonse. Ulo abena Kolinto abenji baumfwile ukusambisha kwakwa Paulo, balichetekele nabenji balibatishiwe.

⁹ Ubushiku bumo Bashikulu bayishile kuli Paulo muchibonwa nokumweba ati, “Wilokutinapo, twalilila bwaka ukusambisha. Wilekapo iyowo

¹⁰ pantu nebo ndinobe. Takupo umuntu nangu umo uwakukuchena. Ndikwetemo abantu abenji ukwinekantu muli ngu mushi.”

¹¹ Emfyo Paulo ayikele nabo umwaka umo nemyeshi isano na umo, alikusambisha Amashiwi aku Lesa.

Paulo kuchilye chakwa Galiyo

¹² Ulo Galiyo abikilwe pali bukateka bwachalo cha Akaya, Abayuda balilongene nokumfwana. Elo bayikete Paulo, nokumutwala kuchilye.

¹³ Balikumubepesha bati, “Ngu muntu ali nomulandu wakupatikisha abantu ukulomba Lesa mukafuto akapusana namafunde esu!”

¹⁴ Ulo Paulo afwayile ukutatika ukusosa, Galiyo aebele Abayuda ati, “Umfweni mwe Bayuda, nga chakuti umuntu ngu atoba ifunde nangu ukubifisha umunakwe, nga naumfwa ukwilishanya kwenu.

¹⁵ Nomba pantu mukotalikana bwaka pamashiwi namashina, nangula namafunde yakumwenu, kuti mwaumfwana mwenka. Nebo tanshifwayapo ukuba kapingula pafintu fyaba nga mfi.”

¹⁶ Elo abatamfishe panse yachilye.

¹⁷ Bwangu-bwangu bonse batatamwine umwalalume uwalikwitwa Sositenesi, umukulu wananda yakulombelamo Lesa, nokumupamina penka pachilye. Nomba Galiyo tasakamenepo pali nchi nangu panini.

Paulo abwelela ku Antiyoki

¹⁸ Paulo ayikele inshiku ishinji ku Kolinto pamo nabachetekela. Ukufuma apo apateme mubwato ubwalikuya ku chalo cha Siliya pamo na Pulisila na Akwila. Ulo ali kumushi wa Senkileye atalapatama mubwato, Paulo abeyele umutwi wakwe pamulandu wachilapisho apangile.

¹⁹ Ulo bafikile kumushi wa Efeso, Paulo ashile Pulisila na Akwila. Ye ayinjile munanda yakulombelamo Lesa, nokusosa na Bayuda.

²⁰ Nabo bamupapatile ukuti ekale nabo inshita iitali, kuntu alikene.

²¹ Ulo alikubalaya, abebele bwaka ati, “Nakubwela nakambi kuli mwebo nga kufwaya kwaku Lesa.” Elo afumineko ku Efeso mubwato.

²² Ulo afikile kumushi uwalikwitwa Siseliya, ayile ku Yelusalemu nokubaposha umutende abena Klistu. Panuma ayile ku Antiyoki.

²³ Ulo ayikeleko inshita inini, nakambi alifumineko nokuya kuchalo cha Galatiya naku Fuligiya, ali mukukoselesha abachetekela bonse.

Imilimo yakwa Apolosi mu Efeso namu Kolinto

²⁴ Umuyuda umo uwalikwitwa Apolosi, uwafyalilwe mumushi wa Alekisandiliya, ayile ku Efeso. Ngu ali uwachenjela mukusosa, nakambi uwayishibisha ukwinekantu Amalembo aku Lesa.

²⁵ Ali uwasambilila munshila ya Bashikulu. Echo alikusambisha nomulangwe ifyaku Wasubwa waku Lesa bwino-bwino. Nomba ayishibile bwaka ulubatisho lwakwa Yohane.

²⁶ Atatikile ukusosa nefiso munanda yakulombelamo Lesa. Ulo Pulisila na Akwila baumfwile, bamupintile kunanda yabo, nokumulondolwela bwino-bwino Inshila yaku Lesa.

²⁷ Ulo Apolosi alikufwaya ukuya kuchalo cha Akeya, abachetekela bamu Efeso balembele kalata kubena Klistu baku Akeya ukuti bamupokelele bwino. Ulo afikile nkulya, alyafwilisheko abachetekela ukupitila mubwanshi bwaku Lesa.

²⁸ Apolosi achimfishe Abayuda mukutalikishanya kwapalwalala. Alikubalanga ukufuma Mumalembo aku Lesa ukuti Yesu e Wasubwa waku Lesa.