2 Kolinto 2 - Chipangano Chabwangu

¹ Echo nalilangulukila ukuti niisa kuli mwe nokumuchusha nakambi.

² Nga ninebo nkomunyekesha imitima, mba uwakunsangalasha akuba nani? Napo temwepo mwenka mwe nkonyekeshapo imitima?

³ Echo namulembele kalata njilya. Nshafwayile ukwisa kuli mwe ukutina ati mwebo mwe balingile ukunsangalasha mwinganyekeshapo umutima. Nalishiba ukuti nga ndisangalile, namwebo bonse mulasangalala.

⁴ Nalimulembele muchakuchula namukunyeka kwamutima nemisonshi. Nshafwayilepo ukumuchusha imitima, sembi ukuti mwishibe ukwebati nalimutemwa ukwinekantu.

Munakilile imbifi

⁵ Nomba umo nga alichitilepo akantu akafwinya umutima, tenepo nenka afwinyishe umutima iyowo, kuntu mwe bonse, mukutafikosha pali ye.

⁶ Chiweme pakuti abenji mwamupela umulandu umuntu uuli mfi.

⁷ Nomba chiweme ukuti mwamunakilila nokumukoselesha ukwebati mwimwansha nsoni ukwinekantu nokumulenga ukunenuka.

⁸ Echo nkomupapata ukuti mumubweshe mukumushininkisha ukwebati mwalimutemwa.

⁹ Icho namulembele kalata njilya chakuti mweshe nokubona nga kuti mungangumfwila muli fyonse.

¹⁰ Nga mwanakilila umuntu, namunakilila. Nga nanakila, ekwebati nanakilila pamulandu wenu pamenso aku Klistu.

¹¹ Ichikulu chakuti Satana etuchengeleka pakuba tulishibile inshila shakwe.

Ifyasakamikile Paulo ku Tuloasi

¹² Ulo nafikile ku Tuloasi ukuti nkashimike Ubutumi Bwawama ubusosa ifyaku Klistu, nalisangile Bashikulu baliswile kale inshila ukuti mpyunge umulimo nkulya.

¹³ Nomba nali uwasakamana, pakuba nshamusangileko wesu Taitasi. Echo nalayile abantu bankulya, elo nayile ku Masedoniya.

Klistu alenga abantu bakwe ukuchimfya.

¹⁴ Tutotele Lesa uututungulula muli Yesu mukuchimfya ishita shonse. Ukupitila muli fwebo, Lesa akopela abantu bonse amano yakwishiba Klistu. Elo amano nga akopalangana mpanga yonse kubati chena ichiweme.

¹⁵ Nachine tuli kubati chena ichiweme ichaku Klistu ichiwamina Lesa pali bo abakopuluka nakuli bo abakuloba.

¹⁶ Kuli bo abakuloba, ichena nchi chamfwa. Nomba kubakupuluka, chena chabumi. Mba ninani uungashilisha umulimo wamfi?

¹⁷ Fwebo tatulipo nga abantu abenji abakochita amakwebo namashiwi aku Lesa. Nomba, pakuti tuli muli Klistu nga abantu abatumwa na Lesa, tusosa muchine, ukulingana nokufwaya kwakwe.