1 Timoti 2 - Chipangano Chabwangu

Ifyakulomba muchilonganino

¹ Ichakutatikilapo icho nkomupapata chakuti, abantu bonse balokulomba. Mupapate, mulombeleko abantu bonse nokutotela Lesa.

² Lombeleniko imfumu nabonse abali mubutungulushi ukuti bende mumutende, mubuleme namukuchinshika.

³ Mfi fyonse fiweme nakambi filasekesha Lesa Umupulushi wesu,

⁴ ngu uufwaya ukuti abantu bonse bapuluke nokwishiba ifyachine.

⁵ Pakuti kuli Lesa umo enka, nakambi kuli umo uwimakanina pakati ka Lesa nabantu. Umuntu ngu ni Klistu Yesu.

⁶ Ngu aliipele umwine ukuti apulushe abantu bonse. Nchi chali ichishibilo ichakuti inshita yalinga ilifikile.

⁷ Echo antumine ukuba kabilisha nomutumwa. Nkosambisha abenafyalo ifyachichetekelo nechine. Nachine nkososa ifinenene, tanshikobepapo iyowo.

⁸ Nkofwaya ukuti lonse ulo mwalongana abalalume balokwimya amaboko abo pakulomba. Balokuchita mfi mukupela umuchinshi kuli Lesa ukwambula ukukalipa nangula ukutalika.

⁹ Elo nkofwaya abanakashi ukuti balokufwala bwino mumuchinshi uulingile. Mukuyiwamya kwabo belokulukapo imishishi nangula ukufwala ifyagolide, ukufwala utwakuyiwamisha tumbi nefyakufwala ifyamutengo uukulu.

¹⁰ Nomba bayipele mukupyunga imilimo iiweme pantu mfi efyalinga ukuchita abanakashi abayitunga ukulomba Lesa.

¹¹ Abanakashi pakubasambilisha bekale mumuchinshi namukuyichefya.

¹² Tanshikofwayapo ukuti abanakashi balokusambisha nangula ukutungulula abalalume. Balingile ukwikala shilili bwaka.

¹³ Pakuti Adamu ewakutatika ukubumbwa elo panuma Efa.

¹⁴ Talipo Adamu bachenjelekele, kuntu mwanakashi bachenjelekele nokutoba ifunde lyaku Lesa.

¹⁵ Nomba umwanakashi akwisa kupulukila mukufyala bana, ichikulu ashipikisha mukuyichefya, muchichetekelo, muchitemweko, elo nomutima uwabuta.