Galatiya 3 - Chipangano Chabwangu

Amafunde nangula ichichetekelo

¹ Mwe abena Galatiya bapuneme! Mba nibani abamulowele? Ulo twamusambishe ifyaku Yesu Klistu, twalondolwele bwino-bwino ifyo bamusamikile pamutashi.

² Njebeniko, napo mwalipokelele Umupashi Wabuta mukulama Amafunde nangu mukumfwa nokuchetekela Ubutumi Bwawama?

³ Mwebo, nindo mwapunamina mfi? Umulimo ngu watatikilwe no Mupashi Wabuta, napo mukofwaya ukuushilisha kufiso fyenu?

⁴ Napo ishuko lyaku Lesa mwapokelele lyabwaka? Tefyopo iyowo.

⁵ Napo Lesa uwamupele Umupashi Wabuta nokuchita ifyafiso ifikulu muli mwebo, achitile mfi pamulandu wakulama Amafunde nangu mukumfwa Ubutumi Bwawama nokubuchetekela?

⁶ Langulukeni ifyachitikile kuli Abulahamu nga mfilya Amalembo asosa ati, “Alichetekele Lesa, elo na Ye amupokelele nga uwalungama.”

⁷ Kanshi mwishibe ukuti abachetekela ebana abenenene abakwa Abulahamu.

⁸ Elo Amalembo alisosele kabela ukuti Lesa akupokelela abenafyalo nga abalungama ukupitila muchichetekelo chabo. Echo Lesa aebele Abulahamu Ubutumi Bwawama kabela ati, “Ukupitila muli webo, Lesa akushukisha imitundu yonse.”

⁹ Abulahamu alichetekele, elo Lesa amushukishe. Echo bonse abamuchetekela akubashukisha ukubati nimfilya achitile kuli ye.

¹⁰ Bonse abashintilila imitima yabo mumilimo ya Mafunde ukwebati nga bayilama bakulungama, balilapishiwa. Pakuti Amalembo asosa ati, “Alitipwa uyo uutachitapo fyonse ifyalembwa mwibuku ilya Mafunde.”

¹¹ Nomba twabona ukwebati Lesa tangalungamikapo umuntu uuchita ifyo Amafunde asosa. Pakuti Amalembo asosa ati, “Uyo umuntu Lesa apokelela nga uwalungama pakuti akochetekela, akuba nobumi butashila.”

¹² Nomba Amafunde apusana nechichetekelo kubati nimfilya Amalembo asosa ati, “Uyo onse uuchita fyonse Amafunde asosa, akuba nobumi muli mfi.”

¹³ Klistu alitupulusha ukuti twitipwapo na Mafunde ulo ayishile kutipwa muchifulo chesu. Chaba kubati nimfilya Amalembo asosa ati, “Alilapishiwa onse uusamikwa pachiti.”

¹⁴ Klistu achitile mfi ukwebati amashuko onse Lesa alayile Abulahamu, apelwe kubenafyalo ukupitila muli Klistu Yesu. Elo mukuchetekela tupokelele Umupashi Wabuta uwo Lesa alayile.

Amalembo nobulayo bwaku Lesa kuli Abulahamu

¹⁵ Mwe bawesu, nkobomfya ichakubwenako ichanshiku shonse. Nga abantu babili baumfwana nokusuminishanya pachintu chimo, tapapo nangu umo uwingonaula nangu ukulundapo iyowo.

¹⁶ Nomba Lesa apele ubulayo bwakwe kuli Abulahamu nakumbuto yakwe. Tasoselepo ati, “Nakumbuto shakwe” kubati benji iyowo. Kuntu asosele ati, “Kumbuto yakwe” pakuti alikusosa pamuntu umo bwaka. Ngu ni Klistu.

¹⁷ Icho nkososa chakuti Lesa apangile ubulayo nokushininkisha ukwebati akuchisunga. Elo Amafunde akwa Mosesi ayishile ulo papitile imyaka imyanda ine namakumi atatu, tekuti atobepo nokonaula ichipangano chaku Lesa nchilya.

¹⁸ Nga Lesa ashukisha umuntu pamulandu wakuti alama Amafunde, ekwebati ukushukisha nku takwapelwepo pamulandu wachilayo iyowo. Nomba Lesa ashukishe Abulahamu pakuti alayile ukuchita nchi.

¹⁹ Mulandu ndo Amafunde apelelwe? Lesa apele Amafunde ukwebati abantu beshibe bubi bwabo, ukufikila ulo yakwisa imbuto njilya yakwa Abulahamu iyo Lesa alayile. Lesa apele Amafunde mubangelo nowakuwikishanya.

²⁰ Pakuba uwakuwikishanya tafwayikwapo nga pali umuntu umo, pakuti Lesa umo bwaka.

Icho Amafunde apelelwe

²¹ Napo ekwebati Amafunde akolengulula afilayo ifyaku Lesa? Nangu panini. Nga chakuti abantu kuti baba nobumi pamulandu wakulama Amafunde, nga bonse bali abalungama ukupitila mumafunde.

²² Nomba Amalembo asosa ati ifintu fyonse fili mufiso ifyabubi, ukwebati uyo uuchetekela muli Yesu Klistu apokelele ishuko ilyo Lesa alayile.

²³ Ulo ichichetekelo nchilya tachilafika, twali kubati bafungwa ba Mafunde, ukufikila ulo ichichetekelo nchi chakufisululwa.

²⁴ Amafunde ali kubati nintungulushi ukufikila ulo Klistu afikile ukuti tupokelelwe nga abalungama pamenso aku Lesa ukupitila mukuchetekela.

²⁵ Pakuti nomba ichichetekelo chafika, Amafunde tayatutungululapo.

²⁶ Mwe bonse muli abana baku Lesa pakuti mwalichetekela muli Klistu Yesu.

²⁷ Elo bonse mwayishileba umo na Klistu ulo mwabatishiwe, mwachitile ukubati mwafwala umubili uwaku Klistu.

²⁸ Echo tapapo ubupusano pakati ka Bayuda nabenafyalo, abasha nabali mubwanalale, abalalume nabanakashi, pakuti bonse bali umo muli Klistu Yesu.

²⁹ Nga muli abaku Yesu, ekwebati muli bana abakwa Abulahamu abalinga ukupokelela ifyo Lesa alayile.