1 Timoti 6 - Chipangano Chabwangu

¹ Abasha bonse balingile ukupela umuchinshi kuli bashikulu wabo, ukuti abantu besebanyapo ishina lyaku Lesa nefyo tusambisha.

² Abasha abatekwa kubena Klistu, belokubachushapo iyowo pantu niba wabo. Elo bapyunge ukuchilapo kale pakuti bo abakumwenamo nimbalya abachetekela, abatemwekwa kuli bo. Mfi efyo ulingile ukusambisha nokubilisha.

Abasambishi babufi nobuboni ubwachine

³ Umuntu onse uukosambisha ifipusene namfi wakuyitutumuna. Tasuminapo mumashiwi akwebesha aku Bashikulu Yesu Klistu nefyakusambilila ifyakuchinshika Lesa.

⁴ Umuntu uwamfi teshibilepo akantu, kuntu umutima ufwaya bwaka ifyakutalikishanya pafintu ifyabwaka. Mfi fyonse fileta bwaka akalumwa ifitala, umusalula, ukulangulukila ifibi pabantu,

⁵ nokulaka inshita shonse ukufuma kubantu abo amano abo alyonayika, abatangeshibapo ifyachine. Bena balanguluka ukuti ukulomba Lesa enshila yakusangilamo ububoni.

⁶ Nachine ukulomba Lesa ebusambashi ubukulu, ichikulu umuntu akopima ifyo akwete ukuti filimulingile epela.

⁷ Pantu tatwaletelepo akantu pano chalo, echo tatwakapintepo akantu nangu kamo pakufumamo.

⁸ Kanshi nga tuli nefyakufwala elo nefyakulya fyenkefyo finji.

⁹ Nomba abantu abafwaya ububoni ubwinji, balawila mukweshekwa nakambi balekatwa kuchitembo ichalunkumbwa ulupusene-pusene ulwabupuba ulo ulubaposa mufibi.

¹⁰ Pakuti ukutemwa indalama entulo yabubi bonse. Pamulandu wakutemwesha indalama abantu bambi bafumamo munshila iyachichetekelo, elo ifyakufinya ifinji fyabepaya.

Paulo akonkobesha Timoti

¹¹ Webo we muntu waku Lesa ulokufitina fyonse mfi. Ulokwesha ukuba nobumi ubwakaele, ubwakuchinshika Lesa, ubwakuchetekela, ubwakutemwa, ubwakushipikisha nobwakuyichefya.

¹² Ulokulwa bwino inkondo iyakusunga ichichetekelo ukufikila ukapokelele ubumi butapwa. Pantu efyo Lesa akwitile ulo wasuminine palwalala ifyachichetekelo chobe nabantu bonse balikumfwa.

¹³ Nomba nkokukonkobesha pamenso aku Lesa uupela ubumi kufintu fyonse, nelyaku Klistu Yesu uwapele bukamboni ubwakwebesha pachinso chakwa Pontiyo Pilato.

¹⁴ Nkokweba ati ukwambula akalema nangula ukutwishika, ulokulama bwino fyonse ifyo wasambilile ukufikila ulo Bashikulu Yesu Klistu bakubwela.

¹⁵ Panshita ilingile Lesa akwisa kutulanga uyo uwashuka ukotungulula enka, Imfumu iyashamfumu, nakambi Shikulu waba shikulu bonse.

¹⁶ Ngu enka tafwapo iyowo, elo ayikala mulubuto ulo umuntu umbi atangapalaminako. Nakale takupo uwamubwene nowingamubonapo iyowo. Kuli Ye kube umuchinshi nefiso umuyayaya. Ameni.

¹⁷ Ubebe ababuboni panonshi ukuti tabalingile ukuyitutumuna nangula ukuchetekela pabuboni bwabo ubutekalililapo. Nomba balingile ukuchetekela kuli Lesa uyo uutupela ifintu fyonse ukuti tusekele nafyo.

¹⁸ Ubakoseleshe ukuti balokuchita ifiweme, ukuti abantu beshibilepo ati babuboni ukupitila mumilimo iiweme, nokuti bakane nomutima umo nabanabo.

¹⁹ Muli nji nshila emo bakuyimakila umufula ukosele pakuyipekanishisha ifikoyisa ukuti bakapokelele ubumi ubwinenene.

²⁰ Timoti, usunge fyonse ifyo wapelwa. Ushe amashiwi akulakaika bwaka, ayo atapelapo umuchinshi kuli Lesa, namashiwi akutalikana awo abantu abapuneme beba ati yamano.

²¹ Echo kanshi abantu bambi bakolanguluka ukuti balikwete amano nga, baluba nokuposa ichichetekelo chabo. Ubwanshi bwaku Lesa bube namwebo bonse.