2 Petulo 1 - Chipangano Chabwangu

¹ Nine Simoni Petulo, umupyungi nomutumwa waku Yesu Klistu. Nkolembela kuli bo abapokelele ichichetekelo icho nafwebo twapokelele ukupitila mubulungami bwaku Lesa no Mupulushi wesu Yesu Klistu.

² Lesa amukwatile ubwanshi nokumupela umutende ukufikapo mukumwishibisha ifyaku Ye na Yesu Shikulu wesu.

Lesa ayitile nokusala abena Klistu

³ Lesa, mufiso fyakwe, alitupela fyonse ifitwafwilishako ukuba nobumi nokulomba ukwachine. Achitile mfi ukupitila mukwishiba Lesa uwatwitile pamulandu wabuleme nokuwama kwakwe.

⁴ Muli mfi alitupela ifilayo ifikulu ukwinekantu ukuti mukapokelele ubumi bwaku Lesa panuma yakupulushiwa kukonauka kwapanonshi pamulandu wakufwaya ububi.

⁵ Nomba mweshe ukwinekantu ukulundako ubwikalo ubuweme kuchichetekelo chenu, nomulangwe kumano enu ayo.

⁶ Elo mulundeko ukuyisunga kumulangwe ngu, ukukosapo pakwisunga kwenu, nokulomba Lesa mukushipikisha kwenu kwenka.

⁷ Kukulomba mulundeko inkumbu ishabwanankashi. Elo pankumbu nshi, lundenipo ichitemweko.

⁸ Nga mfi fyayikala muli mwebo ukuchishapo, tamwabepo abakangiwa nangu abatakwetepo akantu pamanu aakwishibilapo Bashikulu wesu Yesu Klistu.

⁹ Nomba uutakwetepo mfi nimpofu, tekuti abonepo apatali. Alilabile ukuti balimunakilila kumabifyo akwe aakale.

¹⁰ Echo mwe bawesu, chinchileni ukuchilapo ukushininkisha ukwebati Lesa alimwita nakambi alimusala. Nga mwachita mfi, tekuti muwepo iyowo.

¹¹ Elo mwakwisulilwa umulyango uwakwinjilila mubufumu ubutashilapo ubwaku Bashikulu na Mupulushi wesu, Yesu Klistu.

¹² Echo shalekepo ukumwibukisha mfi inshita shonse nangu mulifishibile kale, elo mulachetekela ichine icho mwapokelele.

¹³ Nkolanguluka ukwebati chintu ichiweme ukumwibukishako mfi fintu ulo nchili nobumi mumubili nguno.

¹⁴ Pakuba ndishibile ukwebati inshita yakufuma mumubili nguno yapalama kubati nimfilya banjebele Bashikulu wesu Yesu Klistu.

¹⁵ Elo nalayesha ukwebati nangu nafumapo, mulokwibukisha fyonse mfi inshita yonse.

Bakamboni babuleme bwaku Klistu

¹⁶ Fwebo tatwakonkelepo utushimi utwakupanga ulo twamwishibishe ifyafiso nokubwela kwaku Bashikulu wesu, Yesu Klistu. Twalibwenene fwebene namenso esu ubukulu bwakwe.

¹⁷ Pakuba alipokelele umuchinshi nobuleme ukufuma kuli Lesa Bata ulo ishiwi lyafumine kuli Lesa uwabuleme nokusosa ati, “Ngu Mwana wanji uwatemwekwa, muli Ye emo mbekelamo.”

¹⁸ Fwebene twalyumfwile ishiwi ndi ilyafumine kwiulu ulo twali palupili ulwabuta.

¹⁹ Nomba tulishibile ukuti amashiwi aabasoseshi nga achine. Mwakuchita ichiweme nga mwayomfwila, pakuba ali kubati ninyali iisanika mumfishi kumacha ulo intandala yaluchelo yamba ukusanika mumitima yenu.

²⁰ Ichikulu mwishibe ukwebati tapapo umuntu ungalondolola amashiwi aabasoseshi aalembelwe mu Malembo palwakwe umwine.

²¹ Pakuba amashiwi aabasoseshi tayishilepo mukufwaya kwamuntu iyowo, kuntu Mupashi Wabuta alilengele ukuti basose amashiwi aafumine kuli Lesa.