2 Timoti 4 - Chipangano Chabwangu

¹ Pachinso chaku Lesa nechaku Klistu Yesu uyo uwakupingula abomi nabafwa, nkokukonkobesha, pamulandu wakwisa kwaku Klistu napabufumu bwakwe, ukuti

² ubilishe amashiwi aku Lesa. Ubilishe ulo abantu bayipekenye nolo tabayipekenye ukuyomfwa. Ubatalike, ubachenjeshe, ubakoseleshe nokubasambisha umutima-nteka.

³ Pakuti inshita yakwisa ulo abantu bakukana ichisambisho chachine, kuntu bakukonka ifyamikalile yabo, nokuyifwayila abasambishi abakubeba ifyo bakabila ukumfwa.

⁴ Bakufutatila ukusambisha kwachine nokukonka ifishimi bwaka.

⁵ Nomba webo uyilame inshita shonse. Shipikisha mukuchula. Ulokushimika Ubutumi Bwawama nokupyunga bwino imilimo yobe yonse.

⁶ Ukusosa ifyaku nebo, ubumi bwanji bwatatika kale ukwitululwa ukubati chipupililo, nenshita yanji yakufuma mubumi mbu ilifikile.

⁷ Nindwa inkondo iiweme, nashila ubulwendo bwanji, ndilamine ichichetekelo chanji.

⁸ Ichisheleko nomba kupokelela ingala ilanga ukulungama uko Bashikulu, kapingula uwalungama, bakumpela pakasuba nkalya. Elo ichabupe nchi tabakapeleko nebo nenka iyowo, kuntu nambalya bonse abakolindilila ukwisa kwakwe.

Amashiwi ambi

⁹ Esha ukwisa kuli nebo bwangu.

¹⁰ Pakuti Dimasi, pamulandu wakutemwa ifyapanonshi, alinshile nokuya ku Tesalonika. Kileseni ayile ku Galatiya, elo Taitasi ayile ku Dalumatiya.

¹¹ Luka enka euli nandibo. Pakwisa wise na Maliko pakuti kuti angafwako pamulimo.

¹² Natuma na Tikikasi ku Efeso.

¹³ Pakwisa undeteleko ikoti ndilya nashile ku Tulowasi kuli Kapusi. Undetele namabuku, maka-maka ayampapa.

¹⁴ Alekisanda umufushi alichitile ifibi ukwinekantu. Bashikulu bakumulambula ukulingana nefyo achitile.

¹⁵ Webo uchenjele nakwe pakuti alichitile ifikansa pamashiwi yesu.

¹⁶ Ulo balikumpingula pamulandu wanji pakwamba, tapalipo nangu umo uwayimakene kulubali lwanji. Bonse balinshile nenka. Lesa abanakilileko.

¹⁷ Nomba Bashikulu balikele pamo nandibo, nokumpela ifiso ukuti mbilishe amashiwi yabo ukufikapo ukwebati abenafyalo bomfwe. Ekwebati nalipuluka mukanwa kankalamo.

¹⁸ Bashikulu bakumpulusha kububi bonse ukuti nkenjile mubufumu bwabo ubwakumulu. Kuli bo kube ubuleme umuyayaya. Ameni.

Amashiwi akupelako

¹⁹ Nkoposha umutende kuli Pulisila na Akwila nolupwa lwakwa Onesifolasi.

²⁰ Elasitosi alishele ku Kolinto. Elo nalishile Tulofimasi ku Miletasi pakuti ali umulwele.

²¹ Weshe nefiso fyonse ukuti wise inshita yamwela tayilafika. Yubulasi, Pudensi, Linusi na Kulodiya bakokuposha umutende pamo nabachetekela bonse bakokuposha umutende.

²² Bashikulu babe namwebo bonse. Ubwanshi bwaku Lesa bube kuli mwebo bonse.