1 Timoti 5 - Chipangano Chabwangu

Ifyakusunga abachetekela

¹ Wilokukalipilapo umuntu umukulu, kuntu ulabile nakwe kubati nibawiso. Abalumbwana nabo ulokubachita kubati nibawenu.

² Abanakashi abakulu ulokubachita kubati nibanoko, elo abanansungu kubati nibankashi shobe nomutima wabuta.

³ Ulokuchinshika abanakashi ifyokolo bo abatakwetepo abakubasunga.

⁴ Nomba ichokolo nga chili nabana nangula abeshikulu, abantu mba balingile ukusambilila imilimo yaku Lesa kunanda yabafyashi babo. Pakuchita mfi bakubwesha abafyashi babo ifyo bapokelele ukufuma kuli bo. Pakuti mfi efisekesha Lesa.

⁵ Nomba umwanakashi chokolo umwinenene, uutakwetepo nangu umo uwakumwafwako, nga abika ichichetekelo chakwe muli Lesa epela. Elo alalomba ukwambula ukuleka ubushiku nakasuba ukuti Lesa amwafwe.

⁶ Nomba umwanakashi chokolo nga ayibika mukutemwa amalila amuno chalo alifwile kale nangu achili umumi.

⁷ Ubapele nga mafunde pakuti bekwatapo akalema mumitima yabo.

⁸ Nomba umuntu nga takosakamanapo abamukowa wakwe, ukuchilapo abamulupwa lwakwe umwine, ngu muntu aliposa ichichetekelo chakwe nakambi mubi ukuchilapo noutachetekela.

⁹ Umwanakashi talingilepo ukupendwa pafyokolo, kano ali nemyaka amakumi asano naumo. Abe ichokolo ichaupilwe kumwalalume umo epela.

¹⁰ Elo alingile ukuba umuntu uwamichitile iiweme. Abe umwanakashi uwalikusunga bwino abana bakwe, uwakupokelela abalwendo bwino, uwalikupyungila abena Klistu mukuyichefya, walikwafwa abalikuchula, elo alikuyipela kukupyunga imilimo iiweme yonse.

¹¹ Nomba ifyokolo fyabanakashi abayiche wibapendelako kuli ndi bumba. Pantu ulo ulunkumbwa lwakuupwa lwabekata, chakubalenga ukufuma kuli Klistu nokuupwa nakambi.

¹² Nchi chakulenga ukuti besunga ubulayo ubo bapele pakwamba.

¹³ Elo belaba abanang’ani nokwendauka mumananda yabantu bambi. Tempa penka, balakwata nolwambo, balayiposa mufyabambi nokusosa ifitabalingile.

¹⁴ Echo kanshi nkofwaya ukuti ifyokolo ifyayiche fyupwe nokufyala abana nokusunga amananda yabo pakuti ifipondo fyesu filokutusekulukapo.

¹⁵ Pakuti ekofili kale ifyokolo fimbi fyabanakashi ifyapilibwike nokukonka Satana.

¹⁶ Nga umwanakashi umwina Klistu alikwete abanakashi ifyokolo palupwa lwakwe, alingile ukubasunga bwino ukwambula ukubatwala mukuchusha ichilonganino. Elo ichilonganino chakwafwako ifyokolo ifyaba fyenka.

¹⁷ Abakulu bachilonganino abatangilila bwino ifilonganino fyabo, balingile ukuchinshikwa ukwinekantu. Muchishepo pali bo ababilisha nokusambisha amashiwi aku Lesa.

¹⁸ Pakuti Amalembo akososa ati, “Wikakapo kukanwa kantungu ulo shikonyanta tiligu.” Nakambi ati, “Uwamilimo alingile amalipilo akwe.”

¹⁹ Wikutikako kumashiwi akwebaula umukulu wachilonganino, kano kuli bakamboni babili nangu batatu.

²⁰ Mubakalipile palwalala bonse abakochita ifibi pakuti bambi bakwatilepo umwenso.

²¹ Pachinso chaku Lesa na Klistu Yesu napamenso abangelo abapatulikwa nkokukonkobesha ukuti ulame mfi fyonse ukwambula kapatulula. Wichitapo chimo mukutemwa umbi.

²² Wilokwangufyanyapo ukubika amaboko obe pamuntu wonse ukuti apyungile Bashikulu ukutina ukuti wingasangwa ukosuminisha ifibi fyabambi. Ulokuyilama wenka ukwambula akalema.

²³ Wilokunwa amenshi enka, kuntu natuwaini ukuti tulokwafwilishako mumala pamulandu uwakulwalilila.

²⁴ Ifibi fyabantu bambi filabonekela palwalala, elo filabatangilila kukupingulwa. Nomba ifibi fyabambi filaboneka panuma.

²⁵ Munshila yenka, imilimo iiweme ilabonekela palwalala, elo neyo iitabonekapo bwangu, kuntu tekuti ifisamepo iyowo.