2 Kolinto 4 - Chipangano Chabwangu

Ifyabuboni munongo

¹ Lesa, mubwanshi bwakwe, alitupela umulimo ngu. Echo tatunenuka imitima.

² Twaposele inshila shonse ishamubumfisolo neshansha nsoni. Tatubomfyapo ubuchenjeshi nangula ukwalula amashiwi aku Lesa. Tufwaya ukuti abantu bonse batusuminishe nemitima yabo.

³ Nangu Butumi Bwawama ubo tukobilisha bwaba ubwafimbwa, bwalifimbwa kuli bo abakoloba.

⁴ Bo tabachetekelapo pakuti Satana, lesa wapanonshi, alibafimba ukuti belokubona ukusanika kwa Butumi Bwawama. Ukusanika nku kubwenesha umuchinshi waku Klistu. Elo muli Ye Lesa alaboneka.

⁵ Echo tatwishimika fwebene, sembi Yesu Klistu ukuti e Shikulu. Fwebo tuli ntumi shenu bwaka pamulandu waku Yesu.

⁶ Lesa asosele ati, “Ukusanika kwise ukufuma mumfishi.” Lesa enka ngu ewatusanikile mumitima yesu ukwebati abantu beshibe umuchinshi waku Lesa ngu uukosanika pachinso chaku Klistu.

⁷ Nomba fwebo tuli nongo bwaka ishakusungilamo mbu buboni ukwebati peshibikwe ukuti ifiso ifikulu mfi fyaku Lesa, tefyabantupo iyowo.

⁸ Tulachushiwa munshila ishapusana-pusana, nomba tatushonwapo. Amano alashila, nomba tatutompokapo umutima.

⁹ Utupondo twesu tulatuchusha, nomba tatubulapo uwakutwafwilisha. Tulafwantwa panshi, nomba tatonaulwapo iyowo.

¹⁰ Inshita shonse twenda nemfwa yaku Yesu mumibili yesu ukwebati ubumi bwakwe buboneke mumibili yesu.

¹¹ Mubumi bwesu bonse tukopelwa kumfwa pamulandu waku Yesu ukwebati ubumi bwakwe buboneke mumibili yesu iifwa.

¹² Echo imfwa yaba pali fwebo, nomba nchi chimupela mwebo ubumi.

¹³ Amalembo asosa ati, “Nalichetekele, echo nalisosele.” Pakuti nafwe twalichetekela, echo tulasosa.

¹⁴ Twalishiba ukuti Lesa uwabushishe Bashikulu Yesu kubafwa, akutubusha nafwe pamo na Yesu. Elo akutufisha pamenso akwe pamo namwe.

¹⁵ Ichikulu pali mfi chakuti mwebo musange ishuko ukwebati, nga ifyo bantu Lesa ashukisha balefulilako, nabo abatondayisha Lesa bafulileko nokumupela umuchinshi.

Ukwikala muchichetekelo

¹⁶ Echo tatutomposha umutima. Nangu imibili yesu ikoba yanaka, nomba mumitima yesu tukopokelela ifiso fyabwangu akasuba nakasuba.

¹⁷ Amachushi esu alyanguka, elo yakashita kanini, nomba yakutuletela umuchinshi uukulu ukuchilapo, elo wamuyayaya.

¹⁸ Imitima yesu tayilipo pafintu ifiboneka, sembi pafitaboneka. Pakuba ifiboneka tafikalililapo, nomba ifitaboneka efyamuyayaya.