Efeso 2 - Chipangano Chabwangu

Abafwile bapokelela ubumi

¹ Akale mwebo mwali abafwa pamulandu wakutanakilapo nobubi bwenu.

² Panshita njilya, imyendele yenu yalilingene neyabuntunse. Elo mwalikumfwila umukulu wamipashi uwamulwelele. Umukulu ngu mupashi uubi ukobombela muli bo abatanakilapo Lesa.

³ Panshita njilya yenka nafwebo bonse twali nobumi ubwabuntunse. Twalikukonkelela ulunkumbwa lwamikalile yesu iyakutemwa ifyabipa. Twalikuchita ifili fyonse ifyo twalikufwaya. Echo, muchifyalilwa chesu, twalilingile ukupokelela ubukali bwaku Lesa nga abantu bambi bonse.

⁴ Nomba Lesa wankumbu ukwinekantu nakambi alitutemwa ukuchilapo.

⁵ Nangu twalifwile pamulandu wamabifyo esu, kuntu alitupele ubumi pamo na Klistu. Mwapulushiwe kubwanshi ubukulu bwaku Lesa.

⁶ Pakusangwa muli Klistu Yesu, Lesa alitubushishe kubafwa pamo nakwe. Elo alitupele ichifulo chamuchinshi kumulu pamo nakwe.

⁷ Alichitile mfi ukuti abweneshe ubwanshi bwakwe ubwinji nenkumbu atukwatila muli Klistu Yesu.

⁸ Pakuba mwalipuluka pamulandu wabwanshi bwaku Lesa pakuchetekela. Tamwapulushiwe pamulandu wafyo mwachitile iyowo, kuntu bupe bwaku Lesa.

⁹ Umuntu tapulukapo pamulandu wamilimo yakwe, ukutina ukwebati angayitutumuna.

¹⁰ Lesa ewatubumbile. Alitulengele muli Klistu Yesu ukuti tubombe imilimo iiweme iyo Lesa apekenye kale ukuti twiichite.

Tuli bamo muli Klistu

¹¹ Mwe abenafyalo langulukeni ifyo mwali kale. Abayuda bayitutumwina pakushilimunwa (ichali kuchitwa kumibili yabo), elo bamwita ukuti abatashilimunwa.

¹² Nomba langulukeni ukuti inshita njilya tamwakwetepo Klistu. Mwali abenafyalo abatalipo abantu abasalwa na Lesa. Tamwakwetepo ulubali muli mfilya Lesa asuminishe nokulaya abantu bakwe. Mwalikele muchalo ukwambula ichakulindilila, ukwambula Lesa.

¹³ Nomba muli Klistu Yesu, mwebo abali ukutali na Lesa, muli apepi pamulandu wamfwa yaku Klistu.

¹⁴ Klistu umwine enka emutende wesu. Ewalengele ukuti Abayuda nabenafyalo babe umo. Ulo apele umubili wakwe, abongolwele ichibumba ichalupato pakati kabo.

¹⁵ Ye ashilishe Amafunde akwa Mosesi, ifyakukonka nefilangililo. Alichitile mfi ukuti ukufuma kumitundu ibili njilya alenge umutundu umo uwabwangu, uwaikala muli Ye, ukuti engaleta umutende.

¹⁶ Klistu alifwile pamutashi ukuti onaule ulupato nokubika pamo imitundu ibili njilya ukuba umubili umo. Elo pamutashi penka awikishenye imitundu njilya kuli Lesa.

¹⁷ Klistu alishile nokubilisha Ubutumi Bwawama ubwamutende kuli mwebo abenafyalo, mwe abali ukutali na Lesa, naku Bayuda abali apepi nakwe.

¹⁸ Pakuti muli Klistu fwebo bonse, Abayuda nabenafyalo, twingafika kuli Bata mu Mupashi Wabuta umo epela.

¹⁹ Echo mwe benafyalo tamulipo abalwendo abakolebela bwaka, kuntu muli bakaya pamo nabantu baku Lesa. Elo muli balupwa lwaku Lesa.

²⁰ Mwalimakwa pamufula uwapangilwe kubatumwa nabasoseshi. Elo Klistu Yesu umwine ebwe lyapachimfuntu.

²¹ Muli Ye inanda yonse yalimakwa, elo ikokulilako kuti ibe inanda yabuta iyaku Bashikulu.

²² Muli Ye namwebo mukoyimakwa pamo nabambi bonse ukuti mube inanda yakwikalamo Lesa mu Mupashi Wabuta.