2 Kolinto 5 - Chipangano Chabwangu

¹ Imibili iyo tuli nayo ili kubati lusasa bwaka. Nomba tulishibile ukwebati ulo ulusasa ndu lwakonayika, twakuba munanda iyo Lesa alitupekanishisha kumulu. Inanda nji tayayimakilwepo neminwe yabantu, elo yamuyayaya.

² Echo tutenda nokufunga ukufwikwa inanda yesu nji iyakumulu.

³ Pakuba ulo twafwikwa, tatwayise kuba ababwamba iyowo.

⁴ Ulo tuchili muli njino nanda, tulatenda nokulemenwa. Tepamulandu uwakuti tukofwaya ukufula ulusasa ndu iyowo, kuntu ukuti tufwikwe inanda yakumulu pakwebati ichafwa chaaluke ichabumi.

⁵ Lesa eutusunga ukwebati tukapoke ifintu mfi. Elo alitupela Umupashi Wabuta nge chishibilo chakwe.

⁶ Echo fwe bonse tulashipikisha. Elo twalishiba ukuti inshita yonse twikala mumubili kubati kwesu, ekwebati tuli ukutali na Bashikulu.

⁷ Pakuba ichikulu kuchetekela tepafyakubona namenso.

⁸ Ina, tukoshipikisha, nomba icho tufwayisha chakuti tufume mumubili nguno nokuba nowaku Bashikulu.

⁹ Echo nangu tuli muno nangu muli Bashikulu, tufwaya ukubasekesha.

¹⁰ Pakuba fwe bonse twakuya kubonekela pachinso chaku Klistu ukuti akatupingule. Kwenka nkulya uuli onse akupokelela ifimulingile, ukulingana nefyo achitile panonshi, ifiweme nangula ifibipile.

Ifyakuwikishanya na Lesa muli Klistu

¹¹ Nomba pakuti tulishibile ati Bashikulu balingile ukubatina, tulesha ukukoselesha abantu. Lesa alitwishiba ukufikapo, elo nkochetekela ukuti namwe mwalitwishiba bwino-bwino mumitima yenu.

¹² Tatukoyitondayisha fwebene kuli mwe nakambi iyowo. Tukofwaya ukwebati mwebo muleyitutumwina muli fwe. Tukofwaya ukwebati mukwate ichakwasuka bo abakoyitutumwina pafiboneka namenso bwaka, ukuchila ifyamumutima.

¹³ Nga chakuti twalikuboneka kubati tulipenene, twalichitile mfi ukuti tuchinshike Lesa. Nomba nga tukochita ifyamano, nipamulandu waku mwebo.

¹⁴ Chitemweko chaku Klistu echikotutungulula. Pakuba tulachetekela ukwebati umo alitufwilile bonse, echo bonse balifwa.

¹⁵ Afwilile abantu bonse ukwebati abali nobumi beyisekesha abene benka, sembi basekeshe Ye uwabafwilile, elo uwabukile kubafwa pamulandu wabo.

¹⁶ Echo ukufuma nduno fwebo tatulangulukilapo ifya muntu uuli onse pamano ayabuntunse. Nangu akale twalikulanguluka ifyaku Klistu mumano yabuntunse, nomba nduno tatulangulukapo ifyaku ye munshila nji.

¹⁷ Nga umuntu ali muli Klistu, alengwa wabwangu. Ifyakale fyapita, ifyabwangu nomba efishile.

¹⁸ Uwachitile fyonse mfi ni Lesa uwo, ukupitila muli Klistu, alituwikishanya na Ye. Elo alitupela umulimo uwakulenga bambi ukuba abanakwe nabo.

¹⁹ Mubilisha ukuti muli Klistu, Lesa awikishanya abamuchalo nakwe ukwambula ukupenda amabifyo abo. Echo atupele nga mashiwi ayasosa ukuwikishanya nku.

²⁰ Nomba nifwebo intumi ishakubelako Klistu. Lesa akomupapata ukupitila muli fwebo. Echo tukomupapata mwishina lyaku Klistu ukuti muwikishanye na Lesa.

²¹ Klistu takwetepo ububi. Nomba Lesa apinte ifibi fyesu ukwebati atulungamike muli Ye.