2 Kolinto 7 - Chipangano Chabwangu

¹ Nomba, mwe batemwekwa, pakuti tuli nobulayo mbu, katufumyepo ifintu fyonse ifikowesha imibili yesu nangu imitima yesu. Elo mukuchinshika Lesa, twikale ubumi ubwaololoka nakambi ubwabuta.

Paulo asangalala

² Mutupelepo ichifulo mumitima yenu. Tatwabifishapo umuntu nangu umo, nangu ukonaula nangu ukuchenjeleka.

³ Nshikososapo mfi ukwebati musangwe abamulandu. Kubati ifyo nsosele kale, mwebo mwaba mumitima yesu nangu kumfwa nangu kubumi.

⁴ Nalimuchetekela ukwinekantu. Elo ndayitutumwina pali mwe. Mukuchula kwesu konse tukoshipikisha, elo tuli abasekelela.

⁵ Nangu ulo twafikile ku Masedoniya, tatwakwetepo ukutusha iyowo. Twalikuchushiwa munshila ishinji. Panse twalikulwana notupondo twesu, elo mukati twali nomwenso.

⁶ Nomba Lesa uukoseleshako abanakile imitima, alitukoseleshe ulo Taitasi afikile.

⁷ Tekufika kwakwe bwaka iyowo, kuntu namashiwi aasosa ifyo mwamukoseleshe. Alitwebele ati mukonkabila ukwinekantu, ukuchula kwanji kukomuchusha, elo nokuti muli abayipekanya ukungafwilishako. Epamulandu ngu nkosekelela ukwinekantu.

⁸ Kalata yanji njilya yalimunyekesha imitima, nomba nshikoyibwelamo pakuti nalilemba. Nalibwelelemo pakwamba pakubona ukuti yalimunyekeshe imitima, nangu kali akashita kanini bwaka.

⁹ Nomba ndesekelela, tepakumunyekeshapo imitima, kuntu pakwaluka kwamitima yenu. Ukuchula kwenu kwaumfwikilwe kuli Lesa. Echo tatwamuposelepo akantu akaweme nangu kanini.

¹⁰ Insoni ishisekesha Lesa shipilibula umutima wamuntu ukwebati apuluke. Elo chilashila penka mpalya. Nomba ukuba nensoni kubati bantu abatemwa ifyapanonshi, kuleta imfwa.

¹¹ Boneni ifyo insoni shenu ishifuma kuli Lesa ifyo shamuchitila: Shamupela ukuchinchila, ukushininkisha ukwebati tamukwetepo umulandu, ukunyeka imitima nomwenso uukulu. Shamupela ukufunga ukumbona, ukufwayilisha ukungafwilisha, elo nokupela umulandu abachita ifibi. Pali fyonse mfi, pali ukushininkisha ukwebati tamwabifishepo iyowo.

¹² Echo nangu nalimulembele kalata njilya nshayilembelepo pamulandu wamuntu ngulya uwabifishe, nangu pamulandu wangulya abifishe iyowo. Nalembele ukwebati pamenso aku Lesa mwishibishe ati ukufwayilisha kwenu mukungafwa kukulu nakambi.

¹³ Mfi fyatukoselesha ukwinekantu. Ukuchila mpa, ukusekelela kwakwa Taitasi kwatukoselesha ukuchilapo pakuti mwe bonse mwalikumusekesha.

¹⁴ Nalimwebele ati ndayitutumuna pali mwe pamulandu wakwa Taitasi, elo tamungumfwisheko insoni. Nomba kubati fyonse ifyo namwebele fyali ifyakwebesha, mumo mwine nokuyitutumuna kwanji kuli mwe pali ye kwali ukwakwebesha.

¹⁵ Ukuchilapo Taitasi akosekelela ukwinekantu ulo ebukisha ifyo mwaumfwile amashiwi anji, nefyo mwamupokelele mumwenso nokututuma.

¹⁶ Ndinokusekelela ukwinekantu pakuti kuti namuchetekela pali fyonse.