2 Tesalonika 2 - Chipangano Chabwangu

Ifyamuntu uubipile

¹ Nomba ukulingana nokwisa kwaku Bashikulu Yesu Klistu namukulongana kwesu bonse kuli Ye, tukomupapata bawesu bonse

² ukuti mwifulungana mukulanguluka ati, “Akasuba kaku Bashikulu kafika.” Nangula basose ukuti nga mashiwi afumine kubusoseshi nangula ukusambisha kwesu, nangu ukwebati nifwe twalembele mukalata.

³ Mwileka umuntu nangu umo amubepepo munshila shonse pantu nkalya kasuba akatalayisa kufika kwakuba ukwalukila ubufumu bwaku Lesa. Elo umuntu uubipile ngulya akuboneka apatubile tuutu, elo akonaulwa.

⁴ Engulya uukotalikana na Lesa nokuyibika pamulu pali fyonse fikoyitwa ati balesa nangula ifyo balomba. Akwibika namunanda yaku Lesa. Elo akuyita ati ni Lesa mwine.

⁵ Napo tamukoyibukishapo ukwebati nalimwebele fyonse mfi ulo nali namwebo?

⁶ Elo mwalishiba ichintu ichikomukanya ukwebati eboneka nduno, kuntu akufisululwa panshita iilingile.

⁷ Napali njino nshita ububi epo bwaba, kuntu mubumfinsolo. Tekuti afisululwepo nomba ukufikila akafume ngulya uukomukanya.

⁸ Elo nomba nji mbifi yakufisululwa. Nomba Bashikulu Yesu bakumwipaya nomupu uufuma mukanwa kabo. Bakumonaula nokuboneka kwabo ukwabuta ulo bakwisa.

⁹ Umuntu uubipile ngu akwisa nefiso fyakwa Satana. Akuchita fyakushimbwisha nefipapwisho ifinji.

¹⁰ Elo akubomfya inshila ishibipile mukuchenjeleka bo abakwisa kufwa. Bakwisa kufwa pantu tabapokelelepo nokukonka ichine ichali nokubapulusha.

¹¹ Echo Lesa akuleka ukuti fikabaponene fyonse ifyabufi nokuti bafichetekele.

¹² Elo bakwisa kwipayikwa bonse abatachetekela ichine, bo abachita ifipile.

Lesa alimusala ukuti mukapuluke

¹³ Fwebo tulingile ukutotela Lesa inshita shonse pamulandu wakumwebo bawesu, mwe batemwekwa kuli Bashikulu. Pakuba Lesa amusalile ukufuma kukutatika ukuti mupuluke. Mwalipuluka pakuti Mupashi Wabuta alimuwamya. Elo panuma mwachetekele ifyachine.

¹⁴ Lesa amwitile kuli nchi ukupitila mu Butumi Bwawama ubo twamusambishe ukuti mukwate ubuleme bwaku Bashikulufwe Yesu Klistu.

¹⁵ Echo bawesu, mwimakane ndi nokwikatisha ifyo twamusambishe ulo twamushimikile nangula ifyo twalembele.

¹⁶ Nomba Bashikulu Yesu Klistu abene benka na Lesa Bata abatutemenwe, abatutalalike nokutupela ukulolela mubwanshi bwabo,

¹⁷ bamukoseleshe ukuti mulokusosa nokuchita ifintu ifiweme.