2 Kolinto 6 - Chipangano Chabwangu

¹ Pakuti nomba tubombela pamo na Lesa, mwialula ukushuka uko Lesa amupele ukuba ukwabwaka.

² Pakuba Lesa alisosele ati, “Panshita yabwanshi bwanji, nalikumfwile, pakasuba kakupulusha nalikwafwilishe.” Umfweni, nji enshita ilingile iyo Lesa akochitila ubwanshi abantu. Nkano ekasuba kakupuluka.

³ Tatubikapo ifyakuyitutulako abantu munshila, ukutina ukwebati umulimo wesu ungasuulwa.

⁴ Nomba muli fyonse tulayilanga abapyungi baku Lesa pakushipikisha ukwinekantu mumachushi, mukufinya namumafya.

⁵ Mukupumwa, mukuposwa muchifungo namufimfulunganya. Mukubombesha, mukutona utulo namunsala.

⁶ Nakambi tulayilanga ukuti tuli bapyungi baku Lesa mukuba abapatulika, mukwishiba ifintu ukufikapo, mukushipikisha, munkumbu, mu Mupashi Wabuta namukutemwa ukufikapo.

⁷ Mukusosa amashiwi aakwebesha, elo mufiso fyaku Lesa. Mukulwa kwesu tulachita ifilungeme.

⁸ Abantu balatuchinshika nokutusuula penka. Balasosa ifibipile pali fwebo nefiweme kumo. Balatulangulukila ukuba ababufi, nangu tuli abakwebesha.

⁹ Balatulinga abatayishibikwa, nangu tuli abayishibikwa. Balatulinga abafwa nangu tuli ababumi. Balatulinga abapumwa, nangu batatwipeye.

¹⁰ Balatulinga abantu abansoni, nangu tuli basekelela inshita shonse. Balatulinga abachula, nangu tulenga abenji ukuba abachindami. Balatulinga abatakwetepo akantu, nangu tulikwete fyonse.

¹¹ Mwe abena Kolinto, twasosa ifintu mubwanalale nemitima yesu ilisukile.

¹² Tatwamwisalilepo imitima yesu iyowo, kuntu mwebo mwatwisalile imitima yenu.

¹³ Nkososa kuli mwe nga bana banji. Mutuchitile fyenka ifyo twamuchitilepo mwebo pakutwisulila imitima yenu.

Paulo abachenjesha pafyakwikatana nabatachetekela

¹⁴ Mwilokwikatanapo nabatachetekela. Napo ubulungami bungaba shani pamo nobubi? Napo ukusanika kungaba shani pamo nemfishi?

¹⁵ Mba Klistu angekatana shani na Satana? Mba chindo umwina Klistu noutachetekela bangakana pamo?

¹⁶ Mba inanda yaku Lesa ingalingana shani natungosa wakubasa? Fwebo tuli nanda yaku Lesa uwabumi kubati nimfilya umwine asosele ati, “Nakuba pakati kabantu banji, elo nakwikala nabo. Nakuba Lesa wabo, elo nabo bakuba abantu banji.”

¹⁷ Echo Bashikulu bakoti, “Fumenipo pali bo, ipatuleni kuli bo. Mwikumyako kukantu akakowela, elo nakumupokelela.”

¹⁸ Nakuba Wishinwe, mwebo mwakuba abana banji abalalume nabanakashi, efyo basosa Bashikulu Abafiso fyonse.