2 Kolinto 11 - Chipangano Chabwangu

Paulo nabatumwa ababufi

¹ Napapata munjeleleko pakupunama kwanji nku. Munjeleleko.

² Ndi nobufuba namwe kubati nimfilya Lesa ali. Muli kubati mwanansungu uutayishibapo umwalalume uwo nalaya muchupo kumwalalume umo mpo, Klistu umwine.

³ Nomba nkotina ukuti kubati nimfilya insoka yabepele Efa mubuchenjeshi bwayiko, namwe imitima yenu ingabepwa nokukana yipela kuli Klistu nomutima wenu onse.

⁴ Nga umbi ayisa kubilisha Yesu umbi uwapusana nangulya twabilishe, mwebo mulakonka. Elo mulapokelela umupashi nobutumi bumbi ubwapusana no Mupashi Wabuta no Butumi Bwawama ubo mwapokelele kuli fwe!

⁵ Nkolanguluka ati tenepo umutumwa umunini pali bo musosa ati, “Abatumwa abachililepo.”

⁶ Nangu tekuti njishibe bwino kubati nimfilya bachita, kuntu temumanopo iyowo. Mfi twalimubweneshe munshila ishinji muli fyonse.

⁷ Nalichefeshe nenka ukwebati mwebo mukule. Nalibilishe Ubutumi Bwawama ubwaku Lesa ukwambula ukumulipilisha. Napo kuchita mfi nalibifishe?

⁸ Ulo napokelele ubwafwilisho kufilonganino fimbi, kubati kubapoka bwaka ifyabo ukwebati mwafwilisheko.

⁹ Elo ulo nali kuli mwe, panshita ulo nshakwetepo akantu, nshachushishepo umuntu nangu umo. Pakuba bawesu bambi abafuma ku Masedoniya balimpele fyonse ifyo nshakwete. Pali fyonse nalisungile ukuti nimba kubati katundu uwakumulemena. Elo nakutwalililapo ukuchita mfi.

¹⁰ Ukulingana nechine ichaku Klistu ichili muli ne, nkoebesha ati tapapo umuntu uwakunkanya ukuyitutumwina pali mfi mu Akeya monse.

¹¹ Nipamulandu ndo? Napo nshamutemwapo? Lesa alishibile ati nalimutemwa.

¹² Ifyo nkochita nomba nakutwalilila, ukwebati ababufi bekwatilapo apakuyitakishishapo, elo basose ati nabo bakopyunga umulimo ukulingana nafwe.

¹³ Abantu mba tebatumwapo abachine, kuntu abapyungi ababufi, abayibepesha nokuboneka kubati batumwa baku Klistu.

¹⁴ Ukuba nchi techakushimbwishapo iyowo. Kambi Satana naye kuti ayifungushanya nokuboneka nga mungelo wakusanika.

¹⁵ Echo techakushimbwishapo kati mwabona abapyungi bakwa Satana bakoyifungushanya nokuboneka kubati bapyungi babulungami. Kumupwilo bakwisa kupokelela ukulingana nefyo bachitile.

Ukuchula kwakwa Paulo ngo mutumwa

¹⁶ Nkofwaya ukubwekeshapo ukwebati umuntu umbi uuli onse enangulukilapo nga uupuneme. Nomba nga mwe mukonanguluka ukuba uupuneme, chiweme mpokeleleni nga uupuneme ukwebati njitutumwinepo.

¹⁷ Mfi ifyo nkososapo, tefyopo Bashikulu bangasosa, kuntu nkoyitutumuna nga ifyo bachita abapuneme.

¹⁸ Pakuti abenji bakoyitutumwina pafyapanonshi, nande nakuchita fyenka mfi.

¹⁹ Mwebo mukoti muli abamano, echo abantu bapunama mukobalekelela bwaka mukutemwa.

²⁰ Mulamuleka bwaka umuntu uumulenga ubusha, nambalya abamulila ububoni bwenu, nangu abamubepa nangu abamusuula nangu abamupama pamenso.

²¹ Ndinensoni pakusumina ati twali abanakile pakuchita mfilya! Nomba nkososa kubati uupuneme, ifili fyonse bambi bangayitutumwinapo, nandibo nakuyitutumwinapo.

²² Napo ba Hebele? Nandibo. Napo bena Isilaeli? Nandibo. Napo bana bakwa Abulahamu? Nandibo.

²³ Napo bo bapyungi baku Klistu? Nkososa nga muntu uufuntile, ndimupyungi ukubachilapo. Nalipyungile imilimo ukubachilapo. Ilinji nali apepi nokufwa.

²⁴ Pamiku isano Abayuda balimpamine ifikoti amakumi atatu nafisano, elo nafine.

²⁵ Imiku itatu abena Loma bampamine nefikoti. Umuku umo abantu bantobele amabwe. Imiku itatu ubwato nalimo bwalibundile. Umuku umo nalikusela pamenshi ubushiku bonse, akasuba nobushiku.

²⁶ Panyendo shanji ishinji nalikumene nefyakutinya ifinji, munika nakutupondo, mu Bayuda bananji namufimbi ififuma kubenafyalo. Nalikumene nefyakutinya mumisumba, mumpanga, pali babemba nakuli bawesu ababufi.

²⁷ Nalibombele umulimo uunasha. Elo ilinji nshabwenepo utulo. Nalyumfwile insala nachilaka. Ilinji nshakwetepo ifyakulya, nalikumfwa impepo elo nokutakwatapo ifyakufwala.

²⁸ Ukulundapo, chila kasuba naliba uwasakamana pakwangalila ifilonganino fyonse.

²⁹ Ulo umuntu ali uwanaka, nandibo ndaba kubati uwanaka. Ulo umuntu alengwa ukubifya, ndakalipa ukwinekantu.

³⁰ Kati ndinokuyitutumuna, nakuyitutumwina pafintu ifilanga ukunaka kwanji.

³¹ Lesa, Wishi waku Bashikulu wesu Yesu, uwo tulingile ukutondayisha inshita shonse, alishibile ukwebati nshikobepapo.

³² Ulo nali ku Damasikasi, intungulushi iiminina imfumu Aletasi yabikile bamalonda umushi onse ukwebati banjikate.

³³ Nomba abantu balimbikile mumuseke nokunjikisha muchipunda ichamuchibumba chelinga.