Efeso 6 - Chipangano Chabwangu

Abana nabafyashi

¹ Mwe bana, mulokumfwila abafyashi benu muli Bashikulu, pakuti ukuchita mfi ekulungamika.

² Amashiwi aku Lesa asosa ati, “Chinshika bawiso nabanoko.” Ndi efunde lyakutatika ilyaba nechilayo.

³ Nga wachita mfi, wakushuka, nakambi wakwikala inshita iitali panonshi.

⁴ Mwe bafyashi, mwilokukalifyapo abana benu, kuntu mubalele mukubasambisha nokubakonkomesha munshila yaku Bashikulu.

Abasha nabashikulu wabo

⁵ Mwe basha, mulokumfwila bashikulu wenu abapanonshi mumwenso namukututuma. Chiteni mfi nemitima iyachine, kubati mukochitila Klistu.

⁶ Mulokuchitapo bwaka ulo bakomulondapo, kubati mukofwaya ukusekesha abantu. Nomba nga abasha baku Klistu, muchite nomutima onse ifyo Lesa afwaya.

⁷ Mubombe nensansa kubati mukobombela Bashikulu, temuntupo bwaka.

⁸ Mwalishiba ukuti chonse ichiweme icho umuntu achita, akupokelelapo ichilambu kuli Bashikulu, nangu musha nangula mwana.

⁹ Namwe mwe bashikulu babo mulokubachitila mwenka abasha benu. Mwilokubatinyapo. Mwalishiba ukuti bo pamo namwe mulikwete Bashikulu bamo abali kumulu, Bo abatakwetepo akapatulula.

Ifyanso fyankondo ifyo Lesa apela

¹⁰ Pakupelako nkoti, koseni muli Bashikulu, namufiso fyabo ifikulu.

¹¹ Fwaleni ifyanso fyonse ifyo Lesa amupela ukwebati mungalwishanya na Satana mubuchenjeshi bwakwe.

¹² Pakuba munkondo yesu tatukolwishanyapo nabantu bwaka iyowo. Tukolwishanya neshamfumu, abafiso nentungulushi shapano chalo ichamfishi, elo nemipashi iibi iyamulwelele.

¹³ Echo fwaleni ifyanso fyonse ifyaku Lesa. Ulo akasuba akabi kakwisa, mwakuchimfya, pakupelako mwakwimakana ndi.

¹⁴ Echo mwimakane ndi, mufwale ichine kubati mushipi mumusana wenu. Fwaleni ubulungami kubati ilaya lyachela pachifuba chenu.

¹⁵ Ukufwayilisha kwenu ukubilisha Ubutumi Bwawama kube kubati ninkwanda kumakasa enu.

¹⁶ Inshita shonse mube nechichetekelo ukubati ninkwela shenu, icho mwakushimishako imifwi ikoyaka umulilo iyamubi ngulya.

¹⁷ Pokeleleni ichipulusho kubati chisoti chenu, na mashiwi aku Lesa kubati mwele uwo Mupashi Wabuta amupela.

¹⁸ Inshita shonse lombeni mukutungululwa no Mupashi Wabuta ukuti Lesa amwafwilishe. Mulombe nokulomba ukupusene-pusene. Mube abayiluka mukulombela abantu baku Lesa, mwilekapo iyowo.

¹⁹ Munombeleko nandibo ukwebati Lesa ampele amashiwi ulo nkobilisha kubantu ishamubumfisolo ifya Batumi Bwawama ukwambula umwenso.

²⁰ Nangu ndimuchifungo, kuntu ndimutumwa wa Butumi Bwawama mbu. Munombele ukuti nsose mukushipa nga umo ningile ukusosa.

Amashiwi akupelako

²¹ Tikikasi, wesu uwatemweka akumweba ifintu fyonse ifyaku nebo, ifyo njikala nefyo nkochita. Ngu mupyungi uwachetekela waku Bashikulu.

²² Nkomutuma kuli mwe ukuti mwishibe ifyo tuli, nokuti amukoselesheko.

²³ Lesa Bata na Bashikulu Yesu Klistu bapele bawesu bonse umutende, ukutemwa nechichetekelo.

²⁴ Lesa abakwatile ubwanshi bonse abatemwa Bashikulu wesu Yesu Klistu nokutemwa ukutashilapo.