2 Timoti 2 - Chipangano Chabwangu

Umushilikali uuweme uwaku Klistu Yesu

¹ Nomba webo mwana wanji, shipa mubwanshi ubo twakwata muli Klistu Yesu.

² Amashiwi onse waumfwile kuli nebo pamenso yabakamboni abenji, uyasose kubantu abachetekela abo bakwisa kusambisha bambi.

³ Umfwe ukufinya nabo nga mushilikali uuweme uwaku Klistu Yesu.

⁴ Tapapo umushilikali uukolwa inkondo uupunamina pafintu ifyakumushi pakuti akofwaya ukusekesha uyo uwamwinjishe milimo.

⁵ Umuntu uuchimfyanya mulubilo, tekutipo apoke ingala, kano nga alama amafunde ayakuchimfyanya.

⁶ Umulimi uupyungisha imilimo alingile ukupoka ifyakutatika ifyamubulimi.

⁷ Ulokulanguluka bwino mfi nkososa pakuti Bashikulu bakukulenga ukuti wishibe fyonse.

⁸ Languluka Yesu Klistu uyo uwabushiwe kubafwa, uwamukowa wakwa Davide, ukubati nimulya nshimika mu Butumi Bwawama.

⁹ Pamulandu Wabutumi mbu ndachushiwa nokukakwa iminyololo kubati ningulya bapela umulandu. Nomba amashiwi aku Lesa tekutipo akakwepo iyowo.

¹⁰ Echo nshipikishisha muli fyonse mfi pamulandu wabantu abo Lesa asalile ukuti nabo bapulushiwe muli Klistu Yesu nokupokelela ubuleme ubutashilapo.

¹¹ Amashiwi nga yachine, “Nga twalifwile pamo nakwe, twakuba nobumi pamo nakwe.

¹² Nga twashipa, twakutungulula pamo nakwe. Nga fwebo twamukana, na Ye akutukana.

¹³ Nga fwebo tatulipo abachetekela, Ye aba uwachetekela, pakuti tekutipo ayitalike umwine.”

Umupyungi uuweme

¹⁴ Wibukishe abantu mfi fintu nokubachenjesha ukwinekantu ukuti Lesa tafwayapo ukwebati balokukangana pamashiwi bwaka. Tachafwapo iyowo, kuntu chilafulunganya bwaka abo abakoumfwa.

¹⁵ Esha ukuba uwayipelesha kuli Lesa nga umupyungi uwambula akalema, uulondolola amashiwi anenene aku Lesa mukwebesha.

¹⁶ Nomba kumashiwi yabwaka aatafwilishapo utalukeko pakuti abantu abomfwa mfi bakutwalilila ukusalula Lesa.

¹⁷ Amashiwi yabo ali kubati chibenga ichikoya umubili onse. Pakati kabo pali Himeniyasi na Filetosi.

¹⁸ Mba bantu abaluba nokusha ichine. Elo balonaula ichichetekelo chabantu bambi ulo basosa ati, “Abantu balibuka kale kubafwa.”

¹⁹ Nomba umufula uyo Lesa ayimbile tekuti usunkanepo, elo palilembwapo amashiwi nga, “Bashikulu balishiba ababo.” Nakambi, “Uyo onse ukososa ati waku Bashikulu, aleke ukuchita ifitalungeme.”

²⁰ Nomba munanda ikulu mwaba imbale ishipusene-pusene. Shimbi shagolide, shimbi shasilubale, shimbi shafiti, shimbi shakubumba. Elo shimbi shibomfewa panshita yayibela, kuntu shimbi inshita shonse.

²¹ Nga muntu ayiwamya nokwitalushako kufyabipa, akubati chipe ichamuchinshi. Akwipela nomutima onse kuli Shikulu wakwe ukuti amubomfye. Akuba uwayipekanya ukupyunga umulimo onse uuweme.

²² Elo webo utalukeko kumibele iibi iyabulumbwana. Uchite bwaka ifyalungama, ichichetekelo, ichitemweko nomutende pamo nabantu bonse abachinshika Bashikulu nomutima wabuta.

²³ Nomba utalukeko kumashiwi ayapuneme nokutalikishanya, pakuti walishiba ukuti mfi fileta bwaka ulubuli.

²⁴ Umupyungi waku Bashikulu talingilepo ukuba uwalubuli iyowo, kuntu uwamutima uuweme kubantu bonse. Alingile ukuba umuntu uwayishiba bwino ukusambisha nomutima umo.

²⁵ Uwafuka pakulungika abakomutalika. Nalimo Lesa kuti abapela inshita yakuti balapile nokwishiba chine.

²⁶ Penkapo amano abo akubwelelamo. Elo bakupuluka kukaliba kakwa Satana, uyo uubekata ukwebati bachite ifyo afwaya.