2 Petulo 2 - Chipangano Chabwangu

Ifyabasambishi ababufi

¹ Nomba pali abasoseshi ababufi pakati kabena Isilaeli. Echo napali mwebo pakuboneka bakasambisha ababufi. Bakwinjisha mubumfinsolo ifyakusambisha ifyabufi ifyonaula, bakukana na Bashikulu kumo bo ababapulwishe. Echo bakwiletela ubonaushi.

² Abenji bakukonka ubumi bwabusali bwabo. Echo abantu abenji bakusula inshila yachine pamulandu wabo.

³ Mukufwaya ukunonka ububoni, bakunonkelapo pakumweba amashiwi ayabufi. Nomba umulandu wabo balipingwilwe kale, nokonaulwa kwabo kukobalindilila.

⁴ Pakuba Lesa talekelele abangelo ababifishe mbalya, kuntu alibaposele muchibembela chamulilo, muchilindi chamfishi uko bakakilwe ukulindila ukupingulwa.

⁵ Lesa takwetepo inkumbu pabantu abakale mbalya, kuntu asungile Nowa bwaka, kashimika wabulungami, pamo nabambi basano na babili, ulo atumine ichama pabantu abatomfwilapo Lesa.

⁶ Lesa aonawile umusumba wa Sodomu na Gomola kumulilo ukufikila yaba imitoyi bwaka ukuti chibe ichakuchenjesha abantu abakwisa kutomfwilapo Lesa.

⁷ Nomba apulwishe Loti umuntu uyo alungamikile, uwachulile mumutima pabwikashi bwabusali ubwabantu abatomfwila Lesa.

⁸ Umuntu ngulya, uwayikele pakati kabo, alikuchula mumutima, akasuba nakasuba pabwikashi bwabo ububi ubo alikubona nokumfwa.

⁹ Nomba Lesa alishibile umwakubapokolwelamo abamulomba ukufuma kumesho. Elo alishibile nokupela umulandu abatalungama ulo bakolindila akasuba kakulekelesha.

¹⁰ Ukuchilapo akupela umulandu abafunga ifibi ifyabuntunse nokusuula bakateka. Mba basambishi ababufi baba abashipa nakambi bankalwe, abatachinshikapo abansambu abakumulu. Elo balabatuka. Nangu bangelo abafiso ukuchila mba pachinso chaku Lesa.

¹¹ Nangu bangelo, abakwete ifiso nokuchindama ukuchila abasambishi babufi, tabasalulapo bakateka pamenso aku Bashikulu.

¹² Ukuba mba bantu bali kubati ninama ishitakwetepo amano, ishapangilwe ukuti shiikatwe nokwipayiwa. Balasalula ifintu tabeshibilepo. Nabo bakonaulwa kubati ninama.

¹³ Bakonaulwa ukulingana nokubipa kwabo. Ichibawamina kusekesha imibili yabo akasuba konse. Nibamwansha nsoni, abali kubati fisemba ifikowesha. Pakuba ulo balya pamo nenu balasekelela mukuchita ifyabufi.

¹⁴ Amenso abo abuchende, abatafwayapo ukuleka ukubifya. Bachenjeleka abanaka imitma. Imitima yabo yayiwula bukabundulu. Bantu abalapishiwa.

¹⁵ Balisha inshila iinenene, baluba pakukonka inshila yakwa Balaamu mwana Beoli, uwatemenwe ukunonka mukuchita ifibi.

¹⁶ Nomba bamwebawile pamulandu wakubifya kwakwe. Punda, inama iitasosapo, yasosele kubati muntu, ukukanya ukupena ukwamusoseshi ngulya.

¹⁷ Abasambishi babufi mba bali kubati tumfuku-mfuku ututakwetepo amenshi, kubati aapintwa kuchipupu. Lesa alibasungila imfishi ifitile fititi.

¹⁸ Mba bantu basosa amashiwi ayakuyitutumuna yapuneme aatakwetepo nakantu. Elo mukufunga ifibi ifyabuntunse, balachenjeleka abantu abapulwike bwangu pabanabo abekala mufibi.

¹⁹ Balabalaya ubwinalale, apo bena basha abafintu ifyonaula. Pakuba umuntu alaba umusha wachintu icho ichamuchimfya.

²⁰ Kati abantu bapuluka kufyabipa ifyamuchalo mukwishiba Bashikulu no Mupulushi wesu Yesu Klistu, elo nakambi bayikatwa nokuwila mufibi, pakulekelesha bakuba ababipile ukuchilapo mfilya bali pakwamba.

²¹ Nga chaliweme kuli bo nga chakuti tabayishibilepo inshila yalungama ukuchila ukwishiba elo panuma basuula ifunde lyabuta Lesa abapele.

²² Ulo bachita mfi, bafikilisha insoselo imo iyakuti, “Imbwa ibwelela kumalushi ayiko.” Nayimbi ilya iisosa ati, “Inkumba iisambile ilabwelela nakambi mukwalangana mumatipa.”