2 Kolinto 13 - Chipangano Chabwangu

Amashiwi akupelako aakuchenjesha nokupela umutende

¹ Ngu muku walenga butatu wakwisa kumutandalilapo. Amalembo asosa ati, “Umulandu onse ushinishinkwe nabakamboni babili nangu batatu.”

² Nkochenjesha bo ababifishe kale nabambi bonse, nga mfilya namwebele ulo nayishile umuku wabubili kobwekeshapo ukumweba ulo nshilayisa ukwebati ulo nakwisa nshakakwatilepo inkumbu umuntu uuli onse.

³ Elo mwakubona ifishibisho ifyo mukofwaya ichakuti Klistu eusosa ukupitila muli ne. Ye tabapo uunakile pafyo akuchita pali mwe, kuntu akobwenesha ifiso fyakwe pakati kenu.

⁴ Aali wanaka ulo balikumutanika pamutashi, kuntu nomba ali nobumi mufiso fyaku Lesa. Nafwebo tuli abanaka muli Ye, kuntu twakuba abomi pamo na Ye mufiso fyaku Lesa, ulo twakupyunga pakati kenu.

⁵ Muyipime mwenka ukubona nga mulikwete ichichetekelo. Mwifumbe mwenka. Napo twamwishibilepo ukuti Klistu Yesu ali muli mwe? Kati tefyopo, chamukanga.

⁶ Nkochetekela ukuti mukobona ukwebati tachatukangile.

⁷ Tukolomba Lesa ukuti mwichitapo ichibi nangu chimo. Tekwebati fwebo tuboneke nga abachimfya, kuntu ukuti mwebo muchite ifilingile, nangu fwebo nga abakangiwa.

⁸ Pakuba tekuti tuchitepo ichili chonse chitendelana nechine, kuntu ifyendelana nechine.

⁹ Tulasekelela ulo tuli abanaka, ulo mwebo muli abafiso. Icho tukolomba Lesa chakuti mube abapwililika ukufikapo.

¹⁰ Nkolemba mfi ulo nshilafika kuli mwe ukwebati nga nafika, nikasangilapo apakubomfya insambu shandi ishabutungulushi mubukali. Bashikulu balimpele ubutungulushi mbu ukuti mwimake, tekumubongololapo iyowo.

¹¹ Echo mwe bawesu, shalenipo umutende. Mweshe ukuba abafikapo, nakilileni kufyo nkomweba, mulokumfwana, elo mwikale mumutende. Elo na Lesa uwakutemwa nomutende akuba namwe.

¹² Poshanyenipo nomutende wine-wine. Abantu baku Lesa bonse bakomuposha umutende.

¹³ Ubwanshi bwaku Bashikulu Yesu Klistu, ichitemweko chaku Lesa, elo nesenge lyaku Mupashi Wabuta fibe namwebo bonse.