2 Tesalonika 3 - Chipangano Chabwangu

Mulokutulombelako kuli Lesa

¹ Mwe bawesu, ichakupelako nkoti mulokutulombelako kuli Lesa pakuti amashiwi aku Bashikulu asalangane bwangu-bwangu, nabantu abenji bapokelele mumuchinshi ukubati ifyo mwayapokelele.

² Elo mulokutulombelako ukuti Lesa atupokololeko kubantu ababi pakuti tebonsepo abachetekela iyowo.

³ Nomba Bashikulu bachishinka, bakulamukoselesha nokumuchingilila kuli njilya mbifi.

⁴ Elo Bashikulu balatupela ichichetekelo muli mwebo ukuti mwakutwalilila ukuchita ifyo twamwebele.

⁵ Bashikulu batungulule imitima yenu ukuti mwishibe ukutemwa nokufuka umutima kuli Klistu.

Ukubika umutima kunchito

⁶ Bawesu, tukomukonkobesha mwishina lyaku Bashikulu Yesu Klistu ukuti mutalamukeko kuli bawesu bonse abanang’ani nakambi abatafwayapo ukukonka ifyo twamusambishe.

⁷ Pakuti mwebo mwenka mulishibile bwino-bwino ifyo mulingile ukukonka. Tatwalipo abanang’ani ulo twali namwebo.

⁸ Tatwapokelepo ubwafwilisho ubuli bonse ukufuma kumuntu uuli onse ukwambula ukulipila iyowo. Nomba twabombele nokuchula fwenka akasuba nobushiku, ukuti twichushapo nangu umo muli mwebo.

⁹ Twachitile mfi, temulandu wakwebati tatukwetepo insambu ishakumweba ati mutwafwilisheko iyowo, kuntu ukuti chibe ichishibilo kuli mwebo.

¹⁰ Pakuti ulo twali namwebo twamupele ifunde ilyakuti, “Onse ukana ukubomba inchito talingilepo ukulya iyowo.”

¹¹ Twasosa mfi pantu twalyumfwa ukuti mukati kenu emobali abanang’ani, tababombapo, kuntu bafwaya ukwinjilila ifyabanabo epela.

¹² Mwishina lyaku Bashikulu Yesu Klistu twabakonkobesha mba bantu nokubachenjeshako ukuti babe nobumi ubwalungama nokubombesha pakuti bayisangile ifyakulya fyabo.

¹³ Nomba mwe bawesu, mwikatalapo ukuchita ifiweme.

¹⁴ Nga umuntu umo akokana ukunakila amashiwi amukalata nji, mutalukeko kuli ye. Mwiba pamo iyowo ukuti omfwe insoni.

¹⁵ Mumulinge ukubati kapondo kenu, kuntu mumuchenjesheko bwaka ukubati niwenu.

Amashiwi akupelako

¹⁶ Lekeni Bashikulu abene bamutende bamupele umutende munshita namunshila shonse. Bashikulu wesu babe namwebo bonse.

¹⁷ Nine Paulo nalemba nokuboko kwanji nkoti, “Mutende.” Kanshi amashiwi nga echishibilo chanji mumakalata onse. Efyo nemba.

¹⁸ Bashikulu wesu Yesu Klistu bamukwatile ubwanshi bonse.