Hebele 3 - Chipangano Chabwangu

Yesu alichilapo pali Mosesi

¹ Mwe bawesu, muli baku Lesa pakuti alimwita namwebo ukuba nobumi bwakumulu. Langulukeni bwino ifyaku Yesu uyo Lesa atumine ukuti abe Chipupila Mukulu uwachichetekelo nchilya twasumina.

² Ali uwachishinka kuli Lesa uyo uwamusalile ukupyunga umulimo ngu, kubati nimfilya Mosesi naye aali uwachetekela munanda yaku Lesa.

³ Umuntu awayimaka inanda alapokelela umuchinshi ukuchila pananda iyine. Echo Yesu alapelwa umuchinshi ukuchilapo uwakwa Mosesi.

⁴ Inanda yonse ilemakwa nomuntu uuli onse, kuntu Lesa ewayimaka ifintu fyonse.

⁵ Mosesi ngulya umupyungi wamunanda yaku Lesa, aali uwachishinka kubamunanda nji ukuti abe kamboni pafyo Lesa akwisa kusosa kuntanshi.

⁶ Nomba Klistu, pakuti Mwana waku Lesa, wachishinka pakutungulula abamunanda yaku Lesa bonse. Elo fwebo tuli abamunanda yakwe nga chakuti tatulekelepo ukuba abashipa nokuyitutumuna kufyo tulolela.

Ukutusha kwabantu baku Lesa

⁷ Nomba kubati nimfilya Umupashi Wabuta ukososa ati, “Lelo nduno nga mwaumfwa amashiwi aku Lesa,

⁸ mwikosapo imitima yenu, kubati ifyo chali kufikolwe fyenu, muchiswebebe.

⁹ Umo ifikolwe fyenu fyanjeseshe nangula fyalibwene ifyo nachitile mumyaka amakumi ane.

¹⁰ Pamulandu ngu nalibakalipile, nokusosa kuli bo ati, ‘Inshita shonse imitima yabo ilalubana, elo tabafwayapo ukusambilila ishila shanji.’

¹¹ Nalikalipile nokulapa ati, ‘Tabakenjilemo muchifulo chanji ichakutusha.’”

¹² Mwe bawesu muchenjele ukuti kwibapo nangu umo muli mwe uwamutima uubi uutachetekelapo uyo uwingamutalushako kuli Lesa wabumi.

¹³ Nomba mulokukoseleshanya inshiku shonse ulo kuli inshita iyo amashiwi aku Lesa asosa ati, “Lelo.” Mulokuchita mfi ukutina ukuti ububi bungachenjeleka uuli onse muli mwebo nokumulenga uwakosa umutima.

¹⁴ Echo fwebo bonse tupyungila pamo na Klistu nga twatwalilila muchichetekelo twakwete pakwamba ukufikila nakumupwilo wabumi bwesu.

¹⁵ Amalembo akososa ati, “Nga mwaumfwa lelo amashiwi aku Lesa, mwikoshapo imitima yenu, kubati nimfilya ifikolwe fyenu fyachitile.”

¹⁶ Nibani abo abaumfwile amashiwi aku Lesa nokumwalukila? Napo tembalya bonse abo Mosesi atangilile ukufuma muchalo cha Ijipiti?

¹⁷ Nakambi nibani abakalifishe Lesa umutima pamyaka amakumi ane? Napo tembalya ababifishe nokufwa.

¹⁸ Ulo alapile mubukali ati, “Tabakenjilemo muchifulo chanji ichabutusho,” nibani alikweba? Napo tembalya abamwalukile alikusosapo?

¹⁹ Echo twabona ukuti tabayinjilemo pakuti tabalikuchetekelapo iyowo.