2 Kolinto 12 - Chipangano Chabwangu

Ifyo Bashikulu bafisulwile Paulo

¹ Ningile ukuyitutumuna, nangu nshikononkamo kantu. Nakusosa ifimonwa ifyo Bashikulu banangile nefyo bamfisulwile.

² Ndishibile umwalalume umo umwina Klistu uwo bapintile kumulu. Palipitile imyaka ikumi na ine ulo mfi fyachitikile. (Tanshishibilepo kati mfi fyachitikile ulo ali mumubili wakwe nangula kuchimonwa. Lesa ewishibile.)

³ Ndishibile ukwebati umuntu ngulya apintilwe ku Chifulo Chakusekelela Kumulu. (Tanshishibilepo kati mfi fyachitikile ulo ali mumubili nangula kunse yamubili. Lesa ewishibile.)

⁴ Nkulya alibwene ifintu ifyo umuntu tangasosapo.

⁵ Umuntu wamfi nakuyitutumwinapo, kuntu ukusosa pali nebo nenka, tekutipo njitutumune, sembi ifibwenesha ukunaka kwanji.

⁶ Nangu nga nafwaya ukuyitutumuna, tekutipo mbe uupuneme pakuti ningasosa ifyakwebesha fyenka. Nomba nshayitutumune, ukutina ukwebati umo angananguluka ukuba wachilapo, ukupusana na umo bambwenamo elo na umo nsoselemo.

⁷ Nomba ukutina ukwebati ningayitutumuna pamulandu wafikulu ifinji ifyo Bashikulu bamfisulwile, nalipelwe ichifinya ukwinekantu mumubili wanji, chali nintumi yakwa Satana ichali kunchusha ukwebati ningayitutumuna ukuchilapo.

⁸ Elo nalilombele Bashikulu imiku itatu ukuti bachifumye.

⁹ Nomba bo banjebele ati, “Ubwanshi bwanji ebo ukokabila, pakuba ifiso fyanji fikulu ulo uli wanaka.” Echo nayitutumuna mubunake bwanji ukwebati ifiso fyaku Klistu fikale muli ne.

¹⁰ Echo ndasekelela ulo ndiwanaka, abantu bakontuka, bakomfinya, nolo nkoumfwa ukutinya namafya onse pamulandu waku Klistu. Pakuba ulo ndiwanaka, elo ndi nefiso.

Ifyo Paulo atinine pamulandu wabena Kolinto

¹¹ Naba uupuneme, kuntu nimwebo mwalenga mfi. Nimwe mwalingile ukumpela bukamboni. Pakuba nangu nshilipo kantu, kuntu “abatumwa” benu abo abayibela tabanchililepo nangu panini.

¹² Nalishininkishe ukwinekantu mukushipikisha ukuti ndi mutumwa ulo namubweneshe ifyafiso ifikulu nefyakushimbwisha.

¹³ Napo pali ichintu chimo icho nshamuchitileko ukuchila ifilonganino fimbi fyonse, ukuchila nchi ichakuti niba kubati katundu wakumulemena? Munjeleleko ukubifya nku.

¹⁴ Ngu muku wachitatu ukuyiteyanya ukwisa mutandalila. Elo nshakabepo nga katundu wakumulemena. Nshikofwayapo ububoni bwenu, sembi mwebo mwenka. Pakuba tensambupo ukuti abana basungile abafyashi ububoni, kuntu bafyashi ebalingile ukusungila abana babo ububoni.

¹⁵ Nebo kuti natemwa ukuposa fyonse ifyo ndinafyo, pamo nande, pamulandu wenu. Nomba nga nalimutemwa ukwinekantu mfi, napo mwebo mwakuntemwa panini bwaka?

¹⁶ Nalimo namwe kuti mwasumina ukuti nshalipo kubati katundu wakumulemena. Umbi kuti asosa ati nine wachenjela, nalimo nalimuchenjelekapo.

¹⁷ Napo nalimuchenjelekapo ukupitila muli bo natumine?

¹⁸ Nalitumine Taitasi ukuti ese kuli mwe, pamo nawesu umbi. Napo Taitasi ngulya ewamuchenjeleke, bayi? Napo ye pamo nane tatwachitilepo fyonse nomutima umo? Tempalya twalikuchita fyonse munshila imo?

¹⁹ Nalimo mukolanguluka ukuti tukofwaya ukuyiwamisha pemenso enu? Tefyopo, pamenso aku Lesa, tusosa muli Klistu. Elo pali fyonse, mwe batemwekwa banji, tukofwaya ukumukoseleshako.

²⁰ Nkotina ukwebati nga nayisa kuli mwe, nalimo kuti namusanga abapusene namulya ningafwayila. Nkotina ukuti nalimo namwe mungansanga abapusene namo mungafwayila. Nkotina ukuti nalimo nakumusanga mukotosha, mukofimbila, mukonyeka imitima, kuyitemwa, ukutuka insele, ukwefya, ukuyitutumuna, elo nechimfulunganya.

²¹ Nkotina ukuti nga nayisa nakambi kuli mwe, Lesa wanji kuti amfwisha nsoni pamenso enu. Elo nande nakulila imisonshi pamulandu waku bo ababifishe kale, elo tabalapile pabusali bachitile: Ubuchende bwabo nefibi fyonse ifyo balikuchita.