Galatiya 6 - Chipangano Chabwangu

Afwanenipo ukupinta ifilemene

¹ Mwe bawesu, nga umo wakumwebo awila muchibi ichili chonse, mwe bakotungululwa no Mupashi Wabuta mulingile ukumubwesha. Muchite mfi nomutima wabufuke. Elo muchenjele ukwebati namwebo mwiwilamo mukweshekwa.

² Afwaneniko ifikomulemena. Nga mwachita mfi ekwebati mukolama ifunde lyaku Klistu.

³ Nga chakuti umuntu akoyilanguluka ukuba akantu, elo tapapo nefyo aba, akoyipunamika enka.

⁴ Umuntu onse ayeshe imikalile yakwe. Panuma elo ayikushe umwine, ukwambula ukupalanya kuli umbi iyowo.

⁵ Pakuti umuntu onse alingile ukupinta ichipe chakwe umwine.

⁶ Umuntu onse uusambilishiwa amashiwi aku Lesa alingile ukwakana ifintu fyonse ifiweme nangulya uukomusambisha.

⁷ Mwiyibepapo, umuntu tekuti atumpikepo Lesa iyowo. Ifyo umuntu abyala efyo akusepa.

⁸ Umuntu uubyala imbuto shabuntunse akwisa kusepa imfwa. Nangulya onse uubyala ukulingana nefyo Umupashi Wabuta ufwaya, akusepa ubumi butashila.

⁹ Echo twinakapo ukuchita ifiweme pakuti panshita iilingile twakusepa nga tatunakilepo.

¹⁰ Echo ulo tulineshuko, lekeni tuchite ifiweme kubantu bonse, ukuchilapo kuli bawesu mbalya abachetekela.

Amashiwi ayakulekeleshako

¹¹ Lolekesheni amalembo ubukulu nkolemba nomba nokuboko kwanji!

¹² Abantu bonse abakofwaya ukuboneka abaweme pamenso yabantu, bakomukakatisha ukuti mushilimunwe. Icho bafwaya chimo bwaka, ukuti bechushikwapo pamulandu wamutashi waku Klistu.

¹³ Nangu nimbalya abafwaya ukushilimunwa tabalamapo Amafunde. Bakofwaya bwaka ukuti mwebo mushilimunwe ukwebati bayitakishe pakushilimunwa kwenu.

¹⁴ Nomba nebo tekuti njitakishepo pakantu akali konse, kuntu pamutashi waku Bashikulu Yesu Klistu. Pakuti balifwa pamutashi, ifyapanonshi kuli nebo fyaba kubati filifwile kale. Elo kufyapanonshi fyenka mfi, ndi kubati wafwa.

¹⁵ Temulandupo ukushilimunwa nangu ukutashilimunwa, ichikulu chakuti umuntu asanguke uwabwangu.

¹⁶ Lesa abapele umutende nokubakwatila inkumbu bonse abakonka ukusambisha nku, ebantu bonse abaku Lesa.

¹⁷ Ukufuma nomba kwibapo umuntu uwakunchushapo, pakuti imikofu ndinayo pamubili wanji ilanga ukuti ndimusha waku Yesu.

¹⁸ Ubwanshi bwaku Bashikulu Yesu Klistu bube namwebo bawesu. Ameni.