1 Yohane 3 - Chipangano Chabwangu

Abana baku Lesa

¹ Boneni ifyo Bata batutemenwe ukwinekantu! Batutemenwe ichakuti nomba tukoyitwa abana baku Lesa. Nachine efyo tuli. Abantu tabatwishibapo ifwe pantu tabayishibilepo na Lesa.

² Mwebatemwekwa banji, nomba tuli bana baku Lesa, lelo tachingayishibikwapo ifyo twakuba. Lelo tulishibile ukuti ulo Klistu akuboneka, twakubati ni Ye pantu twakumubona fyenka ifyo aba.

³ Umuntu onse uukwete ukulola nku ayiwamya umwine nga mfilya Klistu aba uuweme.

⁴ Umuntu uuli onse uuchita ichibi alatoba ifunde lyaku Lesa, pantu ukubifya kutoba ifunde.

⁵ Mulishibile icho Klistu abonekele nimukuti atuwamye kumabifyo esu. Echo muli Ye tamupo ububi.

⁶ Umuntu onse uuli muli Klistu tekalililapo mububi, lelo onse uutwalilila mububi ekwebati tamubonapo nangula ukumwishiba.

⁷ Mwileka umuntu amubepe bana banji. Umuntu onse uuchita ifyaololoka aaba uwaololoka kubati ni Klistu.

⁸ Uyo utwalilila ukubifya wakwa Satana, pantu Satana nimbifi ukutula kukutatika. Echo no Mwana waku Lesa abonekele ukuti aonaule imilimo yakwa Satana.

⁹ Umuntu onse uwaba umwana waku Lesa, tatwalililapo ukubifya pantu imibele yaku Lesa yaba muli ye. Pakuti Lesa ewishi, tekuti atwalililepo ukubifya.

¹⁰ Ubupusano pabana baku Lesa napabana bakwa Satana buli mfi: Umuntu uuchita ichibi nokupata wabo tepo mwana waku Lesa.

Mulokutemwana

¹¹ Amashiwi awo twaumfwile ukutula pakutatika akuti tulokutemwana.

¹² Tatufwilepo ukubati ni Kaini uwakulubali lwakwa Mubi. Ayipeye wakwe Abeli. Nindo Kaini amwipayile? Pantu Kaini alechita ifintu ifibi, elo Abeli alechita ifintu ifiweme.

¹³ Echo mwimimapo bawesu nga abantu bamuno chalo bamupata.

¹⁴ Tulishibile ukwebati tulifuminemo nokuba nobumi. Tulishibile nchi pantu twalitemwa bawesu. Uyo ushitemwa wabo ali mumfwa.

¹⁵ Umuntu onse uupata munakwe nikepaya, nakambi mulishibile ukwebati kepaya takwatapo ubumi ubutashila muli Ye.

¹⁶ Mfi efyo twayishibila ukutemwa ifyo kwaba: Klistu apele ubumi bwakwe kuli fwebo. Nafwebo tufwile ukupa ubumi kuli bawesu.

¹⁷ Nga umuchindami abona wakwe akokabila ubwafwilisho, kuntu tamwafwile, ukutemwa kwaku Lesa kwaba shani muli Ye?

¹⁸ Mwe bana banji, ukutemwa kwesu takufwilepo ukuba bwaka pakanwa. Tufwile ukulanga ukutemwa kwesu munchito shesu.

¹⁹ Nji enshila iyo twishiba ukuti tulalama ifyachine nokuteka imitima pachinso chaku Lesa.

²⁰ Panshita yonse atuchusha kampingu wesu, tulishibile ukwebati Lesa alichilapo pakampingu wesu, elo alishiba fyonse.

²¹ Mwe batemwekwa banji, nga kampingu wesu tatushininapo, teti tukwate umwenso pachinso chaku Lesa.

²² Elo fyonse ifyo tulomba alatupela pantu tukonka amafunde akwe nokuchita ifimusekesha.

²³ Ifunde ilyo Lesa atupa lyakuti tuchetekele Umwana wakwe Yesu Klistu. Elo nokuti tulokutemwana ukubati nimulya atusambishe Klistu.

²⁴ Umuntu onse uulama amafunde yakwe ayikala muli Klistu naena muli Ye. Tulishibile ukuti Klistu ayikala muli fwebo pantu alitupa Umupashi Wabuta.