Imilimo ya batumwa 16 - Chipangano Chabwangu

Timoti baya na Paulo na Sailasi

¹ Nomba Paulo ayile kumushi wa Debe na Lisitula. Uko kwalikwikala uwachetekela umo uwalikwitwa Timoti. Banyina bali Bayuda abachetekela muli Klistu, kuntu bawishi Timoti bali Bagiliki.

² Bonse abachetekela Klistu abalikwikala ku Lisitula naku Ikoniyamu balikusosa ukuti Timoti muntu uuweme.

³ Elo Paulo afwayile ukuya nakwe Timoti pabulwendo. Echo alimushilimwine pantu bonse Abayuda abalikwikala mufifulo mfi balishibile ukwebati bawishi Timoti Bagiliki.

⁴ Ulo balikupitana mumishi, balikusambisha abantu amafunde awo abatumwa nabakulu bamu Yelusalemu baumfwene. Elo balikubakoselesha nokubakonkobesha ukuti balokulama amafunde.

⁵ Echo abamufilonganino mfi bakosele muchichetekelo, nakambi balikulundwapo mumpendwa inshiku shonse.

Paulo bamwita ku Makedoniya

⁶ Elo bapitile muchalo cha Fuligiya namu Galatiya pantu Umupashi Wabuta tawabasuminishepo ukubilisha Ubutumi Bwawama muchalo cha Asiya.

⁷ Ulo bafikile kumupaka wa Misiya, balikufwaya ukuya muchalo cha Bitiniya, kuntu Umupashi waku Yesu tawabasuminishepo.

⁸ Elo bapitile muchalo cha Misiya nokuyafika kumushi wa Tulowasi.

⁹ Muli mbulya bushiku Paulo abwene muchibonwa umwina Masedoniya umo alimakene nokumupapata ati, “Mwabukile nkuno kuchalo cha Masedoniya, mwise mutwafweko!”

¹⁰ Ulo Paulo abwene bwaka ichibonwa nchi, twalipekenye nokuya pabulwendo ku Masedoniya. Twalishibile ukuti ni Lesa uwatwita mukubilisha Ubutumi Bwawama nakuli mbalya bantu.

Lidiya achetekela muli Klistu

¹¹ Ulo twafumine ku Tulowasi, twapateme mubwato nokuya ku Samatulasi. Ulo bwayishile kucha twayile ku Neyapolisi.

¹² Ukufuma nkulya twayile ku Filipi, umushi uukulu kuchiputulwa chimo chaku Masedoniya. Umushi ngu walikutekwa nabena Loma. Elo twalikeleko inshiku ishinji.

¹³ Pakasuba ke Sabata twafumine kunse yamushi nokuya kuunika uko twalikulanguluka ukuti kwalibapo ichifulo uko Abayuda balonganina mukulomba. Twalikele nokusoshanya nabanakashi abalongene nkulya.

¹⁴ Umo waku bo abalikutumfwa ali ni Lidiya uwaku Tiyatila. Alikushitisha insalu ishaswetuluka. Ngu mwanakashi alikulomba Lesa. Elo Bashikulu bayiswile umutima wakwe ukuti omfwikishe ifyali kusosa Paulo.

¹⁵ Elo Lidiya nolupwa lwakwe balibatishiwe. Panuma asosele kuli fwebo ati, “Kati mwashininkisha ukuti nandibo nkochetekela muli Bashikulu, tulokuya mwikale kumwesu.” Elo twayile nakwe kumwakwe.

Baposa Paulo na Sailasi muchifungo

¹⁶ Akasuba kamo ulo twalikuya mukulomba twakumene nomwanansungu umusha, uwawililwe nomupashi uubi. Mupashi ngu wapele ifiso ifyakusosa ifyakuchitika kuntanshi. Munshila nji alikubasangilamo indalama ishinji ishakumbalya abali kumusunga.

¹⁷ Umwanansungu ngu akonkele Paulo nafwebo uku akobilikisha ati, “Nachine mba balalume bapyungi baku Lesa Mukulu Kateka wamyulu yonse. Bakobilisha amashiwi kuli mwebo ayakumulanga ifyo mwakupuluka!”

¹⁸ Alikuchita mfi panshiku ishinji kufikila ulo Paulo chamukalipile. Elo aalyalukile nokweba umupashi uubi ati, “Mwishina lyaku Yesu Klistu, nakweba ati ufume mumwanansungu ngu!” Penkapo umupashi uubi walifuminemo muli ye.

¹⁹ Elo abali kumusunga babwene ukuti inshila yakubwenamo indalama yashila, bayikete Paulo na Sailasi nokubatwala kuchilye chapalwalala.

²⁰ Babaletele kubapingushi nokusosa ati, “Abalalume mba Bayuda. Nomba bakoleta ichimfulunganya mumushi wesu.

²¹ Bakosambisha utufuto utushilingene namafunde esu. Fwebo abena Loma tekuti tukonkepo mfi iyowo!”

²² Elo ibumba lyabantu lyaponene pali Paulo na Sailasi. Elo abakulu bachilye balepawile ifyakufwala fyakwa Paulo na Sailasi. Panuma bapingwile ukuti babapame ifikoti.

²³ Ulo bashilile ukubapama, babaposele muchifungo nokukonkobesha malonda wachifungo ukuti abalame ukwinekantu.

²⁴ Elo malonda ayinjishe Paulo na Sailasi kuchiputulwa chakukati nokukaka amolu abo kufiti fibili ifilemene.

²⁵ Elo pakati kabushiku, Paulo na Sailasi balikulomba nokwiimba inyimbo shaku Lesa, nabafungwa banabo balikumfwako.

²⁶ Bwangu-bwangu ichikukuma chalishile, nokusunkanya ichifungo ukufika namumufula wayiko. Echo ifiibi ifyakuchifungo fyalisukile neminyololo kayilukutila panshi ukufuma kubafungwa.

²⁷ Ulo malonda wachifungo ashibukile, abwene imilyango yachifungo yonse ilisukile. Elo alangulukile ukuti abafungwa bonse balibutukile. Elo abulile umwele ukuti ayipaye.

²⁸ Nomba Paulo ayawile neshiwi ilikulu ati, “Leka wiyipayapo, bonse epotuli!”

²⁹ Naye malonda ayitile abakuleta umwenje. Bwangu-bwangu ayinjile mukati nokuwila pamakasa akwa Paulo na Sailasi.

³⁰ Panuma abafumishe panse nokubafumba ati, “Bawesu, chindo nakuchita ukuti nkapuluke?”

³¹ Nabo bamwasukile bati, “Chetekela muli Bashikulu Yesu, elo wakupuluka, webo nabamunanda yobe bonse.”

³² Elo bashimikile Amashiwi aku Bashikulu kuli ye nabamunanda yakwe bonse.

³³ Mubushiku bwenka mbu, malonda wachifungo alibatwele ukubasamba ifibenga fyabo. Penka mpalya, ye nabamunanda yakwe bonse balibatishiwe.

³⁴ Panuma malonda atwite Paulo na Sailasi kunanda yakwe nokubapela ifyakulya. Elo ena pamo nabamunanda yakwe basekelele ukwinekantu pantu nomba balichetekela muli Lesa.

³⁵ Ulo bwachele, abapingushi batumine abashilikali kuli malonda bati, “Bakakule, elo ubaleke balokuya.”

³⁶ Malonda alifishishe nga mashiwi kuli Paulo nokuti, “Abapingushi bati mukakule elo mulokuya. Kanshi nomba fumeni mulokuya mwende umutende.”

³⁷ Nomba Paulo asosele ati, “Batupamine ukwambula umulandu pachinso chabantu nangu fwe tuli bena Loma! Ukufuma apo, batuposele muchifungo. Nomba bakofwaya ukutufumya mubufinsolo! Iyowo bamfumu, tefyopo! Balingile ukwisa abapingushi benka mukutufumya.”

³⁸ Abantu mba balifishishe nga mashiwi kubapingushi. Ulo baumfwile ukuti Paulo na Sailasi bena Loma, umwenso walibekete.

³⁹ Echo balishile mukubapapata, nokubafumyamo muchifungo. Panuma balibapapata ukuti bafumemo mumushi wabo.

⁴⁰ Ulo Paulo na Sailasi bafumine muchifungo, bayile kunanda yakwa Lidiya. Eko babonanine nabachetekela. Panuma yakubakoselesha, balifumineko.