Galatiya 4 - Chipangano Chabwangu

¹ Icho nkososa chakuti, umwana uulingile ukupokelela ububoni bwabawishi ulo achili umwana, tapusenepo nomusha nangu emwine wabuboni bonse.

² Umwana ngu alingile ukumfwila abakomusunga nabo abakololeshapo pabuboni bwakwe ukufikila ulo inshita yakufika iyo basosele.

³ Chimo chenka nafwebo, ulo twali abayiche twali abasha ababwikashi bwapanonshi.

⁴ Ulo inshita yafikile, Lesa alitumine umwana wakwe. Umwana ngu afyelwe kumwanakashi, afyelwe uwalingile ukulama amafunde.

⁵ Alichitile mfi ukwebati apulushe bo abali abasha bamafunde, ukuti twingaba abana baku Lesa.

⁶ Pakuti tushininkishe ukwebati tuli bana bakwe, Lesa alitumine Umupashi wa Mwana wakwe mumitima yesu. Elo Umupashi ngu watulenga ukuti tusose ati, “Abba! Bata!”

⁷ Echo tewepo musha iyowo, kuntu umwana. Icho uli mwana wakwe, Lesa akulengele ukuba uwakusenda ububoni bwakwe.

Ukufwaya kwakwa Paulo kubena Galatiya

⁸ Kale tamwaishibilepo Lesa iyowo. Echo mwalifye abasha batungosa wakubasa ututapo tulesa twinenene.

⁹ Kuntu nomba mwalishiba Lesa, nangula nkasose ati Lesa alimwishiba, mba nindo mukobwelela kutufuto ntulya twabwaka nakambi utwansha nsoni? Mulandu ndo mukofwaya ukuba abasha nakambi bamfilya?

¹⁰ Mulasunga inshiku shimbi, imyeshi, inshita, elo nemyaka.

¹¹ Nkotina ukwebati nalimo ukubomba kwanji pali mwebo kwakuba ukwabwaka.

¹² Nkomupapata bawesu, beni nga nebo, pakuti nandibo nali kubati nimwe. Tamwandufyenyepo iyowo.

¹³ Pakuba mwalishiba ukuti ulo natatikile ukumusambisha Ubutumi Bwawama, nali umulwele.

¹⁴ Elo ubulwele mbu chali kubati chintu ichakumwesha, kuntu tamwansulile nangula ukunkana iyowo. Mwalimpokelele kubati mungelo wafuma kumulu, nangu kubati ni Klistu Yesu umwine.

¹⁵ Kanshi ukutemwa kwenu nkulya kulipi nomba? Nachine panshita njilya nga chingachitika, nga mwakolobwele amenso yenu nokumpela.

¹⁶ Napo ndyalukile ichipondo chenu pakumweba ifyachine?

¹⁷ Abantu mbalya bakoyilanga ukuchinchila pali mwebo ukwebati mubakonke, kuntu imibele yabo tayiwemepo. Icho bafwaya chakwebati bamutalushe kuli nebo ukuti mwingakwata ukuchinchila pakubafwa.

¹⁸ Chiweme ukuchinchila pafintu ifiweme inshita shonse, tepanshita bwaka iyo ndinamwebo.

¹⁹ Mwe bana banji, kubati nimfilya umwanakashi aumfwa ukufinya pakupusuka, efyo nandibo nkoumfwa ukufinya pamulandu wakumwebo ukufikila nobwina Klistu bwakuba muli mwe.

²⁰ Ningatemwa ukuba namwe nomba, nalimo nga nasosele munshila imbi. Amano yanji yashila.

Ichakubwenapo kuli Haga na Sala

²¹ Kamunjebeniko mwebo bonse mwe bakofwaya ukukonka Amafunde. Napo tamumfwikishapo ifyo Amafunde asosa, bayi?

²² Asosa ati Abulahamu akwete abana abalalume babili: umo banyika bali abasha, elo umbi banyina bali ababwanalale.

²³ Umwana wamusha afyelwe nga ifyo abana bonse bafyalwa, kuntu umwana uwamuli wabwanalale afyelwe ukulingana nechilayo chaku Lesa.

²⁴ Ifintu mfi fyaba kubati chakubwenapo. Abanakashi babili mba bali kubati fipangano fibili. Umo ni Haga uwafumine kulupili lwa Sinai, ekwebati abana bakwe basha.

²⁵ Haga uwaba kubati lupili lwa Sinai muchalo cha Alabiya, akoyimakaninako umusumba wa Yelusalemu wanduno, uuli mubusha pamo nabantu bakwe.

²⁶ Nomba Yelusalemu wakumulu wabwanalale, emayo wakufwebo.

²⁷ Pakuti Amalembo asosa ati, “Sanguluka we mwanakashi ing’umba! Sekelela nokwaula utumpundu, we utaumfwapo ukufinya pakupusuka, pakuti abana bamwanakashi uwasulwa benji, ukuchila baku ngulya uuli nabalume.”

²⁸ Nomba mwe bawesu kubati ni Isake, muli bana baku Lesa pamulandu wachilayo nchilya.

²⁹ Pali njilya nshita umwana ngulya uwafyelwe mubuntunse, alichushishe uyo uwafyelwe mufiso fya Mupashi Wabuta. Emfilya chaba nanduno.

³⁰ Nomba Amalembo aku Lesa akoti shani? Akoti, “Tamfyeni umusha pamo nomwana wakwe, pakuti umwana wamusha tekutipo abane ububoni pamo nomwana wamwanakashi uutalipo musha.”

³¹ Echo mwe bawesu, tatulipo bana bamusha iyowo, kuntu abamwanakashi uwabwanalale.