Filipi 4 - Chipangano Chabwangu

Ifilangililo

¹ Echo mwe bawesu, nalimutemwesha, elo ndamufuluka. Mulansangalasha nakambi nimwe ingala yanji iyo mbekelamo. Mwe batemwekwa, imakaneni ndi muli Bashikulu.

² Nkopapata Yuwodiya na Sintike ukuti bomfwane muli Bashikulu.

³ Elo nkokupapata nawebo, wemunanji umwinenene pamulimo wesu ngu ukuti ubafwilisheko abanakashi mba. Pakuba balibombele ukwinekantu pamo nandibo mukutanda Ubutumi Bwawama. Elo babombele na Kilementi pamo nababomfi bananji bambi abali namashina aabo aalembelwe mwibuku lyabumi.

⁴ Mulokusekelela muli Bashikulu inshita shonse. Nakambi nkobwekeshapo, sekeleleni!

⁵ Ukuyichefya kwenu kuboneke kubantu bonse. Bashikulu bali apepi.

⁶ Mwilokusakamanapo pachintu nangu chimo iyowo, kuntu mukulomba kwenu konse, mupapate Lesa ukuti amupele ifyo mutakwetepo. Elo inshita shonse mulombe nemitima iyakutotela.

⁷ Elo umutende uufuma kuli Lesa, uyo uuchilapo pamano onse ayamuntu, wakulama bwino imitima yenu namalangulushi enu muli Klistu Yesu.

⁸ Pakupwa mwe bawesu, langulukenipo fyonse ifiweme ifyo mungatondayisha: ifyachine, ifyamuchinshi, ifyalungama, ifyaololoka, ifiweme, elo nefyachindama.

⁹ Mulokukonka ifyo mwasambilile nokupokelela ukufuma kuli nebo, pamo nefyo mwaumfwile kuli nebo nokubona nkochita.

Akobatotela pachabupe chabo

¹⁰ Nkosekelela ukwinekantu muli Bashikulu nomba pakuti, ulo kwapita inshita iitali, mwatatika nakambi ukulanga ukuti mulanjibukisha. Ukunjibukisha mwali kunjibukisha, nomba tamwakwetepo ishuko ilyakubweneshako nchi.

¹¹ Nshikososapo mfi kubati nkochulilapo akantu iyowo, pakuba nalisambilila ukwebati icho nkwete eecho.

¹² Nalishiba ukuba uwachula, nokuba nefintu ifinji. Muli fyonse nalisambilila ichabumfisolo nchi ichakuba uwayikuta nangu uwansala, ukuba nefinji nangu utunini.

¹³ Ningachita ichili chonse pakuti Klistu eumpela ifiso.

¹⁴ Nangu chibe mfi, mwalichita bwino ukungafwilishako mumachushi anji.

¹⁵ Mwe abena Filipi, mwalishiba mwenka ukuti ulo nafumine ku Masedoniya, inshiku ishakutatika mukubilisha Ubutumi Bwawama, tapalipo ichilonganino nangu chimo ichalikungafwilishako mukulipila nangu mukupoka, kuntu mwebo mwenka.

¹⁶ Ulo nali ku Tesalonika mwalikuntumina ubwafwilisho imiku iilingile.

¹⁷ Tekwebati nkofwaya ichabupe kuli mwe, kuntu nkofwaya ukuti mushukishiwe pakupela kwenu.

¹⁸ Nalifipoka fyonse, elo nafifula. Nalikwata fyonse ifyo nkabila nomba pakuti napokelela kuli Epafuloditasi ifyabupe ifyo mwantumine. Fili kubati ipupo ilyabwema ubwanunkila, kubati ipupo ilyo Lesa apokelela, ilimusekesha.

¹⁹ Lesa wanji ali nobuboni ubwinji. Elo muli Klistu Yesu akumupela fyonse ifyo mukabila.

²⁰ Lesa Bata wesu achinshikwe umuyayaya. Ameni.

Ukuposha umutende kwakumupwilo

²¹ Muposhe umutende abapatulika bonse muli Klistu Yesu. Bawesu bonse abo ndinabo nkuno bakomuposha umutende.

²² Bawesu abapatulika bonse abo ndinabo nkuno bakomuposha umutende, ukuchilapo abo abapyungila munanda yamfumu iyaku Loma.

²³ Ubwanshi bwaku Bashikulu Yesu Klistu bube namwebo bonse.