1 Yohane 2 - Chipangano Chabwangu

Klistu ekafwa wesu

¹ Mwe bana banji, nkomulembela mfi ukuti mulokubifyapo. Lelo nga umo abifya, tulikwete kafwa utulubulwilako kuli Shifwe, ni Yesu Klistu uulungeme.

² Ngu ebupe ubunakilila amabifyo esu, tebubi bwesupo bwenka iyowo, kuntu nobwabantu bonse.

³ Nga twakonka amafunde aku Lesa, ekwebati twashininkisha ukuti tulimwishibile.

⁴ Umuntu umo nga asosa ukuti alimwishiba Lesa, elo tanakilapo amafunde akwe, wabufi nechine tamupo muli ye.

⁵ Lelo uukonka amashiwi akwe engulya ukutemwa kwaku Lesa kwabamo ukwapwililika. Muli nji nshila, emo twishibila ukuti twaba pamo na Lesa.

⁶ Uuli onse uusosa ukuti ali mwisenge na Lesa, alingile ukwikala ukubati nimfilya Yesu Klistu ayikele.

Ifunde lyabwangu

⁷ Mwe batemwekwa banji, ndi funde nkomulembela telyabwangupo, kuntu nindilya mwali nalyo ukufuma kukutatika. Ifunde ndi mashiwi mwaumfwile kale.

⁸ Nangu chibe mfi, ifunde nkomulembela lyabwangu pantu fyonse likososa fyachitikile muli Yesu nakambi fikochitika muli mwe. Pakuti imfinshi ikoya ikoshila, elo nolubuto ulwine-lwine lwatatika ukusanika.

⁹ Umuntu onse uusosa ukuti aba mulubuto, elo apata wakwe ali mumfinshi napali nji nshita.

¹⁰ Uyo watemwa wakwe ayikala mulubuto, elo tapapo nangu chimo muli ye chakumunenusha.

¹¹ Umuntu onse uwapata wakwe ali mumfinshi nakambi enda mumfinshi. Teshibapo uko akoya pantu imfinshi yamulenga ukutabona.

¹² Nkolembela mwebo mwe bana banji pantu ububi bwenu bulelelwa pamulandu waku Klistu.

¹³ Nkolembela mwe bata pantu mulimwishibile uyo uwabako ukufuma kukutatika. Nkolembela mwe balumbwana pantu mwamuchimfya Umubi ngulya.

¹⁴ Nkolembela mwe bana banji, pantu mwalishiba Bata. Nkolembela mwe bashifwe, pantu muli mwishibile uyo uwabako ukufuma kukutatika. Nkolembela mwe balumbwana, pantu muli nefiso. Ishiwi lyaku Lesa likala muli mwebo, mwamuchimfya Umubi ngulya.

¹⁵ Mwitemwapo ichalo nangula fyonse ifyabamo. Nga umuntu atemwa ichalo, ekwebati tatemwapo Bata.

¹⁶ Fyonse fyamuchalo, ubufwayo bwamubili, ifintu ifyo amenso akumbwa, nafyonse ifilenga abantu ukuyitutumuna panonshi. Takupo pali mfi fyonse ichifuma kuli Bata, kuntu fyonse mfi fyamuno chalo.

¹⁷ Ichalo nafyonse ifyabamo ifyo bantu bakumbwa fyakupita, lelo umuntu uuchita ubufwayo bwaku Lesa ekalilila umuyayaya.

Ichipondo chaku Klistu

¹⁸ Mwe bana banji, nji ninshita yakupelako! Mwalyebelwe ukuti ichipondo chaku Klistu chakwisa. Nomba ifipondo fyaku Klistu ifinji nafiboneka kale. Echo tulishibile ukuti nji ninshita yakupelako.

¹⁹ Mba bantu bali nafwebo kale, kuntu tabalipo bebumba lyesu. Ababa bamwibumba lyesu nga twayikele nabo. Lelo balifumine ukuti baboneke ati tabali bamwibumba lyesu.

²⁰ Nomba mwebo Klistu amusubile no Mupashi Wabuta, echo mulishibile ifintu fyonse.

²¹ Nshikomulembela pamulandu wakuti tamwishibilepo ichine iyowo, kuntu ukuti mulishibile. Elo mulishibile ukuti ubufi tabwingafuma muchine.

²² Mba uwabufi ninani? Ningulya onse uusosa ukuti Yesu talipo Uwasubwa waku Lesa. Umuntu uukana Bata no Mwana echipondo chaku Klistu.

²³ Umuntu onse uukana Umwana akana na Bata. Uwasumina Umwana ekuti asumina na Bata.

²⁴ Nomba mwebo musunge fyonse mwaumfwile ukufuma pakutatika. Nga mfi fyayikalilila muli mwebo, ekwebati mwayikalilila muli Bata namu Mwana.

²⁵ Nchi echo Klistu umwine alayile ukutupa, ubumi bwamuyayaya.

²⁶ Nkomulembela mfi pamulandu waku bo abakofwaya ukumulufya.

²⁷ Lelo mwebo Klistu alimusuba no Mupashi Wabuta uyo uwayikala muli mwe. Pamulandu waku nchi, takufwayikapo umuntu nangu umo ukuti amusambishe. Umupashi Wabuta uyo mwasubwa wakulamusambisha fyonse. Fyonse ifyo akomusambisha fyachine nakambi tamuli ifyabufi iyowo. Echo kubati nimfilya amusambishe, mwikalilile muli Klistu.

²⁸ Ina, bana banji, ikaleni muli Ye, mukuti nga aboneka tukeushiwe nokushipa. Tatwakaumfwepo insoni pakasuba ulo akwisa.

²⁹ Kubati nimfilya mwishibile ukuti Klistu aba uwaololoka, ekuti onse uuchita ifyaololoka Mwana waku Lesa.