1 Timoti 4 - Chipangano Chabwangu

Abasambishi babufi

¹ Umupashi Wabuta ukotwebako apatubile tuutu ukuti munshiku shakulekelesha abantu bakaposa ichichetekelo chabo. Bakutatika ukumfwila abantu ababufi nokukonka imisambishishe yafibanda.

² Imisambishishe nji ifuma kubantu abachenjela mukubepa ubufi ubo abo kampingu yabo yalyonayika kubati baochele kuchela ichikabile.

³ Mba bantu balakanya banabo ukuupa nokulya ifyakulya fimbi. Nomba ifyakulya mfi Lesa alifipangile ukuti abantu bonse abachetekela nokwishiba ifyachine balokulya panuma yakulomba Lesa.

⁴ Fyonse ifyo Lesa aapangile fiweme. Echo umuntu talingilepo ukufikanya ukulya. Apokelele fyonse mukulomba Lesa.

⁵ Pakuti amashiwi aku Lesa elo nokulomba efilenga ukuti fipokelelwe kuli Lesa.

Kapyunga wachine uwaku Klistu Yesu

⁶ Nga wasambisha bawesu ifintu mfi, wakuba umupyungi uuweme uwaku Klistu Yesu, uwakulila mumashiwi achichetekelo chesu, ekusambisha ifyachine ifyo wakonka.

⁷ Nomba ufumeko kutufuto utwabwaka kubati nintulya utwabakote. Nomba usambilile ukuba nobumi ubwakupela Lesa umuchinshi.

⁸ Pantu ukuchinchila kulakoshako umubili panini, kuntu ubumi ubwakuchinshika Lesa bulafwilisha munshila shonse pakuti bulashininkisha ukushuka kwashino nshiku, elo nakunshita ikoyisa.

⁹ Amashiwi nga alingile ukuyapokelela nokuyachetekela.

¹⁰ Emulandu tupyungila nefiso nokulwisha, pakuti ichichetekelo chesu chaba muli Lesa uwabumi uyo uuli Mupulushi wabantu bonse, nokuchilapo abo abachetekela.

¹¹ Ubakonkobeshe nokubasambisha amashiwi nga.

¹² Kwibapo umuntu nangu umo uwakukusuula pantu uli umulumbwana. Nomba ube ichakubwenako kuba Klistu bonse mukusosa kobe, mumyendele, mukutemwa, muchichetekelo namukubuta umutima.

¹³ Ukufikila ulo nakwisa, wipele ukubapendela nga amashiwi, ukushimikila nokusambisha.

¹⁴ Wisulapo ubupe bobe ubo wapokelele ulo abasoseshi bashimikile amashiwi aku Lesa nolo intungulushi shabikile amaboko pali webo.

¹⁵ Uchinchile ukuchita mfi nokupyunga mukuyipela ukuti abantu bonse babone ubumi bobe ubwabwina Klistu ubo bukokulilako.

¹⁶ Ulokwilama bwino wenka nokusambisha uko ukwete. Utwalilile ukupyunga, winakapo, pantu nga wachita mfi, emo wakupulukilamo pamo nabo abakoumfwa kuli webo.