1 Yohane 5 - Chipangano Chabwangu

Chichetekelo echichimfya fyamuno chalo

¹ Umuntu onse uuchetekela ukuti Yesu e Wasubwa waku Lesa, mwana waku Lesa. Na ye watemwa Bawishi alitemwa no Mwana wabo.

² Umu emo twishibilako ukuti twalibatemwa abana baku Lesa ulo tutemwa Lesa nokulama amafunde akwe.

³ Pakuti ukutemwa Lesa kulama amafunde akwe, namafunde akwe tayakoselepo iyowo.

⁴ Pakuba umwana waku Lesa onse alachimfya ifyamuno chalo. Icho tuchimfishako ifyapanonse chichetekelo.

⁵ Mba ninani uuchimfya ichalo? Ningulya uuchetekela ukuti Yesu e Mwana waku Lesa epela.

Bukamboni pali Yesu Klistu

⁶ Yesu Klistu ewayishile ukupitila mumenshi aalubatisho nomulopa wamfwa yakwe. Tayishilepo mumenshi bwaka, kuntu mumenshi namumulopa wakwe. Mupashi Wabuta ekamboni pantu wachishinka.

⁷ Kwaba bakamboni batatu:

⁸ Mupashi Wabuta, amenshi nomulopa. Mfi fyonse fitupela bukamboni bumo bwenka.

⁹ Fwebo tulachetekela bukamboni bwabantu, kuntu bukamboni bwaku Lesa bwena bwalichilapo. Bukamboni mbu ebo Lesa apela pa Mwana wakwe.

¹⁰ Umuntu onse uwachetekela mu Mwana waku Lesa ewakwata bukamboni mbu. Onse uutachetekela, alenga Lesa ukuba uwabufi pantu tachetekelepo bukamboni ubo Lesa apela pa Mwana wakwe.

¹¹ Nabukamboni nimbu ubwakuti Lesa alitupa ubumi ubutashila ubutula mu Mwana wakwe.

¹² Umuntu onse uukwete ngu Mwana alinabo mbu ubumi, kuntu onse uutakwetepo Umwana waku Lesa, takwetepo nambu bumi.

Ubumi butashila

¹³ Nkolembela bonse mwe bachetekela mu Mwana waku Lesa ukuti mwishibe ati muli nobumi butashila.

¹⁴ Echo imitima yesu yaba iyashipa pachinso chaku Lesa, pantu alatumfwa muli fyonse ifyo tulomba ukulingana nobufwayo bwakwe.

¹⁵ Ekwebati nga twalishiba ukuti alatumfwa, nokutupa alatupela fyonse ifyo tulomba kuli Ye.

¹⁶ Nga umuntu umbi abona wakwe akochita ububi ubutatwalapo kumfwa, afwile ukumulombelako kuli Lesa. Elo Lesa akumupela ubumi ngu muntu uubifishe. Nkososa kuli bo abachita ububi ubutatwalapo kumfwa. Nomba kuli ububi ubuleta imfwa. Elo nshikososapo ukuti mulokulomba kuli Lesa pali nchi.

¹⁷ Pakuti ububi bonse lubembu. Lelo kuli ububi ubutatwala kumfwa.

¹⁸ Twalishiba ukuti Umwana waku Lesa tatwalililapo ukubifya. Pakuba Yesu, Mwana waku Lesa, alamulama bwino, no Mubi tekuti amuchitepo kantu.

¹⁹ Twalishiba ukuti fwebo tuli bana baku Lesa, nangu chalo chonse chaba muminwe ya Mubi.

²⁰ Twalishiba ukuti Umwana waku Lesa alishile nokutupela amano yakwishiba Lesa wachine. Ekuti nomba twaba muli Lesa ngu, pamo namu Mwana wakwe Yesu Klistu. Ngu e Lesa wachine nakambi ebumi butashilapo.

²¹ Mwe bana banji, mutalukeko kuli tungosa wakubasa.