Imilimo ya batumwa 12 - Chipangano Chabwangu

Petulo afuma muchifungo

¹ Muli njilya nshita imfumu Helodi yatatikile ukuchusha bambi abamuchilonganino chabena Klistu.

² Yayipeye Yemusi, wabo waku Yohane, kumwele.

³ Ulo yabwene ukuti Abayuda batemwa, yayikete na Petulo. (Chachitikile panshita yakusefya Imifuba Iitatutumuka.)

⁴ Ulo yayikete Petulo yamuposele muchifungo. Alikulondwa namabumba yabashilikali yane ayakwete abantu bane-bane. Helodi alikufwaya ukumulubulwisha palwalala panuma yakupwa kwa Chakulya Chakuchilila.

⁵ Ulo Petulo ali muchifungo, abena Klistu bayikelefye ukumulombela kuli Lesa.

Umungelo afumya Petulo muchifungo

⁶ Nomba pakasuba kenka nkalya, Helodi alikulanguluka ukulubulwisha Petulo palwalala, Petulo alele pakati kabashilikali abalikumulinda babili. Akakilwe minyololo ibili, napamulyango wachifungo pali nabalikulinda ichifungo.

⁷ Bwangu-bwangu kwafikile umungelo waku Bashikulu. Elo ukusanika ukukulu kwabutishe muchifungo. Elo asunkenye Petulo pamabeya nokumubusha mutulo. Elo asosele ati, “Ima bwangu!” Penkapo iminyololo akakilwe kumaboko yaponene napanshi ukufuma kuli ye.

⁸ Umungelo aebele Petulo ati, “Kaka ilamba lyobe, ufwale nenkwanda shobe.” Petulo achitile fyenka mfyo. Elo umungelo amwebele ati, “Fwala nekoti lyobe, elo unkonke.”

⁹ Petulo alimukonkele ukufuma muchifungo. Nomba ye tayishibile ati icho umungelo akochita chachine. Alikulanguluka ati alibwene ichimonwa.

¹⁰ Elo bapitile pali bamalonda bakwamba na bachibili, bafika napamulyango wachisasa ichachela uwalola kumusumba. Ichine chenka chayisukile, elo balifumine. Baendele mumusebo panini nomungelo ashile Petulo.

¹¹ Petulo nomba akatulukile nokusosa ati, “Nomba nashininkisha ukuti Bashikulu batumine umungelo wabo, bampulusha kuminwe yakwa Helodi nakuli fyonse ifyo Abayuda balikulanguluka ukuti fyakuchitika kuli ne.”

¹² Ulo Petulo aayilwike, alungeme kunanda yakwa Maliya banyina bakwa Yohane Maliko, ukwalongene abantu abenji abali kulomba.

¹³ Petulo akunkutile pachibi nomwanansungu umo umupyungi uwali kwitwa Loda, aumfwile nokwisa kumulyango.

¹⁴ Ati eshibe ishiwi lyakwa Petulo, asekelele ukwinekantu. Elo talayisula nechiibi, abwelelemo ulubilo mukati nokuya sosa ati, “Petulo ali panse pamulyango!”

¹⁵ Nabo bamwebele bati, “Napo wafunta!” Umwanansungu ena akonkobeshefye ukuti chali ichachine. Elo nabo basosele ati, “Nalimo mungelo wakwe.”

¹⁶ Petulo abikilepo bwaka ukukunkunta. Ulo bayiswileko ichiibi, balimubwene, elo bashimbilwe nokushimbwa.

¹⁷ Elo Petulo abachebwishe nokuboko kwakwe ukuti batalale. Panuma abashimikile umo Bashikulu bamufumishe muchifungo. Nakambi asosele ati, “Mwebeko Yemusi nabena Klistu banesu.” Elo afuminepo aya nakumbi.

¹⁸ Ulo bwachele, abashilikali balisakamene ukwinekantu. Elo basosele ati, “Nga kanshi Petulo alikwisa?”

¹⁹ Ulo aumfwile, Helodi alibebele ukuti bamufwaye, kuntu tabamusangilepo iyowo. Kanshi epakulubulwisha abali kumulonda, apingwile ukuti babepaye. Panuma Helodi afumine mu Yudeya, ayile naku Kayisaleya mukwikala.

Helodi afwa

²⁰ Nomba Helodi akalipile abena Tule nabena Sidoni. Nabo batumine ibumba ukuti babonane na Helodi. Pantu ichalo chabo chalikusanga ichakulya ukufuma kuchalo chakwa Helodi. Babalile ukunasha Bulasitasi umukulu wakwisano. Panuma bayile kuli Helodi ukumupapata ukuti kube umutende pakati kabo.

²¹ Pakasuba kamo ako bapekenye, Helodi afwele insalu shakwe ishabufumu, ayisa kwikala napachipuna chakwe ichabufumu atatika nokusosa kubantu mbalya.

²² Abantu nabo balikwaula utupundu bati, “Ni lesa eukososa, temuntupo iyowo!”

²³ Penkapo umungelo waku Bashikulu alikomene Helodi pantu tapele umuchinshi kuli Lesa. Yalimulile imilomwa nokufwa kafwa.

²⁴ Nomba amashiwi aku Lesa alichililepo ukusalangana konse-konse.

²⁵ Banabasi na Saulo balipwishishe umulimo babatumine ukuchita. Elo bafumine ku Yelusalemu, bayile na Yohane Maliko.