2 Petulo 3 - Chipangano Chabwangu

Akasuba kaku Bashikulu

¹ Mwe batemwekwa, kalata nji nkomulembela yachibili. Mumakalata onse abili nga nkofwaya ukumwibukisha ukuti mulokulanguluka ifyachine mfi fyonse.

² Langulukeni amashiwi awo abasoseshi ababuta basosele kale, nefunde lyaku Bashikulu Umupulushi wesu mwapelwe kubatumwa.

³ Pakwamba mwishibe ukwebati panshiku shakulekelesha kwakwisa bamulengulwila, abakonka ifibi fyabo.

⁴ Bakusosa ati, “Napo tepo ngulya uwalayile ukuti akwisa? Nomba ali kwisa? Kale ifikolwe fyesu fyafwilile nefintu fyonse fili kubati nimfilya afilengele pakwamba.”

⁵ Bakolabukila mumbo kuti Lesa abumbile iwulu kwishiwi, nechalo ulo apatwile umulundu namenshi.

⁶ Elo ichalo nchilya chaonaikilwe kuchama.

⁷ Nomba Lesa namashiwi enka nga, asunga iwulu nechalo ifyo tubona nduno ukwebati akafyoche kumulilo. Alifisunga ukufikila pakasuba ako akupingula nokonaula abantu abatachetekela.

⁸ Mwe batemwekwa, pali chintu chimo icho tamulingile ukulabukilapo chakuti kuli Lesa akasuba kamo kali kubati myaka ikana limo, elo nemyaka ikana limo ili kubati kasuba kamo.

⁹ Tekwebati Bashikulu bakoshinga-shinga pakufikilisha ubulayo bwabo, kubati nimfilya bambi balanguluka, kuntu bakoteka umutima. Tabafwayapo ukuti umo aonayike, kuntu ukuti bonse balapile.

¹⁰ Nomba akasuba kaku Bashikulu kakwisa nga mung’o. Pakasuba nkalya iwulu lyakuluba nokubuluma ukukulu. Ifintu fyonse fyakupya nokusungulika kumulilo. Elo ichalo nefintu ifyabamo fyakupya shikiti.

¹¹ Nomba pakusanga ukuti ifintu fyakuba mfi, mulingile ukuba abantu bamusango shani? Mulingile ukwikala ababuta mukulomba kwenu.

¹² Mukolindila akasuba akakubwela kwaku Lesa ulo mupyunga mukwangufyanya akasuba nkalya. Pali nka kasuba ifyakumulu fyakupya nokonaulwa kumulilo, elo ifintu fyonse fyakusungulika kumulilo.

¹³ Nomba pakukonka ubulayo bwaku Lesa, tukolindila kumulu kwabwangu nechalo chabwangu, umo ichilungamo chakwikalamo.

¹⁴ Echo mwe batemwekwa, pakuti mukolindilila mfi fintu, mulokuchinchila ukwebati Bashikulu bakamusange abatakwetepo ifisemba, umulandu, elo abali mumutende na Bashikulu.

¹⁵ Mwishibe ukwebati Lesa akoteka umutima pantu akofwaya ukumupulusha. Echo naye Paulo, wesu watemwekwa, amulembele mfi nomulangwe uwo Lesa amupele.

¹⁶ Alasosa fyenka mfi mumakalata onse ambi. Mumakalata ngalya mwaba fimo ifikanga ukumfwa, ifyo abatasambilila nabatatekanya mumutima bapoteka nga mfilya bachita Amalembo ambi. Pakuchita mfi balayonaula benka.

¹⁷ Nomba mwebo mwe batemwekwa, pakuti mwalifishiba akale mfi, muchenjele ukuti bemulufya kububi bwambifi mfi. Shakumuseshapo apaweme apo mwimakene.

¹⁸ Nomba mukule mubwanshi namukwishiba ifya Bashikulu no Mupulushi wesu Yesu Klistu. Kuli Ye kube ubuleme nomba nomuyayaya. Ameni.