Filipi 2 - Chipangano Chabwangu

Ukuyichefya kwaku Klistu nokuchindama kwakwe

¹ Ubumi bwenu muli Klistu bulamukoselesha. Ukutemwa kwakwe kulamusekelesha. Muli nomutima umo mu Mupashi Wabuta. Echo mulomfwila abanenu inkumbu nechisa.

² Nkomupapata nomba ukuti munsekeshe ukwinekantu mukumfwana namukwikatana pamo mukutemwa. Muchite mfi nomutima umo, elo namalangulushi amo.

³ Mwilokuchitapo chintu nomutima uwakuyitemwa nangu uwakuyitutumuna iyowo. Beni abakuyichefya kuli umo nomunakwe. Elo uuli onse abone abanakwe nga abamuchilile.

⁴ Mwilokufwayapo ifikomuwamina mwenka iyowo, kuntu nefikowamina abanenu.

⁵ Echo bonse mube nomutima uwo Klistu Yesu akwete:

⁶ Ye ali nobu Lesa, kuntu tayeseshe ukuti ukulingana na Lesa chintu angayikatilila.

⁷ Alekele fyonse nokuba umusha, ulo ayishile kuba umo pakati kesu.

⁸ Klistu aliichefeshe nokuba uwachumfwila ukufikila kumfwa, ina, kumfwa yakwe iyapamutashi.

⁹ Echo Lesa alimusumbwile ukwinekantu, nokumupela ishina ilyachila amashina onse.

¹⁰ Achitile mfi ukwebati pakumfwa ishina lyaku Yesu bonse abamumulu, panonshi nakunshi yachalo bamufukamine mukumuchinshika.

¹¹ Bonse bakuyebelela benka ukuti, “Yesu Klistu ni Bashikulu,” mukuchinshika Lesa Bata.

Abena Klistu basanike kubati inyali

¹² Nomba mwe batemwekwa banji, kubati nimfilya mwali abanakila ulo nali namwe, nomba beni abachumfwila ukuchilapo apo tanshili namwebo. Echo bombeni mukufikilisha chipulusho chenu mukutina namukututuma.

¹³ Pakuba Lesa eubombela muli mwebo ukuti mufwaye nokuchita ifimusekesha Ye.

¹⁴ Chiteni fyonse ukwambula ukuyilishanya nangu ifitala,

¹⁵ ukuti mube ababula umulandu, abana baku Lesa abatakwetepo akalema pakati kabantu abapetama nakambi ababi. Pakati kabantu abali mfi mulasanika kubati nimfilya intandala shiboneka panonshi

¹⁶ ulo mubeba amashiwi aapela ubumi. Munshila nji, nebo nakukwata apakuyitutumwinapo pakasuba ulo Klistu akubwela. Penkapo pakwishibika ukuti nshibutukile bwaka pakuchimfyanya ukwalubilo, nangu ukubombela lutu.

¹⁷ Nalimo umulopa wanji wakwitilwa kubati chipupo ichipelwa nechichetekelo chenu kuli Lesa. Kati efyo chili, nkosangalala, elo nakusangalala pamo namwebo bonse.

¹⁸ Munshila imo yenka, namwebo mutemwe nokusangalala pamo nane.

Ifyakwa Timoti na Epafuloditasi

¹⁹ Nga kufwaya kwaku Bashikulu Yesu, nkochetekela ukwebati bwangu-bwangu nakumutuma Timoti kuli mwe, ukuti umutima wanji wikale shilili ulo nakumfwa ifyaku mwebo.

²⁰ Tanshikwetepo nangu umo uuli kubati ye uuposako amano pafyaku mwebo.

²¹ Bambi bonse baposako amano pafintu ifikowamina bo, tepo ifiwamina Yesu Klistu.

²² Pakuba mwalishiba ukuti imikalile yakwa Timoti yaba kale apatubile iiweme. Kubati ifyo umwana abomba nabawishi, naye twaliketene pamo mukutanda Ubutumi Bwawama.

²³ Nkolindila nomba ukumutuma kuli mwebo bwangu-bwangu nga nayishiba bwaka ifyo ifintu fyakuba kuli nebo.

²⁴ Nkochetekela muli Bashikulu ukwebati bwangu-bwangu nandibo nakwisa kuli mwe.

²⁵ Nomba nalanguluka ukuti chiweme ukutuma wesu Epafuloditasi, umubomfi nakambi umushilikali waku Bashikulu kubati ifyo naba. Mwalimutumine ukuti ese angafwilisheko.

²⁶ Akomufuluka ukwinekantu, nakambi akochula mumutima pakuti mwalyumfwile ukwebati aali kulwala.

²⁷ Nachine alilwele ukwinekantu, ali apepi nokufwa. Nomba Lesa alimukwatila inkumbu. Te enka bwanka akwatilepo inkumbu iyowo, kuntu nandibo, ukwebati pelundwapo amachushi pali ngalya ndinawo kale.

²⁸ Echo nkofwayisha ukumutuma kuli mwe ukwebati nga mwamubona mukasekelele. Elo nande ukusakamana kwanji kwakuchepelelako.

²⁹ Mupokeleleni muli Bashikulu nokusekelela ukukulu. Echo abantu abali mfi mulokubapela umuchinshi.

³⁰ Aali apepi nokufwa pamulandu wamilimo yaku Klistu. Apele ubwafwilisho ubo mwebo mwafwililwe ukumpela.