Galatiya 2 - Chipangano Chabwangu

Abatumwa bambi bapokelela Paulo

¹ Ulo papitile imyaka ikumi na ine, nayile ku Yelusalemu pamo na Banabasi. Taitasi naye twayile nakwe.

² Naliile nku pakuti Lesa ewantumine. Pakulongana ukwabakulu abachilonganino, nalilondolwele bwino-bwino ifya Butumi Bwawama ubo nsambisha kubenafyalo. Nachitile mfi ukwebati imilimo iyo momba kuti yaba iyabwaka.

³ Nangu Taitasi uwo twali nakwe aali Mugiliki, tabamupatikishepo ukwebati ashilimunwe.

⁴ Elo bamo balikufwaya ukuti ashilimunwe. Balikuyilanga ukuba bawesu, kuntu bayishile ukulengulula ubwanalale ubo twakwata muli Klistu Yesu. Balikufwaya ukutuchita abasha.

⁵ Nomba tatwabanakililepo nangu panini iyowo. Twalichitile mfi pakuti twalikufwaya ukuwamya ukusambisha ukwachine ukwa Butumi Bwawama.

⁶ Nomba kuli bo abalikusosa ati bakulu (nshikwetepo nakantu nga ninani pantu Lesa takwetepo akapatulula) tabalundilepo akantu kufyo nsambisha.

⁷ Nomba balibwene ukuti nalipelwa umulimo uwakushimikila abenafyalo kubati nimfilya Petulo apelwa ukushimikila Abayuda.

⁸ Pakuti Lesa uwapyungile muli Petulo nokupela umulimo wakushimikila ku Bayuda, ewabombele namuli nebo ukuti mbe umutumwa kubenafyalo.

⁹ Elo Yemusi, Petulo na Yohane, bantungwe-mpanda bachilonganino, babwene ukuti Lesa mubwanshi bwakwe alimpele ngu mulimo. Elo balitwikete nokuboko ukwamulyo, nebo na Banabasi, ukulanga ukutusuminisha ukuya kubenafyalo, bo ku Bayuda.

¹⁰ Balitupapatile ukuti tutwalilile ukwafwa abachula pakati kabo. Echo nandibo nalikufwayilisha ukuchita.

Paulo akalipila Petulo ku Antiyoki

¹¹ Ulo Petulo afikile ku Antiyoki, nalimukalipile palwalala, pantu alilufyenye.

¹² Ulo tabalafika abantu abatuminwe na Yemusi, Petulo alikulya nabenafyalo. Nomba ulo bafikile, aliyipatulwile. Talikufwayapo ukulya nabo pakuti alikutina bantu abalikufwaya ukuti abenafyalo bashilimunwe.

¹³ Echo bawesu Abayuda bamo batatikile ukuchita fyenka mfilya. Naye Banabasi atatikile ukukonka mfi.

¹⁴ Ulo abwene ukuti tabali kukonka ukusambisha ukwachine ukwa Butumi Bwawama, nalisosele kuli Petulo pachinso chabantu bonse ati, “Webo uli Muyuda, kuntu mubwanalale bobe, walikwikala kubati mwinafyalo. Mba nindo ukopatikisha abenafyalo ukwikala kubati Bayuda?”

Chichetekelo echipulusha Abayuda nabenafyalo

¹⁵ Fwebo tuli Abayuda kukufyalwa, tefwepo abenafyalo abo basosa ati nimbifi iyowo.

¹⁶ Twalishiba ukuti umuntu talungamikwa ukupitila mukulama Amafunde, sembi mukuchetekela muli Yesu Klistu. Nafwebo twachetekele Yesu Klistu ukuti tube abalungamikwa kuli Lesa, temukulamapo Amafunde iyowo. Pakuti Lesa tasosa ukuti umuntu uulama Amafunde ewo alungamika iyowo, pantu tapapo uulungamikwa pamulandu wakulama Amafunde.

¹⁷ Kati fwe Bayuda mukufwaya ukulungamikwa muli Klistu, tusangwa ukuba imbifi kubati benafyalo, napo chikoyalula ukwebati Klistu ewukoselesha ifibi? Iyowo, tefyopo!

¹⁸ Nga nabwelela mukuyimaka chipya-chipya icho naonawile, nkolanga ukwebati nine mpula-mafunde.

¹⁹ Ukusosa ifya Mafunde, nalifwa pantu alinshinina. Nomba ndinobumi muli Lesa.

²⁰ Nalisamikwa pamutashi pamo na Klistu. Echo ubumi ubo nkwete tebwakunebopo iyowo, kuntu bwaku Klistu uwaba muli nebo. Ubumi mbu ndinabo mumubili wanji bwakuchetekela mu Mwana waku Lesa uyo uwantemenwe nokupela ubumi bwakwe pamulandu uwaku nebo.

²¹ Nakana ukusula ubwanshi bwaku Lesa. Nomba nga umuntu apokelelwa uwalungama kuli Lesa mukulama Amafunde, ekwebati Klistu afwile apabwaka.