1 Yohane 4 - Chipangano Chabwangu

Umupashi waku Lesa nomupashi wabufi

¹ Mwe batemwekwa banji, mwilokuchetekelapo umuntu onse uukososa ukuti ali no Mupashi Wabuta. Mumweshe umuntu ngu ukushininkisha nga mupashi akwete waku Lesa ichine. Pantu abasoseshi ababufi bali mpanga yonse.

² Muli nji nshila, mwakwishibilamo umuntu uwakwata Umupashi waku Lesa: onse uusuminisha ati Yesu Klistu ayishileba umuntu wine-wine, waku Lesa.

³ Nomba onse uukolengulula ifyaku Yesu, takwatapo Mupashi waku Lesa. Ngu ali nomupashi uufuma kuchipondo chaku Yesu. Mwalyumfwile ati chakwisa, nanomba chalisa kale muno chalo.

⁴ Mwe bana banji muli baku Lesa. Abasoseshi ababufi mwalibachimfya kale pakuti Umupashi uuli muli mwebo uli nefiso ukuchila uwo bakwata abamuno chalo.

⁵ Bo basoseshi ababufi basosa pafya muno chalo pantu bamuchalo. Nabamuno chalo balabomfwila.

⁶ Lelo fwebo tuli baku Lesa. Onse uwayishiba Lesa alatumfwila. Abashishibe Lesa, tabatumfwilapo iyowo. Munshila nji emo Mupashi wachine nowabufi tuwishibilamo.

Lesa kutemwa

⁷ Mwe batemwekwa, tulokutemwana umo nomunakwe pantu ukutemwa kutula kuli Lesa. Onse wakwata ukutemwa mwana waku Lesa, nakambi alimwishiba Lesa.

⁸ Umuntu onse ushitemwa ekuti na Lesa tamwishibapo pantu Lesa kutemwa.

⁹ Lesa atuboneshe ukutemwa kwakwe akwata pali fwebo ulo atumine Umwana wakwe umofye mpo muno chalo ukuti twingakwata ubumi ukupitila muli Ye.

¹⁰ Nku ekutemwa kwachine. Tekwebapo ati Lesa twalimutemenwe iyowo, kuntu ewatutemenwe nokutuma Umwana wakwe ukwebati afute amabifyo esu.

¹¹ Mwe batemwekwa, nga Lesa atutemenwe mfi tufwile ukutemwana.

¹² Tapapo uwabona Lesa iyowo, kuntu nga twatemwana ekuti Lesa aba muli fwebo, nokutemwa kwakwe kwaba ukwafikapo muli fwe.

¹³ Tulishibile ukuti tuli muli Lesa na Ye aba muli fwebo pakuti alitupela Umupashi wakwe.

¹⁴ Elo twalibona nokwebapo bambi ukuti Bata balitumine Umwana wabo ukuba Umupulushi wanchino chalo.

¹⁵ Umuntu onse uusumina ukuti Yesu Mwana waku Lesa, ekuti aba muli Lesa, elo na Lesa aba muli ye.

¹⁶ Nafwe bene twalishiba nokuchetekela ukutemwa akwata muli fwebo. Lesa kutemwa. Umuntu onse uwakwata ukutemwa ali muli Lesa na Lesa muli ye.

¹⁷ Ukutemwa kwesu nga kwaba ukwafikapo, ekuti ubumi bwesu pano chalo bwakubati bwaku Klistu. Elo tukakwata ukushipikisha pakasuba kabupingushi.

¹⁸ Umuntu uwakwata ukutemwa takwetepo umwenso iyowo, pakuti ukutemwa kwine-kwine kulafumya umwenso. Nga muntu ali nomwenso ekuti aletina ukukandwa nokutemwa kwakwe takwafikapo.

¹⁹ Twalitemwa pakuti Lesa ewatatikile ukututemwa.

²⁰ Umuntu nga asosa ati nalitemwa Lesa, kuntu apata wakwe, wabufi. Kuti atemwa shani Lesa uwo tabonapo nokupata wabo?

²¹ Ifunde ilyo Klistu atupela nindi: onse uwatemwa Lesa atemwe nawakwe.