2 Kolinto 9 - Chipangano Chabwangu

Ifyakwafwilisha abena Klistu banesu

¹ Tanshilingilepo nokumulembela pabwafwilisho tukopela abantu baku Lesa abaku Yudeya.

² Ndishibile ukwebati mukofwayilisha ukwafwilisha. Echo ndayitutumuna kubena Masedoniya pamulandu wenu. Ndabeba ati, “Bawesu baku Akeya baliyipekenye kale umwaka washila ukuti bafwilishe.” Elo ukufwaya kwenu kwakoselesha abenji.

³ Nomba nkotuma bawesu mba ukwebati ukuyitutumuna kwesu pali mwe kwibapo ukwabwaka, kuntu mube abayipekanya kubati nimfilya nasosele.

⁴ Nomba nga abena Masedoniya bambi banshindika, elo bakamusange ukwebati tamuyipekenyepo, mwakungumfwisha insoni ukwinekantu. Ukuyitutumana kwesu pali mwe kwakuba ukwabwaka, chikanga mwebo mwakuba nensoni ukuchilapo.

⁵ Echo nalilangulukile ukwipusha bawesu mba ukuti bese kuli mwe ulo nshilayisa. Elo nokuti bapekanye kabela ichabupe icho mwalayile. Ulo nkesa chakuba ichapekanishiwa kale, ichabupe ichinenene, ichitapelwepo mukukakatisha.

⁶ Mwibukishe nchi ichakuti uuminsa utunini, akusepa utunini, uuminsa ifinji akusepa ifinji.

⁷ Chila muntu apele kubati ifyo apekenye mumutima wakwe. Temukuyilishanyapo nangu ukukakatishiwa, pakuti Lesa atemwa uupela nokusangalala.

⁸ Lesa kuti amupela ishuko ukuchilapo ukuti lonse mulekwata ifyo mukabila nafimbipo ifyakubombelapo imilimo iiweme.

⁹ Kubati nimfilya chalembwa ati, “Apela abachula bonse kubati kumisa, ukulungama kwakwe kwamuyayaya.”

¹⁰ Lesa uupela imbuto nefyakulya kubalimi akumupela imbuto ukuti mubyale, elo akushifusha. Akafusha nakambi ifisabo ifyabupe bwenu ubwankumbu.

¹¹ Akumuchindamika muli fyonse ukwebati mulokupela inshita shonse, elo abenji bakutondayisha Lesa pamulandu wabupe bwenu ubo twakubatwalilako.

¹² Umulimo ngu mukochitila abantu baku Lesa, tamukoafwilisha bwaka pafyo batakwetepo, kuntu bantu abenji bakutondayisha Lesa ukwinekantu.

¹³ Pakuti ichabupe bwenu nchi chikomuchitila bukamboni ubwakuti inkumbu shenu shachine, bo bakutondayisha Lesa pamulandu wakunakila Ubutumi Bwawama ubwaku Klistu ubo muyebelela. Bakuchita mfi nakambi pamulandu wakwakana nabantu bo elo nabambi ifintu ifyo mukwete.

¹⁴ Nomba bakumubwenesha ukutemwa kwabo pakumulombela pakuti Lesa amukwatile ubwanshi apakulu.

¹⁵ Tutondayishe Lesa pachabupe bwakwe ubo tatungasosapo.