Efeso 3 - Chipangano Chabwangu

Imilimo yakwa Paulo kubenafyalo

¹ Nipamulandu ngu nebo ne Paulo umufungwa pamulandu waku Klistu Yesu nati mupyungile mwe benafyalo.

² Mwalyumfwile ukuti Lesa alimpele umulimo wakubilisha kuli mwebo ifyabwanshi bwakwe.

³ Alimfisulwile ifyabumfishi bwakwe. (Ukubati nimfilya namulembele mukwipifya bwaka.

⁴ Ulo mukopenda mfi, mwakwishiba ukuti ndomfwikisha ichabumfisolo ichaku Klistu.)

⁵ Ubumfisolo mbu tabwayishibilwepo nabakale kubati ifyo Lesa afisulula nomba mu Mupashi Wabuta kubatumwa nabasoseshi bakwe ababuta.

⁶ Ubumfisolo mbu bwakuti mu Butumi Bwawama abenafyalo nabo bapoke ishuka lyaku Lesa pamo na Bayuda. Pamo na Bayuda filewa ifyamubili umo, elo muli Klistu Yesu balapokelela pamo nabo ubulayo bwaku Lesa.

⁷ Kubwanshi bwaku Lesa alimpele umulimo wakubilisha Ubutumi Bwawama mbu. Ulo achitile mfi alilangile ifiso fyakwe.

⁸ Mubantu baku Lesa, nebo ndimunini ukuchilapo. Nomba Lesa alimpele nebo umulimo ngu uwakubilisha kubenafyalo Ubutumi Bwawama ubwabuboni ubutangapendwapo Lesa atupele muli Klistu.

⁹ Alimpele umulimo wakulondolwela abantu bonse umo Lesa akuchitila fyonse ifyo apekenye mubumfisolo bwakwe. Lesa uwabumbile fyonse, asungile ubumfisolo mbu inshita tayilatatika.

¹⁰ Elo Lesa akubomfya ichilonganino mukubwenesha ifiso nensambu shakwe kufyakumulu ukwebati fishibe ati, ali nomulangwe uupusene-pusene.

¹¹ Lesa alichitile mfi ukuti nachine fichitike muli Klistu Yesu Bashikulu wesu ifyo asosele kale inshita tayilatatika.

¹² Pakuti tulachetekela muli Klistu, tungashipikisha ukufika kuli Lesa ukwambula umwenso.

¹³ Echo nkomupapata ukwebati mwinakapo imitima pamulandu wakuti nkomuchulila. Pakuba nku kuchula buchindami bwenu.

Ukutemwa kwaku Klistu

¹⁴ Pamulandu wamfi nkofukamina Bata,

¹⁵ ukufuma umukowa uuli onse uwakumulu nowapanonshi onse uwapokelela ishina lyabo ilinenene.

¹⁶ Nkolomba Lesa ukuti mubuleme bwakwe ubukulu, mu Mupashi wakwe Wabuta akoshe ubumi bwenu ubwabwangu.

¹⁷ Nkolomba ukuti mukuchetekela kwenu Klistu akwinjila mumitima yenu ukuti mushike imishu yenu nokwimakwa mukutemwa.

¹⁸ Nkolomba Lesa ukwebati mwebo pamo nabantu bakwe bonse, mungakwata ifiso ifyakwishiba ichitemweko chaku Klistu ifyo chaba ichasalala, ichapabuka, ichalepa nechashika.

¹⁹ Nkolomba ukuti mwishibe ukutemwa nkulya ukwaku Klistu ukutangeshibikwa ukufikapo ukwebati mwiulemo nobumi ubwaku Lesa umwine ukufikapo.

²⁰ Nomba umuchinshi ube kuli Lesa, Ye mufiso fyakwe ifibomba muli fwebo, ukuti achita ifyachilapo ukuchila napo tulombelapo nangula ukulangulukilapo.

²¹ Ichilonganino chimupele ubuleme muli Klistu Yesu, munkulo shonse umuyayaya. Ameni.