Filipi 3 - Chipangano Chabwangu

Ifyabulungami ubwachine

¹ Pakulekelesha bawesu, nkomweba ati, sangalaleni muli Bashikulu. Tanshatendwepo ukumulembela ifintu ifyo nalembele kale. Pakuba kuli mwebo chilafwilisha.

² Chenjeleni nabo ababusali kubati nimbwa, abachita ifibi, abo abashilimuna umubili bwaka.

³ Pakuba nifwebo abashilimunwa ukufikapo. Fwe abalomba Lesa pakutungululwa no Mupashi Wabuta. Tulayitutumuna pamulandu waku Klistu Yesu, temukuchetekelapo ifyabuntunse iyowo.

⁴ Tekwebati nebo nshikwetepo apakuyitutumwina. Nga chakuti pali umuntu uukolanguluka ukuti ali nafyo ifyakuyitutumwinapo, nebo nalimuchila.

⁵ Nalishilimwinwe munshiku shisano na shitatu ukufuma kukufyalwa kwanji. Ndimukowa wakwa Isilaeli, mulupwa lwakwa Benjameni. Ndi Muhebulu umwinenene. Ukusosa ifya Mafunde aya Bayuda, nali Mufalisi.

⁶ Nali uwachinchila ichakwebati nachushishe ichilonganino. Nachitile fyonse ifyo Amafunde alikufwaya ukwebati nsekeshe Lesa.

⁷ Pamulandu waku Klistu, ifintu fyonse ifyo nalikulanguluka ukuba ububoni, nomba mfibona ukuba ifyabwaka.

⁸ Nachine, ifintu fyonse mfibona ukuba ifyabwaka pamulandu wabuboni ubukulu ubo ndinabo pakwishiba ukuti Yesu Klistu Bashikulu wanji. Pamulandu wakwe, ndaposa fyonse, ukufibona kubati fisoso, ukwebati nonke Klistu,

⁹ nokusangwa muli Ye. Nshikoyilangulukapo ukuti ndimulungami pakulama Amafunde iyowo, kuntu ukulungamikwa kwanji kufuma mukuchetekela Klistu, nku kufuma kuli Lesa ukwayimakana pachichetekelo.

¹⁰ Icho nkofwaya chakuti njishibe Klistu nefiso ifyamubushishe kubafwa. Ng’umfwe amachushi akwe nokubati ni Ye mumfwa yakwe.

¹¹ Mukuchita mfi, nandibo nkasangemo ukubuka ukufuma kubafwa.

Ifyakubutukila kuchipimo

¹² Nshikososa ukwebati nalifikapo kale pali mfi nangu ukwebati ndiwalungama kale iyowo. Nomba ndesha ukwebati nkapoke ichilambu icho Klistu Yesu achimfishe kale ukuti mbe uwakwe.

¹³ Mwe bawesu, tanshikolangulukapo ukuti nalifipoka kale iyowo. Nomba chimo icho nchita ninchi: ndalabukila ifyakunuma nokwesesha ukufika kufyakuntanshi.

¹⁴ Ndabutukila kuchipimo ichakuchimfyanya ichalubilo ndu ukwebati nkanonke ububoni ubo Lesa akotwitila kumulu muli Klistu Yesu.

¹⁵ Nomba fwe bonse abafikapo pabumi bwesu ubwakumupashi, tulangulukile mumo. Nomba nga mulapusana mukulanguluka mufintu fimo, Lesa akumufisulwila.

¹⁶ Nangu chibe shani, twikatishe ifintu ifyo twanonka kale.

¹⁷ Mwe bawesu, mulokutenteka nebo. Elo poseni amano kuli bo abakoenda munshila iyo twamubweneshe.

¹⁸ Nali kumweba nchi libili-libili. Elo nomba nkobwekeshapo nemisonshi, ekobali bambi imyendele yabo ibalenga ukuba ifipondo fyamutashi waku Klistu.

¹⁹ Kumupwilo bakonaulwa, pakuti lesa wabo fintu ifiwamya umubili. Bakoyitutumwina pafyo balingile ukuba nensoni. Amalangulushi abo aba pafintu ifyapanonshi epela.

²⁰ Nomba fwebo kwesu nikumulu. Elo Umupulushi uyo tukolindila akufuma kwenka nkulya. Umupulushi ngu ni Bashikulu wesu Yesu Klistu.

²¹ Ye akwalula imibili yesu nji iyabwaka ukwebati ipalane nomubili wakwe uwabuleme. Akuchita mfi kufiso fyakwe mfilya ifyo angalenga ifintu fyonse ukutungululwa na Ye.