2 Kolinto 3 - Chipangano Chabwangu

Abapyungi bachipangano chabwangu

¹ Ekwebati pali mfi tukoyichitila bukamboni fwenka? Napo kukofwayikwa ukuti fwebo, nga abantu bambi, tube namakalata ayakupela bukamboni kuli mwe nangu aafumina kuli mwebo?

² Kalata yakutuchitila bukamboni nimwebo. Yalembele mumitima yesu ukwebati abantu bonse bayishibe nokwipenda.

³ Abantu bonse bangabona ukuti nimwe kalata yafumine kuli Klistu, iyalembelwe ukupitila muli fwebo, tekuli inki, kuntu ku Mupashi Wabuta waku Lesa wabumi. Tepafyalembwa pamabwe, kuntu mumitima yabantu.

⁴ Lesa alishiba ukuti tukososa mfi pakuti Klistu eutupela ukushipa umutima mfi.

⁵ Pakuba muli fwebo fwenka tekuti tuchitepo umulimo uwa mfi. Ifiso fyesu fifuma kuli Lesa.

⁶ Eutupela ifiso ifyakupyungila chipangano chabwangu, temumafunde aalembwa, kuntu mu Mupashi Wabuta. Pakuti Amafunde aalembwa aleta imfwa, nomba Umupashi Wabuta upela ubumi.

⁷ Amafunde aalembelwe pamabwe mpalya, apelwe nomuchinshi uukulu ichakuti abena Isilaeli tabalikulolekesha Mosesi pachinso pamulandu wakubengeshima kwakwe. Nomba ukubengeshima nkulya kwali kwakashita kanini bwaka. Nomba nga Amafunde ngalya aaleta imfwa alipelwe nomuchinshi wamfilya,

⁸ napo umulimo wa Mupashi Wabuta tawakakwatepo umuchinshi ukuchilapo?

⁹ Nga umulimo wakupela imilandu bantu wali wamuchinshi, ekwebati umulimo uulenga abantu ukuti bapuluke wakuba wamuchinshi ukuchilapo.

¹⁰ Pakuti kuli umuchinshi ngu uwaboneka nduno, ifintu ifyakwete umuchinshi kale nomba tafipo akantu.

¹¹ Nomba ifintu ifyakashita kanini fyalishile nomuchinshi, ekwebati ifyakubelelela fyakuba nomuchinshi ukuchilapo.

¹² Pakuti tukolindilila mfi, tulashipikisha ukwinekantu.

¹³ Tatuli nga Mosesi uwafimbile insalu pamenso ukutina ukwebati abena Isilaeli bangabona ulo ukubengeshima kwakwe kukoshila.

¹⁴ Nomo imitima yabo yalikosele, ukufika nanduno ichinsalu nchilya chilibafimbile nangu ulo bapenda amabuku ayamuchipangano chakale. Ichinsalu nchilya balachifumya ulo umuntu aba muli Klistu.

¹⁵ Nangu nduno, inshita bapenda Amafunde akwa Mosesi, chinsalu nchilya chifimba imitima yabo.

¹⁶ Nomba umuntu nga aalukila kuli Bashikulu, chinsalu nchilya balachifumya.

¹⁷ Ulo tusosa ati, “Bashikulu” tukososa Mupashi Wabuta. Elo ukuli Mapashi wa Bashikulu kuli ubwanalale.

¹⁸ Fwe bonse, abatakwetepo ichifimba pamenso esu, tubwenesha umuchinshi waku Bashikulu kubati nimfilya ichilola chilanga umuntu ichinso. Echo umuchinshi wenka ngulya, uufuma kuli Bashikulu, abali Mupashi, balatwalula ukuti tube muchipasho chabo ichamuchinshi uwachilapo.