Efeso 5 - Chipangano Chabwangu

Ukwenda mukusanika

¹ Nomba epo muli bana baku Lesa abatemwekwa, mulokwesha ukumupasha.

² Endeni mukutemwa kubati nimfilya Klistu atutemenwe. Ayipele pamulandu waku fwebo nga ipupo lyachena ichiweme ichisekesha Lesa.

³ Epo muli bantu baku Lesa, ubulale-lale, ubusali nangula bukabundulu tafilingile nokusoswapo pakati kenu.

⁴ Elo mwisosapo ifipuneme nangu ifitakwetepo akantu, kuntu mulokusosa bwaka ifyakutondayisha Lesa.

⁵ Mwishibe nchi ichakuti umuntu onse uwabuchende nangula uuchita ifyabusali, nangula kabundulu (pakuti bukabundulu chimo nokulambila tungosa wakubasa), takapokelelepo ubufumu bwaku Klistu nobwaku Lesa.

⁶ Kwibapo umuntu nangu umo uwakumupunamika namashiwi aabwaka, pakuti ifintu ifyamusango ngu efileta ubukali bwaku Lesa pabantu abatamumfwilapo.

⁷ Echo muyikatanapo nabantu bamfi.

⁸ Namwe kale mwali mumfinshi, kuntu nomba muli mukusanika pakusangwa ukuti muli baku Bashikulu. Nomba mwende nga bantu abayikala mukusanika.

⁹ Pakuba apali ukusanika pasangwapo ubune, ubulungami nefyachine fyonse.

¹⁰ Esheni ukwishiba ifingasekesha Bashikulu.

¹¹ Muyikatanapo nabantu abachita imilimo iyamumfinshi, kuntu mwebo mubatalike. (

¹² Pakuba chilansha nsoni nokusosa ifintu ifyo bachita mumfinshi.)

¹³ Nomba ukusanika kulafisulula fyonse, elo filamoneka apatubile.

¹⁴ Pakuba ichili chonse ichibonekela apatubile chilasanguka ukusanika. Kubati nimfilya chalembwa ati, “Bukeni webo weulele, buka kubafwa, elo Klistu akukusanikila.”

¹⁵ Bakeni imyendele yenu. Mwilokwendapo kubati bantu abatakwetepo umulangwe, kuntu nga bantu bamulangwe.

¹⁶ Mube abachinchila ukwebati mwiposapo inshita yenu pafyabwaka, pakuti inshita njino iibipile.

¹⁷ Echo mwibapo abapuneme, kuntu mwishibe ifyo Bashikulu bafwaya ukuti muchite.

¹⁸ Mwikolwapo nawaini, pakuti mwakonaika bwaka. Nomba mwiulemo no Mupashi Wabuta.

¹⁹ Musoshanye namashiwi aamalumbo, nenyimbo shaku Lesa, neshakutondayisha Lesa. Mwimbile Bashikulu mukutondayisha nomutima onse.

²⁰ Mutotole Lesa Bata inshita shonse pamulandu wafintu fyonse mwishina lyaku Bashikulu Yesu Klistu.

Abakashi nabalume

²¹ Pakuti mulatina Klistu, mulokumfwana umo nomunakwe.

²² Mwe bakashi, mulokunakilila abalume benu kubati nimfilya mumfwila Bashikulu.

²³ Pakuti umwalalume emutwi wamukashi wakwe nga mfilya Klistu emutwi wachilonganino, umubili wakwe, elo Emupulushi wachiko.

²⁴ Kubati nimfilya ichilonganino chinakilila Klistu, efyo nabanakashi balingile ukunakilila abalume babo muli fyonse.

²⁵ Mwe balume, mulokutemwa abakashi benu nga mfilya Klistu atemenwe ichilonganino nokuyipela pamulandu wachiko,

²⁶ ukwebati achibutishe. Achibutishe pakuchisamfya namenshi, elo namashiwi aakwe.

²⁷ Alikufwaya ukuti achilete pachinso chakwe ichamuchinshi, ichitakwetepo akalema nangu ifisemba, nangula akantu kambi akali konse akabipisha, kuntu ukuba uwabuta ukufikapo.

²⁸ Echo abalume balingile ukutemwa abakashi babo kubati nimfilya batemwesha imibili yabo. Uyo uwatemwa umukashi wakwe, aliyitemwa umwine. (

²⁹ Tapapo umuntu uwapata umubili wakwe, kuntu alaulisha nokuusunga bwino, kubati nimfilya Klistu achitila ichilonganino chakwe.

³⁰ Pakuba fwebo tuli ifilewa fyamubili wakwe.)

³¹ Kubati nimfilya Amalembo asosa ati, “Echo umwalalume akusha bawishi nabanyina nokuya kumbinkana kumukashi wakwe. Elo mba babili bakuba umubili umo.”

³² Amashiwi nga akotufisulila ichamubumfishi ichafisamisha. Elo nkoti ichamubumfishi nchi chisosa ifyaku Klistu nechilonganino.

³³ Echo umulume uuli onse alingile ukutemwa umukashi wakwe kubati nimfilya ayitemwa umwine. Elo umwanakashi onse alingile ukutemwa umulume wakwe.