1 Timoti 3 - Chipangano Chabwangu

Intanjishi muchilonganino

¹ Nga mashiwi akwebesha ayakuti kati umuntu akofwaya umulimo wakutangilila ichilonganino, akofwaya umulimo uuweme.

² Intanjishi yachilonganino ilingile ukuba umuntu uwambula akalema, uwaba nomwanakashi umo epela, uwamutembo, uwakuyilama, uwamuchinshi, uupokelela bwino abalwendo, elo uwayishiba ukusambisha.

³ Talingilepo ukuba chakolwa nangula uwalubuli, kuntu uwafuuka umutima, uwamutende, uutatemwapo indalama.

⁴ Abe uwayishiba ukusunga bwino abamunanda yakwe, ukusambisha abana bakwe ukuti balokumumfwila nokumuchinshika.

⁵ Nomba umuntu nga tayishibapo ukusunga ulupwa lwakwe bwino, kuti asunga shani ichilonganino chaku Lesa?

⁶ Talingilepo ukuba umuntu uwatatikile ukuchetekela bwangu nalimo kuti atatika ukuyikusha, elo akupelwa umulandu ukubati nimfilya Kachenjeleka apelwe umulandu.

⁷ Alingile ukuba nolulumbi uluweme kubatali bamuchilonganino ukuti eyisebanyapo nokuwila mumatunko ayakwa Kachenjeleka.

Abakwafwako muchilonganino

⁸ Abakwafwa muchilonganino nabo babe abamuchinshi, bekwatapo indimi shibili, bechishapo ukunwa ifyakukola nangula ukufwaya ukukwata ububoni mubuchenjeshi.

⁹ Nomba balingile ukuba abaololoka ukwambula ukutwishika mukuchetekela ifyo Lesa afisulwile.

¹⁰ Pakwamba balingile ukweshekwa, ukubona nga balilingile, panuma elo bangapyunga.

¹¹ Abanakashi babo babe abamuchinshi, bebapo abalwambo iyowo. Elo babe abayichefya nokuchetekelwa muli fyonse.

¹² Uwakwafwa muchilonganino alingile ukukwata umwanakashi umo epela, uwakulela bwino abana bakwe, abasunga bwino abamunanda yakwe.

¹³ Kuli bakafwa abo abakopyunga bwino bakusangamo umuchinshi, elo kuti basosa nefiso ifyachichetekelo chabo icho bakwata muli Klistu Yesu.

Ichabumfinshi Ichikulu

¹⁴ Nduno ulo nkomulembela nji nkalata, ndinechichetekelo ichakwisa bwangu mukumubonapo.

¹⁵ Nomba nga nachelwa ukwisa, ifyo nalemba muli kalata nji fyakukutangilila ifyo abantu balingile ukwikala munanda yaku Lesa umumi. Chilonganino eling’umba nomufula uwafyachine ifyaku Lesa.

¹⁶ Takupo uwingakayika ichabumfinshi ichikulu ichakulombelamo Lesa wesu, Ye abonekele nomubili wabuntu, Umupashi Wabuta wasosele ukuti mulungami, abangelo balimubwene. Balikumubilikisha pakati kabenafyalo bonse, balimuchetekele abantu bapanonshi, elo alipintilwe kumulu mumuchinshi.