1 Tesalonika 5 - Chipangano Chabwangu

Mulokwipekanya kukwisa kwaku Bashikulu

¹ Mwe bawesu, ifyakwishiba nshiku nenshita ulo mfi fintu fyakuchitika, tanshingamulembelapo.

² Epo mwebene mulishibile bwino ukuti akasuba kaku Bashikulu kakwisa kubati mung’o esa ubushiku.

³ Ulo abantu bakasosa ati, “Ifintu fyonse fili tondolo,” eli mukwangufyanya ubonaushi bwakwisa pali bo. Bwakwisa kubati kufinya kwamwanakashi pakupusuka, nabantu tabakabutukepo.

⁴ Nomba mwe bawesu, tamuli mumfinshi ukwebati nkalya kasuba kakamusange kubati mung’o.

⁵ Pakuti mwebo muli bantu bamulubuto, abamukasuba. Tamuli bamumfinshi, abamubushiku iyowo.

⁶ Echo tatufwilepo ukushipula nga mfilya bachita bambi, lelo tufwile ukulola nokwiteyanya.

⁷ Pakuti bushiku ulo abantu balala nakambi elo bakolwa.

⁸ Apo tuli bamukasuba, tufwile ukuyipekanya. Tufwale ichichetekelo nechitemweko nge chichingililo pachifuba. Nechisoti chesu chibe ukulolela kwesu ukuti tukapuluke.

⁹ Pakuti Lesa tatusalile ukuti tuchule kubukali bwakwe, kuntu ukwebati tupuluke ukupitila muli Bashikulu Yesu Klistu.

¹⁰ Ye alitufwilile ukuti tube nobumi pamo nakwe, nangula tuli abomi nangu abafwa ulo akwisa.

¹¹ Nomba mulokukoseleshanya nokwafwana umo nomunakwe nga mfilya mukochita kale.

Amashiwi akumupwilo

¹² Tukomupapata mwe bawesu, mulokuchinshika abakobombela pali mwebo, nentungulushi shenu, muli Bashikulu Yesu Klistu, nabo abakomuchenjeshako.

¹³ Muchitemweko, mulokubapela umuchinshi uukulu pamulandu wamulimo bakobomba pali mwebo. Mulokwikala nomutende pakati kenu.

¹⁴ Mwe bawesu, tukomupapata ukuti muchenjeshe abanang’ani, mukoseleshe abena Klistu abakutintilila, mwafwilisheko abanaka. Mulokuteka umutima kubantu bonse.

¹⁵ Boneni ukuti tapapo nangu umo ukobwekesha ububi pabubi. Lonse mulokufwaya ukuchita ifiweme kubanenu, elo nakubantu bonse.

¹⁶ Mulokusekelela lonse.

¹⁷ Mulokulomba inshita shonse.

¹⁸ Mulokutotela lonse. Mfi efyo Lesa akofwaya ukuti muchite muli Klistu Yesu.

¹⁹ Mwilokukanyapo umulimo waku Mupashi Wabuta.

²⁰ Mwisaushapo Ubutumi Bwawama ubukobilishiwa.

²¹ Lelo mweshe ifintu fyonse. Mulame ifiweme.

²² Mwikanye kububi bonse.

²³ Lesa umwine, uutupela umutende, amulenge ukuba abantu bakwe abenenene. Amulenge abafikapo mumupashi, mumitima nakambi mumibili yenu ukuti mwikaba nakalema ulo bakwisa Bashikulu Yesu Klistu.

²⁴ Uyo uwamwitile wachishinka. Akamuchitila fyonse mfi.

²⁵ Bawesu, mulokutulombelako nafwe.

²⁶ Elo mulokuposhanya nechitemweko chine-chine.

²⁷ Muli Bashikulu, ndemupapata ukuti mupende inkalata nji kuli bawesu bonse.

²⁸ Ubwanshi bwaku Bashikulu Yesu Klistu bube namwebo bonse.