2 Kolinto 8 - Chipangano Chabwangu

Ifyabupe bwabena Klistu

¹ Mwe bawesu, tukofwaya ati mwishibe ifyo Lesa ashukishe ifilonganino fyaku Masedoniya.

² Abantu bafilonganino mfilya bayeshiwe ukwinekantu kumachushi, nomba tabalekelepo ukusekelela kwabo. Echo balipele namaboko abili nangu bali abachula ichine.

³ Nebo ndikamboni wabo uwakuti balipele apapelele ifiso fyabo, nachine ukuchilapo napafiso fyabo.

⁴ Ukwambula ukubakakatisha, balitupapatile ukuti tubasuminishe ukwebati nabo bafwilisheko abantu baku Lesa abaku Yudeya.

⁵ Balichite umo tatwali kubalangulukilapo. Pakwamba baliyipele kuli Bashikulu. Elo mukufwaya kwaku Bashikulu, baliyipele nakuli fwe.

⁶ Echo twapapatile Taitasi ukuti ashilishe umulimo ngu uwakwafwilisha pakuti ewautatikile pali mwebo.

⁷ Kubati nimfilya muli abachila muli fyonse: Mukuchetekela, mukusosa, mukwishiba, mukufwayilisha ukwafwa namukututemwa. Efyo mukachilepo namukupela nku ukwakwafwilisha.

⁸ Tefundepo nkososa ulo nkomweba mfi. Ulo nkomweba ifyakuchinchila kwabantu bambi, nkofwaya bwaka ukwishiba nga ukutemwa kwenu kwachine.

⁹ Pakuba mwalishiba ubwanshi bwaku Bashikulu wesu Yesu Klistu. Nangu bali abachindami, bayishile kuba abachula pamulandu wenu, ukwebati mukuchula kwabo, mwebo mube abachindami.

¹⁰ Nomba amashiwi anji pali ngu mulandu yakuti chiweme ukwebati mushilishe icho mwatatikile umwaka washila ngu, tepakufwayapo ukuchita bwaka, kuntu ukufichitapo.

¹¹ Echo nomba shilishenipo umulimo ngu. Mpalya mwali abachinchila ukufwaya ukufichita, nomba chinchilenipo mukufikilisha ukulingana nefyo mukwete.

¹² Nga umuntu akofwaya ukupela, Lesa alapokelela mukutemwa ubupe ubo umuntu ngulya akwete. Echo tabapatikisha ukuti apele ifyo takwetepo.

¹³ Nshikososapo ati mwebo mulemenwe, elo bo bangukilwe, sembi ukuti kube umulinganya.

¹⁴ Pakuti nomba mwebo muli nefinji, afwilishenipo bo abachula, pakuti nabo kuntanshi bakuba nefinji, elo bakumwafwilishako ifyo tamwakakwatepo. Echo kwakuba umulinganya.

¹⁵ Kubati nimfilya Amalembo asosa ati, “Umuntu uwatutile ifinji, tafyachililepo nangulya uwatutile utinini, tatwamuchepelepo.”

Ifyakwa Taitasi nabanakwe

¹⁶ Tutotele Lesa pakuti abikile umutima wakufwaya ukwafwilisha muli Taitasi kubati nimfilya twafwilisha nafwe.

¹⁷ Pakuba tachitilepo fyenka ifyo twamupapatile ukuchita, kuntu ukufwaya kwakwe kwali ukukulu ichakuti alaile umwine kwisa kuli mwe.

¹⁸ Pamo na ye tukotuma wesu ngulya uwayishibikwa nefilonganino fyonse pamulandu wamulimo wakwe uwakushimika Ubutumi Bwawama.

¹⁹ Tefyenka mfi iyowo, ifilonganino fyalimusalile nakambi ukuti akatushindike pakutwala ifyabupe ifyakwafwilisha. Tukochita mfi mukuchinshika Bashikulu nokubwenesha ukufwaya kwesu mukwafwilisha.

²⁰ Tatukofwayapo ukuti abantu basangepo apakutushobawila ulo tukopela ifyabupe mfi ifinji.

²¹ Fwebo tukofwaya ukuchita ifiweme, tepamensopo aku Bashikulu bwaka, kuntu napamenso aabantu.

²² Pamo nabo, tukotumapo nawesu umbi. Twamweseshe munshila ishinji, nomba twasanga ukuti ali uwayipelesha. Echo akofwayisha ukuchilapo ukwafwilisha pakuti aamuchetekela ukwinekantu.

²³ Ukusosa pali Taitasi, emubomfi munanji uwayikatana pamo nane pakwafwilisha. Ukusosa ifyabawesu bambi bo, balitumwa nefilonganino, elo Klistu akochinshikwa pamulandu wabo.

²⁴ Echo mubabweneshe ichitemweko chenu ukwebati ifilonganino fyonse fichibone nokwishiba ati tatukobifyapo pakwitutumwinapo pali mwe.