Galatiya 5 - Chipangano Chabwangu

Ukwikatisha umutende wenu

¹ Klistu alitukakula ukwebati tube abakakuka ukufikapo. Echo imakaneni ndii ukwambula ukusuminisha ukukakwa nakambi kwijoko lyabusha.

² Umfweni, nebo ne Paulo nkomwebako ati nga mwebo mwasuminisha ukuti mushilimunwe, ekwebati Klistu takoyalulapo akantu kuli mwebo iyowo.

³ Nkobwekeshapo nakambi ati umuntu onse uwisuminisha ukushilimunwa, alingile ukulama Amafunde onse.

⁴ Mwe bonse mwe bafwaya ukulungama ku Mafunde, mwayipatula mwenka kuli Klistu, elo mwasha ubwanshi bwaku Lesa.

⁵ Nomba kuli fwebo, pakuti twalipokelela Umupashi Wabuta, tukololela ukuti Lesa akatupokelela nga abalungama ukupitila mukuchetekela.

⁶ Pakuti ulo tuli muli Klistu Yesu, ukushilimunwa nangu ukutashilimunwa takukwetepo akantu, kuntu ichikulu chakuti umuntu akwate ichichetekelo ichibomba ukupitila mukutemwa.

⁷ Mwalikubutuka bwino ulubilo mukuchimfyanya kwenu. Mba wamuleseshe ninani ukwebati mwilokumfwa ichine?

⁸ Ukuchengelekwa kwenu nku takwafuminepo kuli Lesa uyo uwamwitile.

⁹ “Ichimena ichiche bwaka chilatumpisha umufuba onse.”

¹⁰ Pakuti tuli bamo muli Bashikulu, nkochetekela ukwebati tamwapusanepo nandibo mumalangulushi. Nomba ngulya uukomufulunganya nga ninani, Lesa akumupela umulandu.

¹¹ Mwe bawesu kati nkotwalilila ukumusambisha ati tulingile ukushilimunwa, mba nindo nchili mukuchula? Amashiwi ayasosa ifyapamutashi taanganchusha nakambi iyowo nga nkotwalilila ukweba abantu ukuti bashilimunwe.

¹² Chingangwamina nga chakuti abantu mba abakomulufyanya batwalilile nokuyimulula benka ukuchilapo.

¹³ Mwe bawesu, Lesa alimwita ukuti mukwate ubwanalale. Nomba muchenjele ukuti ubwanalele bwenu mbu, bwimutwalapo kulunkumbwa ulubi ulwakuchita ifyabuntunse bwenu. Echo mupyungilane mukutemwa.

¹⁴ Pakuti Amalembo onse aku Lesa akunkanikwa mwifunde limo ilyakuti, “Ulokutemwa umunobe kubati nimfilya wayitemwa wemwine.”

¹⁵ Nomba nga mukochushanya kubati ninama ishamumpanga, muchenjele ukwebati mwikayonaula mwenka.

Umupashi Wabuta nobuntunse

¹⁶ Icho nkososa chakuti lekeni Umupashi Wabuta ulemutungulula. Elo tamwakulakonkapo imibele yenu iyabuntunse.

¹⁷ Pakuba ifyo ubuntunse bwesu bufwaya nefyo Umupashi Wabuta ufwaya fyalipusana. Mfi fibili fyalipatana ichakuti tekuti muchite ifiweme ifyo mufwaya ukuchita.

¹⁸ Nomba nga Mupashi Wabuta ukomutungulula, ekwebati tamukotungululwapo na Mafunde.

¹⁹ Ifichita imibele yenu iyabuntunse filaboneka apatubile tuutu. Nimfi: ubuchende, ubusali, ukutayilama,

²⁰ ukulomba tungosa wakubasa nobuloshi, ukupatana, umufimbila, ichipyu, ukuyitemwa, ukupatukana,

²¹ abalunkumbwa, ukukolwa, buchakolwa nafimbi ifyaba nge mfi. Nkomuchenjeshako nomba ukubati nimfilya nachitile akale, bonse bo abachita mfi fintu tabakapokepo Ubufumu bwaku Lesa.

²² Nomba ifitwalo fya Mupashi Wabuta nimfi: ukutemwa, ukusekelela, umutende, ukushipikisha, inkumbu, ukuwama umutima, kuchetekela,

²³ ubufuke nokuyilama. Tapapo ifunde ilyakukanya pali mfi fyonse.

²⁴ Bonse ababa muli Klistu Yesu balisamika pamutashi imibele yabuntunse iibi pamo nolunkumbwa.

²⁵ Nga chakuti Umupashi Wabuta ewatupela ubumi, kanshi ewulingile ukututungulula.

²⁶ Tatulingilepo ukuyikusha, nangula ukukalifyanya, nangula ukuba nomufimbila.