Efeso 4 - Chipangano Chabwangu

Bumo muchilonganino uuli mubili waku Klistu

¹ Nebo, umufungwa pamulandu wakubombela Bashikulu, nkomupapata ukuti nga mfilya Lesa amwitile, mwende ukulingana nobwite bwakwe.

² Mulokuba abaichefya, abankumbu nakambi abashipikisha inshita shonse. Munakililane mukutemwa.

³ Elo mweshe ukulama bumo mu Mupashi Wabuta pakwikatana pamo mumutende.

⁴ Pakuba kwaba umubili umo, no Mupashi Wabuta umo, ukubati nimfilya kwaba ukulindilila kumo uko Lesa atwitile.

⁵ Kuli Bashikulu bamo, ubuchetekelo bumo nolubatisho lumo.

⁶ Paba Lesa umo uuli ni Wishi wabantu bonse. Ye aba pamulu pali bonse, abombela ukupitila muli bonse, nakambi ali muli bonse.

⁷ Nomba uuli onse muli fwebo apokelele ubupe ubwabwaka ukulingana nomo Klistu afwayile ukumupela.

⁸ Kubati ifyo Amalembo asosa ati, “Ulo akwelele kumulu, apintile abafungwa abenji, elo apele ifyabupe kubantu.”

⁹ Mba ishiwi ilyakuti, “akwelele” likoyalula ndo? Ekwebati pakutatika ayikile pesamba iline lyachalo.

¹⁰ Uyo uwayikile panshi eumo enka uwakwelele ukupitilila kumulu konse ukwebati ifintu fyonse fiule na Ye.

¹¹ Eye uwapele ifyabupe kubantu. Apele bambi ukuti babe abatumwa, bambi abasoseshi, bambi bakabilisha, bambi bachembela nabasambishi.

¹² Achitile mfi ukuti apekanishishe kabela abantu baku Lesa ukuti babombe umulimo nokwimaka ichilonganino icho ichili mubili waku Klistu.

¹³ Echo pakupelako bonse twakufika kuli bumo ubo busangwa pakuchetekela nokwishiba Umwana waku Lesa. Elo twakwimakana ndi nokuba nobwikashi ubwafikapo ubwaku Klistu.

¹⁴ Tatwakabepo abana aboluulwa kuchipupu chakusambisha ichabufi nakambi abachenjeshi abalufya abantu mubuchenjeshi bwabo.

¹⁵ Ekuti pakusosa ichine nomutima wakutemwa, twakukula pali fyonse muli Klistu. Ye emutwi wesu,

¹⁶ uutungulula umubili onse, nokulundanya pamo ifilewa fyonse. Elo ichilewa chonse chalikwata umulimo wachiko. Echo umubili onse ulakula nokukosa mukutemwa.

Ubumi bwabwangu muli Klistu

¹⁷ Mwishina lyaku Bashikulu nomba nkomweba ati tamulingilepo ukwikala kubati benafyalo. Pakukonka amano yabo ayabwaka.

¹⁸ Elo amano abo ali mumfinshi pamulandu imitwi yabo ilikosele ndi mukuteshiba Lesa. Bafutatila ubumi ubo Lesa apela.

¹⁹ Tabakwatapo insoni. Elo baliipela mukuchita ifyabusali nefibi ifili fyonse ukwambula ukuyikanya.

²⁰ Nomba mwebo tamwasambililepo munshila nji ifyaku Yesu iyowo.

²¹ Nachine mwalyumfwile ifyakwe. Elo mwalisambilile nefyachine ifyamuli Klistu.

²² Echo muleke imyendele yenu iyakale, ubumi bwenu mbulya ubwalikonaika pamulandu uwalunkumbwa ulwabufi.

²³ Imitima namalangulushi enu fibe ifyabwangu.

²⁴ Mufwale ubumi bwabwangu ubwalengelwe muchimpashanya chaku Lesa, ubwalungama nobwabuta.

²⁵ Echo lekeni ukubepa. Uuli onse asose ifyachine kumunakwe pakuti bonse tuli ifilewa ifyamubili waku Yesu.

²⁶ Ulo mukalipa, mwibifyapo. Elo akasuba kewa muli abakalipile.

²⁷ Mwipelapo insambu Satana.

²⁸ Umung’o aleke ukwiba, kuntu abomfye amaboko akwe mumilimo iiweme ukwebati angapelako abatakwetepo.

²⁹ Mukanwa kenu mwilafumapo amashiwi aali onse aabi, kuntu musose amashiwi aaweme afwilisha ukuti bonse abayomfwa bapindulemo akantu.

³⁰ Elo mwiumfwishapo ubulanda Umupashi Wabuta uwaku Lesa pakuti echishibilo chenu ukuti mwebo muli baku Lesa pabushiku ubo Lesa akupulusha abantu.

³¹ Mufumyeko pali mwebo ukulotoka nobukali, ukukalipa nokutosha nangula ukusosa amashiwi ayamusalula aali onse.

³² Munakililane nokubelana inkumbu kubati nimfilya Lesa amunakilile namwe muli Klistu.