2 Tesalonika 1 - Chipangano Chabwangu

¹ Nine Paulo, Sailasi pamo na Timoti. Tukolembela mwebo mwe chilonganino chaku Tesalonika, ichaku Lesa Bata na Bashikulu Yesu Klistu.

² Lesa Bata na Bashikulufwe Yesu Klistu bamupele ubwanshi nomutende.

Ifyo Klistu akapingula bantu ulo akwisa

³ Bawesu, tulingile ukutotela Lesa inshita yonse pamulandu wakumwebo. Tulingile ukuchita mfi pamulandu wachichetekelo nokutemwana kwenu ukukokula.

⁴ Emulandu wine tulayipakisha muli mwebo mufilonganino fyaku Lesa. Tulachita mfi pamulandu wakushipikisha mukuchetekela kwenu namumachushi aakulu onse mukosanga.

⁵ Fyonse mfi filanga bwaka ukuti ubupingushi bwaku Lesa bwachine. Elo chamulinga mwebo ukuba abamubufumu bwaku Lesa ubo mukochulilamo nomba.

⁶ Nachine Lesa akuchita ichilungeme mukubika amachushi pali bo abakomuchusha.

⁷ Elo akumupela ukutusha mwe bakochula nomba pamo nafwebo. Akuchita mfi ulo Bashikulu Yesu bakufuma kumulu pamo na bangelo babo abafiso.

⁸ Akwisa nolubembela lwamulilo mukulanga bonse bankoma-matwi abakana Lesa nokusuula Ubutumi Bwawama ubusosa ifyaku Bashikulu Yesu.

⁹ Ukulandulwa kwabo kwakuti bakonaulwa umuyayaya. Tabakabonepo ichinso chaku Bashikulu nangu ubuleme bwabo nakambi iyowo.

¹⁰ Chakuba mfi ulo akwisa pali nkalya kasuba ukuti abo asala bamuchinshike, ina, bonse abachetekela bamuchinshike. Namwe mwakuba pamo pantu mwachetekela amashiwi ngalya twamusambishe.

¹¹ Ngu emulandu twamulombelako kuli Lesa ukuti mube abalinga mubwite bwenu. Elo tukolomba ukuti, mufiso fyakwe, amukoseleshe ukuchita ifiweme fyonse ifyo mukokabila ukuchita muchichetekelo chenu.

¹² Muli nji nshila, Bashikulu Yesu bakuchinshikwa muli mwebo, elo namwe mwakuchinshikwa pakuti muli babo. Fyonse mfi fyakuchitika pamulandu wabwanshi bwaku Lesa na Bashikulu Yesu Klistu.